¹ Koe ene alo taka nape tondal-tondal tla tutuy batuk ngket tutuy batuk nau umbang Kristus ai wensut epo pmenduan yo bol-bol nau. Nang taka aso mayak tondal tobat ngket gawi gata yo belo keo jodo, ai tondal kpercaya epo Allah, ² yo ene nau umbang tutuy batuk bmasam baptisan, mayak kayang onbon ulun, pngenyuli ulun-ulun mate ai ukuman kden. ³ Ai ene ka doko yo nte taka gawi, ena Allah ngijiniyo. ⁴ Koe dero yo pini pinotrang kesongiyo, yo pini kiso kanam karunia ngket sorga, ai yo pini kuli bagi lang Roh Kudus, ⁵ ai yo kiso kanam firman yo buen ngket Allah ai karunia-karunia dnia yo anta ulet, ⁶ tapi yo ptempeling nua, belo anta di tinom bayu nua oli, sampe dero btobat, koe dero nyalib nua Pea Allah nte dero se ai nguja-Iyo mbo onon wae ulun deo. ^{8 7} Koe tana yo ngresap danum uran yo jono mitek mne, ai yo ngasil pnyekulo-pnyekulo yo keo jodo nte dero yo nggawiiyo, nrima berkat ngket Allah; tapi ena mbo tana ene moti dikut ruot ai kdui, io belo dikeo jodo ai sundok dempet nte oding, yo snundok diang tnuna. ⁹ Tapi, o erai buntung-erai buntung yo tengkosangku, beta ko kain bsara ktine nau umbang ikam, kain percaya, se ikam keo ise-ise yo aso buen, yo batok slamat. ¹⁰ Koe Allah mba di belo adil, sampe Io tlengo gawi gata kam ai kosang kam yo pkelak kam nte karan-Iyo koe playanan kam epo ulun-ulun kudus, yo aso gawi kam sampe tempo ndo. ¹¹ Tapi kain kakan, apa tongku-tongku ikam mkelak se sama-sama beta bkomer nte nampa ise yo kundong kam ene jadi pengkeo yo pasti, ndok sampe pngabisiyo, ¹² apa ikam nang jadi menggoyor, tapi jadi yo ngaya dero yo koe iman ai kdoloh kuli bagi lang yo janji Allah. ¹³ Koe des Allah mie janji-Iyo epo Abraham, Io bsumpah epo-Iyo se, koe mba di keo ulun yo ombo aso se-Iyo, ¹⁴ ulek-Iyo: "Beta-beta yo Aku anta mie iko berkat ruak ruaw ai nampa iko jadi deo beta." ¹⁵ Abraham minte diang doloh ai diang ktine io kuli ise yo jnanji epoiyo. ¹⁶ Koe ulun bsumpah diang ulun yo pawak ombo, ai sumpah ene jadi pemeturon nte iyo, yo mkabis eka salotuing. ¹⁷ Koe ene, nte nampa ktambah kpersaya dero yo keo hak nrima janji ene se kptusan Iyo ene pasti, Allah sundok nyiret Iyo se diang sumpah, ¹⁸ apa koe duo nau umbang yo belo di wensut nau, nau umbang mone Allah belo di anta nampa eta, taka yo meto awa bselingu ngket bahaya, kuli pengkakan yo mroa nte nyrapet yo knundong yo bpayak mbo onon taka. ¹⁹ Pngundong ene yo doko saoh yo turon ai belo di bahaya nte bolum taka, yo sundok pnotak sampe ela sorin tabir, ²⁰ ela mone Yesus sundok sumba jadi Pnyentaris nte taka, des Io, kati aturan Melkisedek, jadi Imam Olay sampe turai-turaiiyo.