¹ Sundok ene aku kringo oyon ries lang Bait Allah ngulek epo turu mlekat ene: "Daro ikam ai tudak kam atok turu ktowong pngmara Allah ene epo ban dnia!" ² Jadi mlekat yo tla daro laju nudak atok ktowong-Iyo epo ban dnia. Jadi tumbu ka doko smbolot yo boto ai payah beta epo eka ulun yo keo tanda korik ene, ai epo ulun-ulun yo nymbah smpatung iyo. ³ Sundok ene mlekat yo kduo nudak atok ktowong iyo epo tasik. Koe ene danum ene jadi daya, kati daya ulun mate ai jadi mate ka ise yo keo kesong, yo bolum lang tasik. ⁴ Sundok ene mlekat yo ktolu nudak atok ktowong ene epo lowak-lowak ai epo mato-mato danum, eka ka doko danum jadi daya. ⁵ Aku kringo se mlekat yo keo kuasa epo danum ngulek, "Iko adil, Iko yo keo ai sundok keo, Iko yo kudus, yo sundok mkitek ukum endo. ⁶ Koe dero sundok nembaling daya ulun-ulun kudus ai nabi-nabi. Iko low sundok mie dero ngisop daya; umbang ene sngkono memang nte dero!" ⁷ Ai aku kringo mesbah ene ngulek: "O Tuhan, Allah, Yo Paling kuasa, beta ai adil eka putus-Ko." ⁸ Ai mlekat yo keopat nudak atok ktowong ene epo mato olo, ai epo iyo dnie kuasa nte nuna ulun diang api. ⁹ Ai ulun sia koe layong api yo dras, ai dero nguja karan Allah yo mpun kuasa epo pngkono pngknan ene ai dero belo btobat nte ngmulia Io. ¹⁰ Ai mlekat klimo nudak atok ktowong iyo mitek pnunge tuon korik ene ai krajaan iyo jadi seom, ai dero ngikit dola dero koe mtikas kanam nantai siet, ¹¹ ai dero nguja Allah yo mbo sorga koe kanam siet ai koe smbolot dero ene, tapi belo jokat dero btobat ngket umbang gawi-gata dero. ¹² Ai mlekat yo keonom nudak atok ktowongiyo mitek lowak olai, atang Efrat, laju koreng ka doko danum iyo, apa buen nte boyan raja-raja yo ulet ngket tadah timur. ¹³ Ai aku kito ngket bowa loden ai ngket bowa korik ai ngket bowa nabi plsu baling tolu roh mrota yo memenau bekok. ¹⁴ Ene doko ene roh-roh setan yo tau nampa gawi-gata yo ajaib, ai dero malan nyruku raja-raja mbo pupus dnia, nte ngumpul dero nte bprang des Olo yo kinonuon, yo ene olo Allah yo Palingkuasa ¹⁵ "Eti tah, Aku ulet kati pngako. Ego beta ulun yo dor bjaga-jaga ai meti nau pnypakai iyo, apo io nang malan diang blai blanyang ai belo di mai koe blai." ¹⁶ Sundok ene io ngumpul dero mbo awa yo lang basa Ibrani nulek se Harmagedon. ¹⁷ Ai mlekat yo kturu nudak atok ktowong iyo epo tadah langit. Dingo ka doko oyon yo ries ngket pnunge Raja mbo Bait Allah, yo ngulek, "Sundok gnawi aut!" ¹⁸ sundok ene keo ka ilap bebeap salotuntung ai oyon grgu nayu ngrpuntum, diang klakui yo olay. Belo pini keo klakui kekolay ene ngket des ulun tnampa. ene doko klakui yo olay tingen! ¹⁹ Laju beboka ka doko kota olai ene jadi bagi tolu ai roros ka doko kota-kota bangsa-bangsa yo belo tau se Allah. Jadi knop ka doko Allah se Babel yo olai ene nte mie epo iyo ktowong yo ponu batok anggur pngmara-Iyo ²⁰ Ai eka pulau mapos, ai belo dikeo nruku oli tunden-tunden. ²¹ Ai uran botu es olai, koyat iyo limo pulu kilu tongku botu, toyak ngket langit mitek ulun-ulun, ai ulun-ulun nguja Allah koe pngkono pengkna itek uran botu es ene, koe umbang itek pngkono ene dras beta.