¹ Koe Melkisedek ene raja Salem ai imam Allah Yo Paling Ombo; io malan nyeruku Abraham des Abraham uli ngket mekalah raja-raja ai miye berkat epo io. ² Epoiyo doko Abraham miye perpuluhan ngket eka ene. Ngaya arti karaniyo Melkisedek ene tla-tla raja yo beta, ai low raja Salem, yoene raja damai sejahtera. ³ Io belo keo ine uma, belo keo upus, oloiyo belo keo penindu ai bolumiyo belo keo penyundok, ai koe io tenampa sama diang Pea Allah, io nokon jadi imam sampe turai-turai. ⁴ Kenanam beta-beta bukan main kolaiiyo ulun ene, yo epoiyo Abraham, bapa buyut alow taka, miye perpuluhan ngket eka barang nerampas yo paling buen. ⁵ Ai dero ngket pea-pea Lewi, yo nrima pangkat imam, kuli tugas, ngaya aturan Taurat, nte nentu perpuluhan ngket ulun Israel, yodoko ngket erai buntung-erai buntung dero, beta ko dero endo low upus Abraham. ⁶ Tapi Melkisedek makse upus dero, nentu perpuluhan ngket Abraham ai miye berkat epo io, padahal io ene mpun janji. ⁷ Memang belo dapet tengkilah, se yo paling iwa deniye berkat koe yo paling ombo. ⁸ ai mbo mendo ulun-ulun tau mate nerima perpuluhan, ai mbo lane Io, yo nau umbang Io deniye penyurah, se Io bolum. ⁹ Jadi dapet ulek, se tete Abraham tenentu low perpuluhan ngket Lewi, yo keo hak nerima perpuluhan, ¹⁰ koe io aso keo lang kompu uma buyut alowiyo, des Melkisedek nyeruku uma buyut alowiyo ene. ¹¹ Koe ene, ena ka koe imamat Lewi sundok kerapet yo sempurna - koe imamat ene ulun Israel sundok nerima Taurat - ise moko aso perlu ulun yo mak pinotoko nte jadi imam olai ngaya aturan Melkisedek ai yo nau umbang io mba di nulek ngaya aturan Harun? ¹² Koe, ena imamat wensut, wensut low aturan Taurat ene. ¹³ Koe Io, yo pinotua mbo mndo, ngket suku yo mak; ngket suku endo ndok belo keo erai kongo yo pini ngelayan mbo mezbah. ¹⁴ Koe eka ulun sundok tau, se Tuhan taka ulet ngket suku Yehuda ai nau umbang suku ene Musa belo pini ngulek ise-ise nau umbang imam-imam. ¹⁵ Ai nau umbang ene mokin melak aso, ena pinotoko imam yo mak kati sara Melkisedek, ¹⁶ yo jadi imam mbadi kati aturan-aturan ulun, tapi kati nau umbang bolum yo belo di tau mate. ¹⁷ Koe nau umbang Io deniye penyurah: "Iko ene doko Imam nte turai-turai, ngaya aturan Melkisedek." ¹⁸ Memang aturan yo tinombaling yo ono ene pinokore, ena aturan ene belo keo keturon ai koe ene belo di keo jodo, ¹⁹ - koe aturan Taurat sama skali belo moit nte sempurna - tapi tmpondo noret nte kundong yo pawak buen, yo medmpet taka epo Allah. ²⁰ Ai sama kati nau umbang endo belo di jadi na belo diang sumpah - memang dero sundok jadi imam belo makai sumpah, ²¹ tapi Io diang sumpah, nulek koe Io yo befirman epoIyo: " Tuhan sundok besumpah ai Io belo di anta noli: Iko ene doko Imam nte turai-turai" - ²² Ktine low Yesus ene doko nte jaminan ngket janji yo pawak turon. ²³ Ai dero deo beta jadi imam aut koe dero nusan koe maut nte nokon ngnjabat imam. ²⁴ Tapi, koe Io nokon turai-turai, imamat-Iyo belo di dapet ensut epo ulun yo mak. ²⁵ Koe ene Io kelian low nyelamat diang sempurna eka ulun yo koe Io ulet epo Allah. Koe Io bolum dor nte jadi Pengekang dero. ²⁶ Koe Imam Olai yo ktine doko yo taka perlu: yodoko yo kudus, belo keo sala, belo lonsa, yo tenggang ngket ulun-ulun bedosa ai pawak ombo se sentah-sentah sorga, ²⁷ yo belo di kati imam-imam olai yo mak, yo tongku olo arus miye korban nte dosaiyo se ai sundok ene bayu nte dosa umatiyo, koe nau umbang ene sundok gawi-Iyo sindai bute nte turai-turai, des Io miye kompu tonga-Iyo se nte korban ²⁸ Koe aturan Taurat metoko ulun-ulun yo jut belo kuat kalu nte jadi Imam Olai, tapi sumpah, yo nulek sori se aturan Taurat, metoko Pea, yo sundok jadi sempurna sampe kden.