¹ Koe tongku imam olai, yo pnili ngket ekang ulun, yo pinotoko nte ulun lang ubungan dero epo Allah, apa io mie nyokoi persembahan ai korban koe dosa. ² Io arus tau lou ulun-ulun yo gonsa ai ulun-ulun yo tang, koe io se bol belo keo bkaya koe dosa, ³ yo belo kate belo nte mie nyokoi korban koe dosa, belo di nte umat tingen, tapi nte yo se lou. ⁴ Ai ndok belo erai kongo ulun ngomer knuon ene nte yo se, tapi bnomba nte ene koe Allah, kati umbang io sundok terjadi epo Harun. ⁵ Ketine lou Kristus belo di ngmulia Iyo se diang jadi Imam Olai, tapi kinomulia koe Io yo befirman epo-Iyo: "Pea-Ku Iko! Iko sundok tmpea Ku des olo ndo", ⁷ Lang bolum Iyo kati ulun, yo sundok mie doa ai pnindu diang tangis tungul ai ngeluh epo Iyo, yo klian nylamat Iyo ngket maot, ai koe kpatoh-Iyo Io sundok tinompaning. ⁸ Ai betako Io ene Pea, Io sundok bguru jadi patoh ngket ise yo sundok nengkono-Iyo, ⁹ ai des Io sundok krapet smpurna-Iyo, Io jadi tondal slamat yo kden nte eka-eka ulun yo patoh epo-Iyo, ¹⁰ ai yo bnomba jadi Imam Olai koe Allah, ngaya aturan Melkisedek. ¹¹ Nau umbang ene deo yo arus kesah kain, tapi yo poyo nte pjelas, koe ikam sundok dodong nte ngringo. ¹² Koe beta ko ikam, ena neti mbo kola, sundok arus jadi pnutui batuk, ikam nokon aso perlu tnutui bnatuk tindu dondal firman Allah, ai ikam nokon perlu susu, makse okan yo koroi. ¹³ Koe ise-ise nokon perlu susu io belo paham nau umbang tutui batuk yo kono, koe yo ene doko pea alus. ¹⁴ Tapi pngokan yo koroi ene nte ulun-ulun tuo, yo koe keo akal tepet yo tau ngmbeda dat ai buen.