¹ Sundok ngket ene aku kito erai kongo mlaekat yo mak diwa ngket sorga. Io keo kuasa olai ai dnia jadi pa koe kmulia-iyo. ² Ai io momba diang oyon ries, ulek-iyo: "Sundok roros, sundok roros Babel, kota olai ene, ai io sundok jadi awa nongos roh-roh triaw ai awa nyona eka-eka roh rmis ai awa nyona eka-eka mpulu-mpulu yo rmis ai yo knekei, ³ koe eka-eka bangsa sundok ngisop anggur gawal ngmundal pokeng iyo ai raja-raja mbo dnia sundok nggawi yo rmis diang io, ai ulun-ulun dagang mbo dnia sundok jadi tatau koe ruak ruaw ngket pnggawal ngempu-iyo ene." ⁴ Trus aku kringo oyon yo mak ngket sorga ngulek: "Malan ikam aut, o umat-Ku, malan aut ngket mne apa ikam nang ngalek bagian lang dosa-dosa-iyo, ai apa ikam nang lumpat sngkinan pngkono pngkna-iyo. ⁵ Koe dosa-dosa-iyo sundok btumpuk-tumpuk sampe langit, ai Allah sundok knop eka-eka gawi gata triaw-iyo. ⁶ Bales ka epo-iyo, sama kati io low males, ai die ka epo-iyo duo lipat kati gawi-iyo, snampur ka nte-iyo duo lipat mbo lang ktowong pnyampur-iyo; ⁷ die ka epo-iyo kurow ksa ai pngluai, kati kdeo kmulia ai keo ba, yo sundok io kiso. Koe io ngulek lang kesong-iyo: Aku ban pnunge raja kati ratu, aku makse balu, aku belo anta pini luai. ⁸ Koe ene eka-eka pngkono pngkna-iyo anta ulet lang erai olo, yo doko pripit ai pngnyoru ai suyung; ai io anta tnuna diang api, koe Tuhan Allah, yo mutus nte io, ene galak," ⁹ Ai raja-raja mbo dnia, yo sundok nggawi yo rmis ai kanam bolum ruak ruaw diang io, anta nangis nungul koe io, ena dero kito utut api yo nuna-iyo. ¹⁰ Dero anta akat oro-oro koe takut nau pmnasa-iyo ai dero anta ngulek: "Beta-beta ssa, beta-beta ssa iko, o kota yo olai, Babel, o kota to turon, koe lang erai jam bute iko sundok kono ukum!" ¹¹ Ai ulun-ulun dagang mbo dnia nangis ai nyoru koe io, koe belo keo ulun oli yo moli barang-barang dero, ¹² yo doko barang-barang mas ai pirak, prmata ai mutiara, ngket lenan solo ai diris ungu, ngket sutra ai diris kirmizi, bmasam jnis barang ngket kayu yo buen kewo-iyo, bmasam jnis barang ngket tanduk, bmasam jnis barang ngket kayu yo rarang, ngket loyang, bsi ai pualam, ¹³ upak kayu manis ai rmpa-rmpa, kewo-kewo, mur ai jombu, anggur, lnga, jlpong alus ai gandong, lmbu sapi, domba, kuda ai kreta, batak, sampe pan kesong ulun. ¹⁴ Ai dero anta ngulek: "Sundok mapos bua-bua yo tinongkakan kesong kam, ai eka-eka yo mroa ogot ai bang buen mapos ba ngket ikam, ai mba anta di nruku oli." ¹⁵ Dero yo ngndagang barang ene, yo sundok tatau koe io, anta akat oro-oro koe takut se pmnsasaiyo, ai ulak nangis nungul, ¹⁶ dero ngulek: "Beta-beta ssa, beta-beta ssa, kota olai, yo bpakai lenan solo, ai diris ungu ai diris kirmizi, ai yo tnako diang amas, diang prmata ai mutiara, koe lang erai jam bute ktataw kroa ene sundok eka". ¹⁷ Ai tongku tukang ngmudi ai ulun blayar ai anak bua kpal ai eka-eka ulun yo pnytaket-iyo mbo tasik, akat oro-oro, ¹⁸ ai nongaw, des dero kito utut api yo nuna-iyo, ulek-iyo: "Kota mone yo sama diang kota olai endo?" ¹⁹ Ai dero mewet bondul ombon utok dero ai nongaw, ulak nangis nungul, ulek dero: "Beta-beta ssa, beta-beta ssa, kota olai, yo koe-iyo eka-eka ulun, yo mpun kpal mbo tasik sundok jadi tataw koe barang-iyo yo rarang, koe lang erai jam bute io sundok eka rusak ba. ²⁰ Snang kesong doko koe io, o sorga, ai ikam, o ulun-ulun kudus, rasul-rasul ai nabi-nabi, koe Allah sundok mkitek ukuman nte io koe ikam". ²¹ Ai erai kongo mlaekat yo galak, ngenkat erai botu batu kolai batu pnggiling, laju nurak-iyo epo lang tasik, ulek-iyo: "Ktindo doko Babel, kota olai ene, anta tnurak ndok ries epo iwa, ai io belo anta di nruku oli. ²² Ai oyon ulun-ulun tukang nitik kecapi ai ulun-ulun tukang slegu, ai pnyiup-pnyiup nsuling ai tmburi, belo anta dningo oli mbo lang iko, ai budah erai kongo yo paling tukang stampa belo anta nruku oli mbo lang iko, ai oyon ngnggiling belo anta dningo oli mbo lang iko. ²³ Ai pa lampu belo anta kuwala oli mbo lang iko, oyon song bawe nika kawen belo anta dingo oli mbo lang iko. Koe ulun-ulun dagang ko ene tuon-tuon ulun hebat mbo dnia, koe lmu amal-ko eka-eka bangsa pinoktang." ²⁴ Ai mbo lang mne keo daya nabi-nabi ai ulun-ulun kudus ai daya eka-eka ulun, yo pnate mbo dnia.