¹ Otang otang eka-eka yo kesah taka ene io doko: taka keo Imam Olai yo ktine, yo tunge mbo tadah sanan pnunge Yo Paling Olai mbo sorga, ² ai yo nglayan ibadah mbo awa kudus, io ene mbo lang kemah yo beta-beta, yo tngkuat koe Tuhan ai makse koe ulun. ³ Koe tongku Imam Olai pinotoko nte mie korban ai persembahan ai koe ene Yesus perlu keo ise masam nte die. ⁴ Ena ka Io mbo dnia endo, Io sama skali belo anta jadi imam, koe mbo mndo sundok keo ulun-ulun yo mie persembahan ngaya aturan Taurat. ⁵ Pelayanan dero ene doko kedo ai amba ngket ise yo keo mbo sorga, sama kati yo nulek epo Musa, des io kakan nengkuat kemah: " Knenop ta, " ktine firman-Iyo, " se ikam nampa eka ene ngaya sontoh yo sundok pinokelak epo ikam mbo ombon tunten ene." ⁶ Tapi tmpondo Io sundok kuli ise masam pelayanan yo pawak aso buen beta, koe Io jadi Pngekang ngket janji yo pawak mulia, yo pnayak ombon janji yo pawak ombo. ⁷ Koe, ena perjanjian yo tela ene belo keo bila molon, belo anta dineto nua awa nte yo kduo. ⁸ Koe Io ngae dero des Io ngulek: "Se beta-beta iyo, anta ulet des iyo, " ktine ka doko firman Tuhan, "Aku anta mkeo janji bayu diang ulun Israel ai diang ulun Yehuda, ⁹ makse kati janji yo sundok pkeo Ku diang itak kakah dero, des aku ngop kayang dero nte moit dero baling ngket tana Mesir. Koe dero belo setia epo janji-Ku, ai Aku nolak dero, " ktine firman Tuhan. ¹¹ Ai dero belo anta nutui matuk sama dero se, ktine lou sama erai buntung dero se diang ngulek: Tau ka se Tuhan! Koe dero eka-eka, burok tuo, anta tau se Aku. ¹² Koe Aku anta kosang epo pnsala dero ai belo oli ngeno dosa-dosa dero."