¹ Ai aku kito keo tanda yo mak mbo langit, olai ai ajaib: turu mlekat diang turu pengkono pengkena yo paling sori,koe diang ene sundok doko oli kmara roa Allah. ² Ai aku kito ise-ise katinau tasik kasa sampur api, ai mbo isan tasik kasa ene akat ulun-ulun yo sundok mkalah korik ene ai sempatung iyo ai angka karan iyo.Ela dero keo kcapi Allah. ³ Ai dero blegu legu Musa, batak Allah, ai legu Anak Domba, otang iyo: "Olai ai ajaib eka-eka gawi gata-Ko, o'Tuhan, Allah, Yo Paling Kuasa! Adil ai beta eka-eka boyan-Ko, o'Raja eka-eka bangsa! ⁴ Ise yo belo takut, o' Tuhan, ai yo belo ngmulia karan-Ko? Koe Iko bute yo brese; koe eka-eka bangsa anta ulet ai sujud nyembah Iko, koe sundok tnoan yo kono eka-eka hukum-Ko." ⁵ Trus ngket ene aku kito ulun ngengau Bait Suci-kemah ksaksian-mbo Sorga. ⁶ ai turu mlekat diang turu pengkono pengkena ene, baling ngket Bait Suci, makai lenan yo bura brese ai ngrensilau ai dada iyo pinolilit ketinggang ngket amas. ⁷ Ai erai ngket opat korik ene miye epo turu mlekat ene turu ketowong ngket amas yo ponu atok kmara Allah, yo ene Allah yo bolum sampe turai-turai. ⁸ Ai Bait Suci ene ponu utut koe kmulia Allah ai koe kuasa-Iyo, ai ndok belo erai kongo ulun kuli sumba Bait Suci ene, onon se penyundok turu pengkono pengkena ngket turu mlekat ene.