¹ Sundok ene io nutui epo aku lowak danum nte bolum. Lowak ene lio ngrmpiat kati intan ai smalir ngket pnunge Allah ai pnunge Anak Domba ene, ² ela tenga-tenga boyan mbo kota ene. Ela isan lowak ene, ela mpai-mpai lowak ene keo tonga kayu nte bolum yo kbua duoblas derang, tongku bulan sindai; Ai daon kayu ene pnakai nte mkale bangsa-bangsa. ³ Jadi belo keo oli pengkono pengkna koe pator sumpah. Pnunge Allah ai pnunge Anak Domba ene anta keo mbo lang ne ai batak-batak-Iyo anta sembayang epo-Iyo, ⁴ ai dero anta kito wae-Iyo, ai karan-Iyo anta tnulis mbo dai dero. ⁵ Ai malom belo anta keo oli mbo lane, ai dero belo di koyoh makai pa lampu ai pa mato olo, koe Tuhan Allah anta jadi pa epo dero, ai dero anta mrenta kati raja sampe turai-turai. ⁶ Laju Io ngulek epo aku: "Pmensara-pmensara endo montuk ai beta, ai Tuhan, Allah yo mie roh epo nabi-nabi, sundok nyuyu mlekat-mlekat-Iyo nte nutuy epo batak-batak-Iyo ise yo arus duni terjadi." ⁷ "Beta-beta yo Aku duni ulet. Ego beta ka doko ulun yo ngaya pmensara-pmensara pmere kitab endo!" ⁸ Jadi aku, Yohanes, aku ka doko yo sundok kringo ai kito eka-eka ene. Ai des sundok aku kringo ai kito ene, aku nyongkop ela onon botis mlekat, yo sundok mkelak eka-eka ene epo aku, nte nyembah iyo. ⁹ Tapi io ngulek epo aku: "Nang ktine gawi! Aku endo batak, sama kati iko ai erai buntung-erai butung ko, nabi-nabi ai eka-eka dero yo ngaya eka pmensara kitab endo. Sembah ka Allah!" ¹⁰ Laju io ngulek epo aku: "Nang ngemetrai pmensara-pmensara pmere ngket kitab endo, koe des iyo duni aut. ¹¹ Ise-ise ulun yo gawi gata dat, koe ka io dor gawi gata triaw; ise-ise ulun yo rmis mrota, koe ka io dor rmis mrota; ai ise-ise ulun yo bolum beta, koe ka io dor keo gawi gata yo beta; ise-ise ulun yo kudus, koe ka io dor mkudus io se!" ¹² "Beta-beta iyo Aku duni ulet ai Aku moit upa-Ku nte males epo tongku ulun sengkono diang gawi gata iyo. ¹³ Aku endo doko Alfa ai Omega, Yo Tla ai Yo Sori tingen, Yo Tla ai Yo Pngabis." ¹⁴ Ego beta ka doko dero yo npas jubah iyo. Dero anta kuli ngempun tobnga-tonga kayu nte bolum ene ai sumba tete jawong-jawong pagar epo lang kota ene. ¹⁵ Tapi koko-koko ai tukang-tukang ulun roa atok lmu, ulun-ulun lonte, ulun-ulun paro pate, nyembah-nyembah berhala ai tongku ulun yo gawal nampa eta ai yo ngenjouniyo, nongos ela baling. ¹⁶ "Aku, Yesus, sundok nyemuyu mlekat-Ku nte mie pnyurah nau umbang eka-eka endo epo iko nte jmaat-jmaat. Aku doko suli, yo ene upus Daud, bintong timur yo trang beta." ¹⁷ Roh ai pnganten bawe ene ngulek: "Mendo ka!" Ai ise-ise yo kringo iyo, moko io ngulek: "Mendo!" Ai ise-ise yo krengan, moko io ulet, ai ise-iase yo kakan, moko io ngalek danum nte bolum diang dnie tingen-tingen! ¹⁸ Aku bsara epo tongku ulun yo kringo pmensara-pmensara pmere ngket kitab endo: "Ena keo ulun yo nambah ise-ise epo pmensara-pmensara endo, koe ene Allah anta nambah pengkono pengkna epo io yo tnulis lang kitab endo. ¹⁹ Ai ena keo ulun mkurang ise-ise ngket pmensara-pmensara ngket kitab pmere endo, koe ene Allah anta ngalek mpun iyo ngket kayu nte bolum ai ngket kota kudus, kati yo tnulis lang kitab endo." ²⁰ Io yo mie pnyurah nau umbang eka-eka endo, bfirman: "Ooh, Aku duni ulet!" Amin, ulet ka, Tuhan Yesus! ²¹ Kasih karunia Tuhan Yesus sama-sama diang ikam eka-eka! Amin.