¹ Koe ene, o eraibuntung-eraibuntung yo kudus, yo sama kuli bagi lang bomba sorga, neti beta epo Rasul ai Imam Olai yo angkan taka, yo ene Yesus, ² yo stia epo Io yo sundok netap-Iyo, kati Musa low stia lang eka atok lou-Iyo. ³ Koe Io nte eti se sengkono nte kuli kmulia pawak olai aso se Musa, sama kati tukang nampa lou aso pawak kinonuon se lou yo tampa-iyo. ⁴ Koe tongku lou tnampa koe tukang nampa lou, tapi tukang nampa eka ise masam ene doko Allah. ⁵ Kati Musa memang stia lang eka atok lou Allah jadi playan nte mie pnyurah nau umbang ise yo anta snampe sundok ene, ⁶ tapi Kristus yo stia ene Pea yo jadi pngutok lou-Iyo; ai lou-Iyo ene doko taka, ena taka sampe pnyundok iyo turon sgop mbo persaya ai kundong yo tondek taka. ⁷ Koe ene, kati yo ulek Roh Kudus: "Montuk olo ndo, ena ikam ngringo oyon-Iyo, ⁸ nang beta mkoroi kesong kam kati lang ngriten montuk snoba mbo padang gurun, ⁹ mbo mone itak kakah kam nyoba Aku diang sara nguji Aku, betako dero kito gawi gata-Ku, opat pulu taun kola iyo. ¹⁰ Koe ene ka doko Aku mara beta epo pokan ene, ai ngulek: Dor dero tang kno, ai dero belo tau boyan-Ku, ¹¹ sampe Aku bsumpah lang kmara-Ku: Dero belo anta sumba epo awa Ku nongos". ¹² Jaga beta-beta, o eraibuntung-eraibuntung, apa ngket ikam nang keo ulun yo triaw kno iyo ai yo belo prsaya koe yo bdempeling ngket Allah yo bolum. ¹³ Tapi bako nasehat ka diang erai-erai tongku olo, kola-kola aso dapet ulek "olo ndo", apa nang keo ngket ikam yo jadi dadal kesong iyo koe kono akal dosa. ¹⁴ Koe taka sundok kuli bagian mbo lang Kristus, yo paling penting taka turon skongkong sampe pnyundok iyo mbo kpersaya iman taka yo ngket tla. ¹⁵ Tapi ena pini nulek: "Montuk olo ndo, ena ikam ngringo oyon-Iyo, nang beta dadal kesong kam kati lang ngriten", ¹⁶ ise ka dero yo ngati mara Allah, beta ko dero kringo oyon-Iyo? Makse be eka dero yo baling ngket Mesir la iwat pimpinan Musa? ¹⁷ Ai ise ka yo kmara Io opat pulu taun kola iyo? Makse be dero yo nggawi dosa ai yo antu dero ngregaleng mbo padang gurun. ¹⁸ Ai ise ulun yo sundok pator sumpah Io, se dero belo anta di sumba epo awa pnongos-Iyo? Makse be dero yo belo di patoh? ¹⁹ Ktine ka doko itan taka, se dero belo di kuli sumba koe dero belo di persaya.