¹ Laju ulet doko erai kongo ngket turu mlekat, yo moit turu ketowong ene ai ngulek epo aku: "Epo ndo, aku anta nutui epo iko putusan nte lonte olai, yo tunge mbo awa yo deo danum yo. ² Diang io raja-raja mbo dnia sundok keo gawi pokeng, ai ulun-ulun yo ngawa mbo dnia sundok mauk koe anggur pokeng iyo." ³ Lang roh aku oit io epo padang gurun. Ai aku kito erai kongo bawe tunge ela ombon erai kukui korik yo meya ungu,yo ponu tnulis diang karan-karan uja. Korik ene keo turu utok ai spulu tanduk. ⁴ Ai bawe ene makai diris ungu ai diris kirmizi yo tnako diang amas, permata ai mutiara, ai mbo kayang iyo keo erai ketowong amas ponu diang eka-eka gawi triaw ai kmerota pokeng iyo. ⁵ Ai ela dai iyo tnulis karan, yo melim: "Babel olai, ine ngket bawe-bawe lonte ai ngket kteriaw dnia." ⁶ Ai aku kito bawe ene mauk koe daya ulun-ulun kudus ai daya saksi-saksi Yesus. Ai des aku kito iyo, aku eran beta. ⁷ Laju ulek mlekat ene epo aku: "Ise moko iko eran? Aku anta ngulek epo iko yo melim ngket bawe ene ai yo melim ngket korik yo moson iyo, korik yo keo utok turu ai keo tanduk spulu ene. ⁸ Jadi korik yo sundok itan ko ene, sundok keo, tapi belo keo, io anta ulet ngket liang mate, ai io tadah epo bnasa. Ai dero yo nongos mbo dnia, yo ene dero yo belo keo tnulis mbo lang kitab kehidupan des dnia tnampa, anta eran,e na dero kito, se korik ene sundok keo, tapi belo keo, ai anta ulet nua. ⁹ Yo penting mbo mendo io doko akal yo keo atok pentau: turu utok ene yo doko turu tunden, yo ela ombon yo bawe ene tunge, ¹⁰ turu yo ene low turu raja: Limo mbo ekang yo sundok toyak, yo erai keo ai yo mak belo pian ulet, ai ena io ulet, io anta nongos ile-ile bute. ¹¹ Ai korik yo pini keo ai yo tempo ndo belo keo ene,iyo se ene doko raja ke walu ai beta ko ktine erai ngket turu ene ai io btadah epo mate. ¹² Ai ksepulu tanduk yo sundok itan ko ene yo doko spulu raja, yo belopian mulai mrenta, tapi erai jam kola yo dero anta nrima kuasa jadi raja, sama-sama diang korik ene. ¹³ Dero erai kesah surah, penggalak ai kuasa dero diye dero epo korik ene. ¹⁴ Dero anta prang bali Anak Domba.Tapi Anak Domba anta mekalah dero, koe Io ene doko Tuon ngombo eka-eka se tuon ai Raja ngombo se eka-eka raja. Dero sama-sama diang Io low anta kuret, yo ene dero yo benomba, yo sundok pnili ai yo stia." ¹⁵ Laju io ngulek epo aku: "Eka danum yo sundok itan ko, ela mone bawe lonte ene tunge, yo ene bangsa-bangsa ai rayat deo ai suku-suku ai basa. ¹⁶ Ai ke sepulu tanduk yo sundok itan ko ene diang korik ene anta ngekei lonte ene ai dero anta nampa iyo jadi lengoh ai blayi, ai dero anta kuman isi iyo ai nuna yo diang api. ¹⁷ Koe Allah sundok nampa pa nte kesong dero nte nggawi petua-Iyo diang kerai kesah surah ai nte miye pmerenta dero epo korik ene. Sampe eka-eka firman Allah sundok gnenap. ¹⁸ Ai bawe yo sundok itan ko ene, yo ene kota olai yo mrenta ombon raja-raja mbo dnia."