¹ "Tulis ka epo mlekat jmaat mbo Efesus: Endo doko firman ngket Io, yo ngop turu bintong ene mbo kayang sanan-Iyo ai malan ela ekang turu botis dian amas ene. ² Aku tau eka gawi gata kam: ai poruk pgel ai kselentuo kam. Aku tau, se ikam belo di doloh epo ulun-ulun triaw, se ikam sundok nyoba dero yo ngangkan se iyo rasul, tapi yo sebeta iyo mba di ktine, se ikam sundok tau se dero pnampa eta. ³ Ai ikam nokon doloh ai sesa koe karan-Ku; ai ikam belo tau basa mole. ⁴ Beta ko ktine Aku mensala ikam, koe ikam sundok ngendikah pengkosang kam yo tla. ⁵ Koe ene knop ka se lontop beta ikam sundok toyak! Btobat ka ai gnawi nua ise yo tla gawi kam. Ena belo ktine, Aku anta ulet epo ikam ai Aku anta ngalek botis dian kam ngket awaiyo, ena ikam belo btobat. ⁶ Tapi ndo yo keo mbo ikam, yo ene ikam ngekey eka gawi gata ulun-ulun yo lumpat Nikolaus, yo Aku kekey low. ⁷ Ise yo keo tlingo, moko yo nempaning ise yo ulek Roh epo jmaat-jmaat: Ise-ise yo kuret, io anta die Ku kuman ngket tonga nte nembolum yo keo mbo Taman Firdaus Allah." ⁸ "Ai tnulis ka epo mlekat-mlekat jmaat mbo Smirna: Endo doko firman ngket Yo Tla ai Yo Pngabis, yo sundok mate ai sundok bolum nua: ⁹ Aku tau kbenasa kam ai kekao kam - tapi ikam tataw - ai ptenah dero, yo ngulek io se ulun Yahudi, tapi yo sbeta iyo mba di ktine: mokin ube dero ene doko jmaah Iblis. ¹⁰ Nang takut epo ise yo nyesa ikam! Sbeta iyo Iblis anta nurak tenu-tenu kongo ngket ikam epo lang sper apa ikam nikap ai ikam anta kiso kanam bnasa kola spulu olo. Moko yo ikam stia sampe mate, ai Aku anta mie epo ikam mahkota pnyembolum. ¹¹ Ise yo keo tlingo, moko iyo io nempaning ise yo ulek Roh epo jmaat-jmaat: Ise-ise yo kuret, io belo anta kiso kanam bnasa koe pngemate yo kduo." ¹² "Ai tulis ka epo mlekat jmaat mbo Pergamus: Endo doko firman Io, yo makai mendau tarom ai duo daro: ¹³ Aku tau mbo mone ikam nongos, yo ene mbo lane, mbo awa pnunge Iblis; ai ikam sgop mbo karan-Ku, ai ikam belo di ngendikah iman kam epo Aku, belo low de jman Antipas, saksi-Ku, yo stia epo Aku, yo pnate mbo onon ikam, mbo mone Iblis nongos. ¹⁴ Tapi Aku keo tenu-tenu kberatan epo ikam: ngket ikam keo tenu-tenu kongo yo lumpat tutuy batuk Bileam, yo mie nasehat epo Balak nte mketang ulun Israel, apa dero kuman persembahan berhala ai gawi jinah. ¹⁵ Ktine low keo mbo ikam ulun-ulun yo ngaya epo tutuy batuk ulun yo lumpat Nikolaus. ¹⁶ Koe ene btobat ka! Ena belo ktine, Aku anta resi ulet epo ikam ai Aku anta ngembali dero diang mendaw yo mbo bowa-Ku endo. ¹⁷ Ise ise yo keo tlingo, moko iyo io nempaning ise yo ulek Roh epo jmaat-jmaat: Ise-ise yo kuret, epo iyo anta die Ku ngket manna yo melim; ai Aku anta mie epo iyo batu bura, yo ban ne tnulis karan bayu, yo belo tnoan koe ise-ise ulun, makse ko koe io yo nrima ene." ¹⁸ "Ai tulis ka epo mlekat jmaat mbo Tiatira: Endo doko firman Pea Allah, yo mato-Iyo kati dolan api ai botis-Iyo kati loyang: ¹⁹ Aku tau eka-eka gawi kata kam: buen kosang ktine low iman kam, buen playanan kam ktine low kbuket kam. Aku tau, se gawi gata kam yo sori pawak deo se yo tla. ²⁰ Tapi Aku mensala ikam, jkoe ikam belo nyanda bawe Izebel, yo ngulek se io se nabi bawe, nutuy matuk ai ngwewong batak-batak Ku apa dero nggawi jinah ai kuman okan singkap yo dnie epo berhala. ²¹ Ai Aku sundok mie io jman nte btobat, tapi io belo kakan btobat ngket jinah ene. ²² Eti ka, Aku anta nurak io epo ban ranjang ulun kroton ai dero yo nggawi jinah diang io anta turak Ku epo lang kbenasa yo olay, ena dero belo btobat ngket gawi gata bawe ene. ²³ Ai pea-pea iyo anta pate-Ku ai eka jmaat anta tau, se Aku doko yo nyoba pngenanam ai kesong ulun, ai se Aku anta males epo ikam tongku ulun sengkono diang gawi gata iyo. ²⁴ Tapi epo ikam, yo doko ulun-ulun yo mak mbo Tiatira, yo belo di lumpat tutuy batuk ene ai yo belo di nyempti ise yo ulek dero nau umbang Iblis, epo ikam Aku ngulek: Aku belo kakan nengkoyat yo mak epo ikam. ²⁵ Tapi ise yo keo mbo ikam, gop ka ene sampe Aku ulet. ²⁶ Ai ise-ise kuret ai ngenjoun gawi gata-Ku sampe pnyundok iyoi, epo iyo die Ku kuasa ombon bangsa-bangsa; ²⁷ ai io anta mrenta dero diang goloy bsi; dero anta pinotme kati priuk blanga tana tukang priuk - sama kati yo trima Ku ngket Bapa-Ku - ²⁸ ai epo iyo anta die-Ku bintong timur. ²⁹ Ise yo keo tlingo, moko yo io nempaning ise yo ulek Roh epo jmaat-jmaat."