¹ Beta ka janji yo tla lou keo aturan-aturan nte sembayang ai nte awa kudus tampa ulun. ² Koe keo neraduh kemah, yoene yo awa la ono tingen ai mbo mne keo awa lowu pelita ai meja diang roti nte persembahan epo Allah. Awa endo nulek awa yo kudus. ³ La sorin dinding diris keduo keo kemah nua yo nulek awaiyo paling kudus. ⁴ Mbo mne keo perapen amas awa nuna jombu, ai peti awa janji, yo snalut knukup diang amas; mbo lang peti janji ene bekona jebul amas batok manna, goloy Harun yo pini kesuli ai bis-bis batu yo betulis janji, ⁵ ai mbo ombon ene keo nukir duo mlekat penjaga yo nyelingu tokom pendamai. Tapi nau umbang endo belo dapet kesah taka tmpo ndo diang sara titip buntip. ⁶ Ktine ka doko saraiyo awa kudus ene natur. Jadi imam-imam dor sumba epo lang kemah yo paling ono tingen ene nte ngelaku sembayang dero, ⁷ tapi epo lang kemah yo keduo pulun Imam Olai tingen yo sumba sindai lang erai taon, ai arus diang daya yo pndiye io koe io se ai koe pensala-pensala yo gawi umatiyo diang koe belo di tau. ⁸ Diang endo Roh Kudus mekelak, se boyan epo awa yo kudus ene belo pian wingkang, kola-kola kemah yo tla ene aso keo. ⁹ Ene doko pemerawet des jman tmpo ndo. sengkono diang ene deniye korban ai pendiye yo belo kuli nyempurna dero yo miye korban ene ngaya pengenanam lang kesong dero, ¹⁰ koe ekaiyo ene, kati okan singkap danum dawen ai bemasam bui bunjur, ene pulun nte aturan-aturan bolum mbo denia endo, yo pulun penakai sampe des ulet jman penembayu. ¹¹ Tapi Kristus sundok ulet jadi Imam Olai nte nau umbang yo buen yo anta ulet: Io sundok ngelalo kemah yo pawak olai ai yo bol sempurna, yo makse di tampa ulun, - retiiyo belo di sumba yo tenampa endo,- ¹² ai Io sundok sumba sindai nte turai-turai epo lang awa yo kudus makse diang moit daya domba yo song ai daya anak lembu, tapi diang moit daya-Iyo se. Ai diang ene Io sundok kuli losu lopos yo kden. ¹³ Koe, ena daya domba yo song ai daya lembu yo song ai temprik abu lembu burok mekudus dero yo lonsa, apa kompu tonga dero bnerse, ¹⁴ pawak da se ene daya Kristus yo koe Roh yo kden sundok miye kompu tonga-Iyo se epo Allah jadi pendiye yo belo keo bila molon, anta merse kesong ai pengenanam taka ngket gawi gata taka yo belo tadah, apa taka kuli sembayang epo Allah yo bolum. ¹⁵ Koe ene Io yodoko Pengetete ngket janji yo bayu, apa dero yo sundok benomba kuli bagi yo kden yo jenanji ene, koe Io sundok mate nte nous pensala-pensala yo sundok nelaku kola-kola janji yo des tla. ¹⁶ Koe mbo mone keo penape, mbo mne arus pinotau nau umbang pengenate penampa penape ene. ¹⁷ Koe penape ene bayu nangkan beta ena penampa penape ene sundok mate, koe io belo di penakai, kola-kola penampa penape ene aso bolum. ¹⁸ Koe ene ka doko, moko janji yo tla belo di nangkan beta ena belo di keo daya. ¹⁹ Koe des sundok Musa mmtau eka-eka prenta aturan Taurat epo pupus umat, io ngalek daya anak lembu ai daya domba song diang danum, ai bulu mea ai hisop, laju nemprik kitab ene se ai eka umat, ²⁰ ulak ngulek: "Endo doko daya janji yo tnetap koe Allah nte ngkam." ²¹ Ai low kemah ai eka kakas nte sembayang temprik iyo ktine ba diang daya. ²² Ai alang eka ise masam binorese ngaya aturan Taurat diang daya, ai ena belo keo pembaling daya belo keo ampun. ²³ Jadi eka ise masam yo sama nau diang ise yo keo mbo sorga arus binorese diang sara ktine, tapi kakas surgawi se koe pendie-pendie yo pawak buen se ene. ²⁴ Koe Kristus mba di sumba epo lang awa kudus tanpa ulun yo pulun sama nau tingen ngket yo beta-betaiyo, tapi epo lang sorga se nte ngadap onon Allah jodoiyo nte taka. ²⁵ Ai Io mba di sumba nte bjuli-juli mie kompu -Iyo se, kati Imam Olay tongku taun sumba epo lang awa kudus diang daya yo makse daya iyo se. ²⁶ Koe ena ktine Io arus bjuli-juli kiso kanam sesa ngket dnia endo tnampa. Tapi tempo ndo Io pulun sindai bute mkelak kompu-Iyo, des jman pngabis nte moding mrese dosa koe korban-Iyo. ²⁷ Ai sama kati ulun tnetap nte mate pulun sindai bute, ai sundok ene pnutus koe Allah, ²⁸ ktine low Kristus pulun sindai bute ngorban-Iyo se nte nanggung dosa ulun deo. Sundok ene Io anta mkelak kompu-Iyo sindai nua belo di diang nanggung dosa nte mie slamat epo dero, yo minte Io.