¹ Koe ene, buen ka taka bjaga, apa nang keo ulun mbo ekang ikam yo nontus totak, betako janji anta sumba epo lang penongos yo-Iyo aso engau. ² Koe epo taka knabar low kabar ego sama kati epo dero, tapi firman kabar ene belo keo jodo nte dero, koe belo moti sama-sama diang ke iman diang dero yo kringo iyo. ³ Koe taka yo keo iman, anta sumba epo awa penongos kati yo Io nulek: "Sampe Aku bsumpah lang kmara -Ku: Dero belo anta sumba epo awa penongos-Ku, "betako gawi gata-Iyo sundok aut ngket des dnia tnampa. ⁴ Koe nau umbang olo ke turu kono nulek mbo lang nas: "Ai Allah smole des olo ke turu ngke eka-eka gawi gata-Iyo." ⁵ Ai lang nas ene taka ngbasa: "Dero belo anta sumba epo awa penongos-Ku." ⁶ Jadi sundok melak beta, se keo deo jud ulun anta sumba epo awa penongos ene, padahal dero yo epo iyo ono ube snampe kabar buen ene, belo di sumba koe dero belo patoh. ⁷ Koe ene Io metoko nua olo, yo ene "olo ndo" ,des Io sundok kola ndo jati nyampe firman diang tete' Daud kati nulek ela ombo: "Des olo ndo, ena ikam ngringo oyon-Iyo, nang mekoroi kesong kam!" ⁸ Koe, ena ka yo Yosua sundok moit dero sumba epo awa penyemole, pasti Allah belo anta keo ulek sundok se ene nau umbang olo yo mak. ⁹ Jadi aso keo sinodia erai olo penyemole, olo ke turu, nte umat Allah. ¹⁰ Koe ise yo sundok sumba epo awa penyemole-Iyo, io se sundok sdang ngket eka-eka gawi gata iyo, sama kati Allah sdang ngket gawi gata-Iyo. ¹¹ Koe ene alo ka taka bkomer nte sumba epo lang penyemole ene, apa nang keo ndok erai kongo ulun yo toyak koe nyarak nau yo belo patoh ene low. ¹² Koe firman Allah bolum ai turon ai pawak takei se mendau bdaro duo mone ka; io nowok dalom beta sampe memetenggang kesong ai roh, bruku tulang ai dalu lang tulang; koe ene io tau sampe dalom bata lang kno ai pngnanam taka. ¹³ Ai mba di keo liu ise ka yo bolum yo melim ela onon-Iyo, koe eka ise masam ene melak ba ai wengau mbo onon mato Io, yo epo-Iyo taka arus miye tanggung jawab. ¹⁴ Koe taka tempondo keo Imam Paling Olai, yo sundok nompe eka-eka langit, yo ene Yesus, Pea Allah, alo ka taka turon sgop epo iman yo mpun taka. ¹⁵ Koe Imam Olai yo mpun taka, makse imam olai yo belo di lumpat kiso kanam pmbelomana taka, mokin ube Io sama diang taka, Io sundok nikap, suma Io belo di nampa dosa. ¹⁶ Koe ene alo taka diang bol pengeronu ngompoh epo dmpet awa kasih karunia, apa taka nrima Rahmat ai ngruku kasih karunia nte ngawat taka montuk des jman yo.