¹ Sundok ngket ene aku kringo oyon ries ngket jut ulun deo mbo sorga, ulek iyo: "Haleluya! Slamat ai kmulia ai kuasa keo mbo Allah taka, ² koe beta ai adil eka-eka pmutus-Iyo, koe Io ka doko yo sundok mutus lonte nguto ene, yo ngrusak dnia diang pmokeng iyo; ai Io ka doko yo sundok males daya batak-batak-Iyo epo lonte ene." ³ Ai nte kduo derang iyo dero ngulek: "Haleluya! O, utut iyo dombo sampe turai-turai." ⁴ Ai kduo pulu opat pngentuo ai keopat korik ene nyongkop ai nyembah Allah yo tunge ban pnunge Raja ene, ai dero ngulek: "Amin, Haleluya." ⁵ Jadi dingo ka doko keo oyon ngket pnunge Raja ene: "Pnuji ka Allah taka, o eka ikam batak-Iyo, ikam yo takut se Io, ktine yo alus ktine low yo nuon!" ⁶ Laju aku kringo oyon kati oyon jut ulun deo, kati kserow danum owa ai kati oyon nayu ries, ulek iyo: "Haleluya! Koe Tuhan, Allah taka, Yo Paling kuasa, sundok jadi raja. ⁷ Alo taka ego ai bdia-dia, ai ngmulia Io! Koe olo nika kawen Anak Domba sundok sampe, ai pnganten-Iyo sundok siap aut. ⁸ Ai epo iyo dnie apa spakai diris lenan solo yo ngrensilau ai yo bura sak!" [Lenan solo ene doko gawi gata yo buen ngket ulun-ulun kudus.] ⁹ Laju io ngulek epo aku: "Tnulis ka: Ego beta dero yo pnakot epo ungan kawen Anak Domba." Ulek iyo nua epo aku: "Pmensara endo beta, pmensara-pmensara ngket Allah." ¹⁰ Jadi nyongkop ka doko aku ela onon botis iyo nte nyembah io, tapi io ngulek epo aku: "Nang gawi ktine! Aku endo batak sama diang iko erai buntung -erai buntung ko, yo ngempun pnyurah nau umbang Yesus. Sembah ka Allah! Koe pngesah nau umbang Yesus ene doko roh pmere." ¹¹ Laju aku kito sorga wingkang: sbeta-beta iyo, keo erai kukuy kuda bura; ai Io yo ban ne nan karan se: "Yo Stia ai Yo Kono" ,Io mutus ai prang diang adel. ¹² Ai mato-Iyo kati nau dolan api ai ombon utok-Iyo keo deo mahkota ai mbno-Iyo ke tnulis karan yo belo ndok erai ulun tau, makse Io se. ¹³ Ai Io makai jubah yo sundok snoso lang daya ai karan-Iyo yo doko: "Firman Allah." ¹⁴ Ai eka psukan yo mbo sorga nyarak Io; dero nendung kuda bura ai makai lena solo yo bura sak. ¹⁵ Ai ngket bowa-Iyo nyoret erai babak mendaw takei yo anta ngrembas eka bangsa. Ai Io anta ngayak dero diang goloy bsi ai Io anta mia anggur lang pmia anggur, yo doko pngemara ngriten Allah, Yo Palingkuasa. ¹⁶ Ai mbo jubah-Iyo ai po-Iyo tnulis karan, yo doko: "Raja eka-eka raja ai Tuan ombo se eka-eka tuan." ¹⁷ Laju aku kito erai kongo akat lang mato olo ai io nyentongau diang oyon ries epo eka mpulu yo tmiling ela ombo, ulek iyo: "Dido epo mendo ai bkumpul ka nte lumpat ungan Allah, ungan yo olay, ¹⁸ apa ikam kuman isi eka-eka raja ai isi eka-eka pngelima ai isi eka-eka ulun yo kois nglawan musu ai isi eka-eka kuda ai eka isi ulun yo nendung iyo ai isi eka ulun, ktine dero yo bebas ktine low ulun batak, ktine low yo alus ene low ulun yo olay." ¹⁹ Ai aku kito korik ene ai raja-raja mbo dnia diang tentara-tentara dero sundok bkumpul nte prang nglawan Penendung kuda ene ai tentara-Iyo. ²⁰ Jadi tnangop ka korik ene ai sama-sama diang io nabi plesu, yo sundok keo tanda-tanda mbo onon wae mato iyo, ai diang ktine io nguwewong dero yo sundok nrima tanda ngket korik ene ai io sundok nyembah sempatung ene. Dero duo tenurak sanko bolum epo lang tasik api yo dolan raya koe blerang. ²¹ Ai eka-eka ulun yo mak pnate diang mendaw, yo baling ngket bowa Pnendung kuda ene; ai eka mpulu boting koe isi dero.