¹ Laju aku kito langit yo bayu ai dnia yo bayu, koe langit yo ono ai dnia yo ono sundok belo keo, ai ndok tasik belo keo oli. ² Ai aku kito kota yo kudus, Yerusalem yo bayu, diwa ngket sorga, ngket Allah, yo braji kati pnganten bawe yo nraji nte song iyo. ³ Laju aku kringo oyon ries ngket pnunge Raja ene ngulek: "Eti ta, kemah Allah keo mbo ekang ulun ai Io anta nongos sama-sama diang dero. Dero anta jadi umat-Iyo ai Io anta jadi Allah dero. ⁴ Ai Io anta ngloli eka-eka olu mato ngket mato dero, ai maot belo anta keo opli; belo anta keo oli pngeluai, ktine low tangis tungul, ene low pngenyoru, koe eka ise masam yo usang ene sundok mapos." ⁵ Io yo tunge mbo ban pnunge Raja ene ngulek: "Eti ta, Aku nampa ise masam jadi bayu!" Ai firman-Iyo: "Tulis ka, koe eka pmensara endo pas-pas mbo nau ai beta." ⁶ Firman-Iyo nua epo aku: "Eka-eka ene sundok terjadi. Akuendo doko Alfa ai Omega, Yo Tla ai Yo Pngabis. Ulun yo krengan anta die Ku ngisop diang die tingen ngket mato danum nte bolum. ⁷ Ise-ise ulun yo kuret, io anta kuli eka-eka iyo ene, ai Aku anta jadi Allah iyo ai io anta jadi pea-Ku. ⁸ Tapi ulun-ulun yo pnakut, ulun-ulun yo belo percaya, ulun-ulun gramas, ulun-ulun pngempate, ulun-ulun lonte, tukang-tukang keo pentoan, tukang nyembah berhala ai eka pnampa eta, dero anta kuli awa dero mbo lang tata api kati tasik yo dolan raya ai blerang; endo doko pngemate yo kduo." ⁹ Jadi ulet ka doko erai kongo ngket turu mlekat yo ngop turu ktowong, yo ponu diang turu pengkono pengkna pngabis ene, laju io ngulek epo aku, ulek iyo: "Dido epo mendo, aku anta nutuy epo iko pnganten bawe, mempelai Anak Domba." ¹⁰ Laju, mbo lang roh io moit aku epo ombon tunden yo olay ulak ombo ai io nutuy epo aku kota yo kudus ene, Yerusalem, diwa ngket sorga, ngket Allah. ¹¹ Kota ene ponu diang kmulia Allah ai pa iyo sama kati permata yuo paling buen, kati permata yaspis, lio kati kristal. ¹² Ai dinding iyo sae ulak ombo ai jawong pnyumba iyo dua blas ; ai mbo ombon jawong pnyumba ene keo dua blas mlekat ai ela ombon iyo tnulis karan duo blas suku Israel. ¹³ Ngket tadah timur keo tolu jawong pnyumba ai ngket tadah utara tolu jawong pnyumba ai ngket tadah slatan tolu jawong pnyumba ai ngket tadah barat tolu jawong pnyumba. ¹⁴ Ai dinding kota ene keo dua blas batu pendasi ai mbo ban ne tnulis dua blas karan dua blas rasul Anak Domba ene. ¹⁵ Ai io, yo bsara diang aku, keo goloy pnyukat ngket amas nte nyukat kota ene diang jawong-jawong pnyumba iyo ai dinding iyo. ¹⁶ Kota ene nau iyo kompan opat, kangjang iyo sama diang ksae iyo. Ai io nyukat kota ene diang goloy ene: dua blas ribu stadia; kanjang iyo ai ksae iyo ai kekombo iyo sama. ¹⁷ Laju io nyukat dinding iyo: jatus opat pulu opat hasta, ngaya pnyukat ulun, yo ene low pnyukat mlekat. ¹⁸ Dinding ene tnampa ngket permata yaspis; ai kota ene se ngket amas tolen, kati kasa lio. ¹⁹ Ai pendasi-pendasi dinding kota ene tnako diang bmasam jnis permata. Pendasi yo tla batu yaspis, pendasi yo kduo batu nilam, pendasi yo ktolu batu mirah, pendasi yo keopat batu zamrud, ²⁰ pendasi yo klimo batu unam, pendasi yo keonom batu sardis, pendasi yo kturu batu ratna cempaka, yo kewalu batu beril, yo kesie batu krisolit, yo ksepulu batu krisopas, yo kseblas batu lazuardi ai yo kduo blas batu kcubung. ²¹ Ai kduo blas jawong pnyumba ene yo doko duo blas mutiara: tongku jawong pnyumba tnampa ngket erai mutiara ai boyan-boyan kota ene ngket amas tolen kati kasa lio. ²² Ai aku belo di kito Bait Suci mbo lang ne; koe Allah, Tuhan Yo Paling Kuasa, ene doko Bait Suci iyo, ktine low Anak Domba ene. ²³ Ai kota ene belo perlu mato olo ai bulan nte ngwala iyo, koe kmulia Allah ngwala ai Anak Domba ene doko lampu iyo. ²⁴ Ai bangsa-bangsa anta malan lang pa iyo ai raja-raja mbo dnia moit pengkeo dero epo iyo; ²⁵ ai jawong-jawong pnyumba iyo belo anta di tnokom des molo, koe malom belo anta keo oli mbo lane; ²⁶ ai pengkeo ai ormat bangsa-bangsa anta noit epo iyo. ²⁷ Tapi belo anta sumba epo lang ne ise-ise yo rmis roma, ktine low ulun yo ngenjoun yo triaw ktine low pnampa eta, tapi puluun dero yo karan iyo tnulis mbo lang kitab bolum Anak Domba ene.