¹ Sundok ene aku kito anak domba ene ngingkang segel yo tla ngket turu segel ene. Laju aku kringo erai ngket opat korik ene ngulek, "Dido!" ulek Oyon ene ulak kati oyon nayu. ² Kito ka doko aku, melak erai kukui kuda bura. Keo ulun ban kuda ene yo mulem pana, ai mbo io dnie mahkota. Io maju kati ulun kuret yo bju naket pngkuret. ³ Sundok ene oli anak domba ene ngingkang segel yo kduo, ai aku kringo korik yo kduo ene ngulek, "Dido!" ⁴ Laju erai kukui kuda yo mak baling nua. Kuda ene mea sak sura iyo. Ulun yo ban kuda ene dnie kuasa nte ngmapos umbang yo damai ngket pupus dnia, apa ulun bako pate. Ene doko io dnie mndau olai. ⁵ Sundok ene oli anak domba ngingkang segel yo ktolu. Aku kringo korik yo ktolu ngulek, "Dido!" Aku kito, Melak doko erai kukui kuda buyung. Ban kuda ene keo ulun mulem erai dasing nte nimbang mbo kayang iyo. ⁶ Ai aku kringo kati ungka oyon yo dingo ngket ekang opat kukui korik ene. Oyon ene ngulek, "Erai liter gandong yo buen kati uman upa gawi erai olo, ai tolu liter jelai sama kati uman upa gawi erai olo low. Tapi nang kinorusak lnga zaitun ai anggur!" ⁷ Sundok ene anak domba ene ngingkang segel yo kopat. Ai aku kringo korik yo kopat ene ngulek, "Dido!" ⁸ Aku kito, melak erai kukuy kuda yo ijau lemit. ulun yo ban kuda ene karan se Maot ai krajaan maot lumpat iyo. Bagi opat dnia snrah epo dero nte pate diang mndau, diang lau, diang roton ngndlanan ai diang korik kotok paru popak. ⁹ Sundok ene anak domba ene ngingkang segel yo klimo. Aku kito se ela iwat mezbah ruo-ruo ulun-ulun yo kono lian pate koe dero mturon pnyampe ngket Allah diang pngesah dero. ¹⁰ Dero nengow diang oyon ries, "O Tuhan yo Jutkuasa, yo suci ai yo kono! Kola-kola aso moko iko ngadil ulun mbo dnia ai ngukum dero koe sundok ngmpate kain?" ¹¹ Tongku dero dnie erai jubah yo bura. Laju dero snuyu smole ile, Sampe ndok sukup kdeo tman-tman yo kerai kokes komer ai eraibuntung-eraibuntung dero yo anta pnate kati dero. ¹² Sundok ene aku kito anak domba ene ngingkang segel yo konom. Ulet ka doko klakui yo dras beta. Mato olo jadi buyung kati diris buyung, ai bulan jadi mea kati daya. ¹³ Bintong-bintong ngrpoya ngket langit mitek dnia kati bua ara yo belo pian nsak ngrpotop ngket lai iyo kono skukui koe brubu. ¹⁴ Langit krurut kati buyang gnulung, ai eka tunden diang pulou bkensor ngket awa iyo. ¹⁵ Sundok ene raja-raja dnia, ulun-ulun pjabat, plima-plima,ulun-ulun tatau ai ulun-ulun bkuasa, ai ulun-ulun yo mak, yo ulun batak ktine low ulun-ulun yo bebas, eka nyona lang liang-liang ai ela ekang-ekang batu tuong. ¹⁶ Epo tunden-tunden diang batu-batu ene, dero ngulek, "Roros ta nyngkinan kain! Ona kam kain ngket pngeti Io yo tunge ela ombon tahta, ai ngket pngmara roa Anak Domba ene! ¹⁷ Koe sundok ulet olo olai pmriek ai dero ai ise yo klian nantai?