¹ Ai aku kito: beta-beta yo, Anak Domba akat mbo tunden Sion ai sama-sama diang Io jatus opat pulu opat ribu kongo ulun ai mbo dai dero btulis karan-Iyo diang karan Bapa-Iyo. ² Ai aku kringo oyon ngket langit kati ksrow danum owa olai ai kati oyon otu nayu ries. Ai oyon yo dingo ku ene kati oyon ulun main kecapi yo nitik kecapi-iyo. ³ Dero slegu lagu bayu mbo onon pnunge Raja ene ai mbo onon opat korik ai pngntuo-pngntuo ene, ai ndok belo erai kongo yo kuli tau lagu ene ena makse yo jatus opat pulu opat ribu ulun yo sundok tnous ngket dnia endo ene. ⁴ Dero ene ulun-ulun yo belo di ngrmis dirinyawa dero diang bawe-bawe, koe dero brse sama kati bawe ngelok. Dero ene ulun-ulun yo lumpat Anak Domba ene epo mombe ka Io malan. Dero tnous ngket ekang ulun jadi korban-korban ono tingen nte Allah ai nte Anak Domba ene. ⁵ Ai mbo lang bowa dero belo keo eta; dero belo keo bila molon. ⁶ Ai aku kito erai kongo mlaekat yo mak tmiling mbo tenga-tenga langit ai mbo-iyo keo Injil yo kden nte sampe epo dero yo nongos mbo dnia endo ai epo eka-eka bangsa ai suku ai basa ai klompok, ⁷ ai io nongau diang oyon ries: "Arus takut se Allah ai arus kinomulia Io, koe sundok ulet des nte Io ngukum, ai arus snmbah Io yo sundok nampa langit ai dnia endo ai tasik ai eka-eka mato danum." ⁸ Ai erai kongo mlaekat yo mak, mlaekat kduo, nyndikui io ai ngulek: " Sundok roros, sundok roros Babel, kota olai ene, yo sundok ngmauk eka-eka bangsa diang anggur pngkakan ngempu rmis-iyo" ⁹ Ai erai kongo mlaekat yo mak, mlaekat ktolu, nyndikui dero, ai ngulek diang oyon ries: "Ena keo ulun yo nymbah bnatang ai smpatung-iyo ene, ai nrima tanda mbo dai-iyo ktine low mbo tangan-iyo, ¹⁰ koe ene io anta ngisop anggur mara roa Allah, yo sinodia belo di snampur lang ktowong mara roa-Iyo; ai io anta knssa diang api ai blerang mbo onon mato mlaekat-mlaekat kudus ai mbo onon mato Anak Domba. ¹¹ Jadi utut api yo ngurow ngsa dero ene dombo epo ombo ndok kden, ai molo malom dero belo di brnti-brnti knurow knsa, yo doko dero yo nymbah bnatang ai smpatung-iyo ene, ai ise-ise ulun yo sundok nrima tanda karan-iyo." ¹² Yo pnting mbo mndo ene kturon pngnanam nte stia ulun-ulun kudus, yo ngaya prenta Allah ai iman epo Yesus. ¹³ Ai aku kringo oyon ngket sorga ngulek: Tulis ka: "Ego beta doko ulun-ulun mate yo mate lang Tuhan, ngket tempo ndo endo." "Beta-beta yo, "ulek Roh, "apa dero kuli smole ngket poruk pgel dero, koe eka-eka gawigata dero lumpat dero." ¹⁴ Ai aku kito: beta-beta yo, keo jaun bura, ai mbo ombon jaun ene tunge erai kongo kati Pea Ulun diang erai topi pangkat ngket amas mbo utok-Iyo ai erai sabit takei mbo kayang-Iyo. ¹⁵ Jadi baling doko erai mlaekat yo mak ngket Bait Suci; ai io momba diang oyon ries epo Io yo tunge ombon jaun ene: "Ewis aut sabit-Ko ene ai utik ka, koe sundok sampe des-iyo nte ngutik; koe bua pnykulo mbo dnia sundok nsak." ¹⁶ Ai Io, yo tunge mbo ombon jaun ene, ngewis sabit-Iyo epo ombon dnia, jadi nutik doko dnia. ¹⁷ Ai erai kongo mlaekat yo mak baling ngket Bait Suci yo mbo sorga; mbo-iyo keo low sabit takei. ¹⁸ Ai erai kongo mlaekat yo mak ulet ngket mezbah; io keo kuasa nte ngatur api ai io nyntongau diang oyon ries epo mlaekat yo ngop sabit takei ene, ulek-iyo: "Ewis ka aut sabit takei ko ene ai totok bua-bua anggur mbo dnia, koe bua-iyo sundok nsak." ¹⁹ Laju mlaekat ene ngewis sabit-iyo epo ombon dnia, ai notok bua tonga anggur mbo snia ai nurak-iyo epo lang pmia olai, yo doko mara roa Allah. ²⁰ Ai bua-bua anggur ene pnia ela baling se kota jadi ngket pmia ene smalir daya, kombo-iyo sampe mbo tali pngatur dalan kuda ai koro-iyo tolu jatus kilu.