¹ Koe taka deo saksi yo ka kati jaun yo nglekum taka, ale taka ngloas eka pnyekoit yo nte nengkoyat ai dosa yo kola ndo mombong taka. Ai buket bako awet lang bako awet yo arus gawi taka memang. ² Alo taka nggawi iyo diang mato yo btadah epo Yesus, yo ngayak taka lang iman, ai yo moit iman taka ene jadi bol kbuen, yo diang belo nyanda se nte uja, buket ngoson salip nte nganti kego yo sinodia nte Io, yo tempondo tunge ela tadah sanan Allah. ³ Nang beta ikam kewot se-Io, Io yo buket nte kiso kanam kono lawan kdras ene mitek Io ngket tadah ulun-ulun bdosa, apa ikam nang jadi loma ai pungen. ⁴ Koe lang kokes komer kam nglawan dosa belo pian ikam sampe baling daya. ⁵ Ai sudok kewot be ikam se tutui batuk epo ikam kati tutui batuk bang tuo epo bang pea: "o pea-pea ku, nang ikam nau-nau diang tutui batuk Tuhan, ai nang ikam pungen ena ikam tnge-Iyo; ⁶ koe Tuhan nokai tongku ulun yo tngkosang-Iyo, ai Io ngrempuk tongku ulun yo angkan-Iyo se pea-Iyo." ⁷ Moko yo ikam trima ka diang rempuk ngket Allah anggap kam ka kati mpes ngket uma kam. Koe pini be keo pea yo belo pini kono mpes uma iyo? ⁸ Ena ikam belo lumpat kono tokai kati pea yo mak, ene rti yo ikam makse se pea-Iyo memang. ⁹ Ktine low kati taka keo uma mbo dnia endo. Io ngae ngo taka, ai taka ngnuon se io. Ne doko, ise aso diang Bapa rohani taka yo mbo sorga, arus yo taka bet-bet aso aya oyot diang-Iyo apa taka bolum. ¹⁰ Ulun tuo taka yo mbo dnia endo nutui matuk taka keo jepan yo idok montuk sampe yo sngkono san dero. Tapi Allah ngae ngo taka nte taka se apa buen, apa taka kuli bagian lang kekudus-Iyo. ¹¹ Memang ka des taka kono kae ko ene, itek pngmara ai mpes ene belo di buen kanam yo nte taka knanam, makse ko nte nampa taka dat pngnanam tingen. Tapi oli ngket ene, nte taka yo sundok kono kae ko ene, itek mara ai mpes ene nampa taka bolum kati ptua Allah, ai mkulet kanam buen mbo taka. ¹² Koe ene, pgalak tangan kam yo lome ai bokut kam yo ngrkluk ene! ¹³ Malan ka dor mbo boyan yo belo gelut gensung, apa botis kam yo pengkal ene belo blesou, tapi ube jadi ale. ¹⁴ Bkomer ka apa dor bolum nyung diang eka ulun. Bkomer low apa nte bolum Kudus, toko nte Tuhan. Koe ndok belo erai kongo ulun kuli kito Tuhan ena belo bolum kudus. ¹⁵ Jaga kam beta-beta nang sampe ndok erai kongo ulun oro se kasih karunia Allah, apa nang keo yo kati kayu tau nte ngmelu ela ekang-ekang ikam yo tau nte nampa ikam pae ai mesesa deo ulun melu koe iyo. ¹⁶ Jaga kam apa nang keo ulun yo bolum ngmoen pokeng, diang nang kati ulun-ulun yo keo kno belo kroan kati Esau, yo ngnjual mpun pngkeo pea tuo tingen nte erai ktowong pnykokan. ¹⁷ Ikam tau se Esau ene oli kakan se brkat ene ngket uma iyo, tapi io belo tinorima. Koe beta ko diang nangis nungul io meto sara nte nungkuen pnsala iyo, boyan nte ene belo dikeo oli. ¹⁸ Eraibuntung-eraibuntung taka belo di ngadap kati umbang yo adap bangsa Israel bai bareh. Dero ngadap ise yo dapet bulem, yo ene tunden sinai diang keo api yo dolan; dero ngadap seom, ngelepting diang brubu; ¹⁹ dero ngadap oyon temburi, diang oyon pirman. Des ulun-ulun Israel kringo oyon ene, dero tindu beta-beta apa oyon ene sdang oli bsara epo dero. ²⁰ Keo dero belo klian kringo prenta yo ulet ngket oyon ene. Koe oyon ene ngulek, "Eka yo mulem tunden ene, belo nyanda tontan korik-kotok be ise ka, arus tnimpa diang batu ndok mate." ²¹ Ise yo itan ulun-ulun Israel ene deras beta sampe Musa ngulek, "Aku takut ulak kanam ngrkitik beta!" ²² Mokin ka ube, ikam sundok ulet epo tunden Sion ai kota Allah yo bolum, yo ene Yerusalem sorga diang bribu mlekat iyo. ²³ Ikam lumpat mbo awa mangkoruku yo rame, mangkoruku jut pea-pea Allah tuo tingen, yo karan-karan iyo keo tnulis lang sorga. Ikam ulet ngadap Allah, Akim nte eka ulun. Ikam ngadap roh-roh ulun yo kono, yo sundok pinojadi smpurna. ²⁴ Ikam ulet ngadap Yesus, Pmetete janji yo bayu ene; ikam ngadap tmperik daya yo ngnjamin umbang yo pawak aso buen se yo jnamin koe daya Habel. ²⁵ Keo ene, jaga-jaga ikam nang sampe ikam belo kakan nrima Io yo bsara ene. Koe ena dero yo belo kakan nrima Io yo ulet epo dnia endo ai nyampe kabar ngket Allah, belo anta kuli buyo. Aso da taka endo yo kringo Io bsara ngket sorga! Ena taka belo kakan nempaning-Iyo, belo anta taka kate lopos! ²⁶ Des jman ene oyon-Iyo nampa dnia skukui. Tapi tempondo Io keo janji, "Sindai nua, Aku anta kakan ngukui lngkat se dnia tingen tapi ndok langit low." ²⁷ Pngesah "sindai nua" ene mkelak se pupus dnia yo sundok tnampa ene anta knukui ai kakan neloli, apa yo toro pulun iyo yo belo tau skukui. ²⁸ Koe ene, moko yo taka bsukur beta epo Allah, koe taka kuli ngket Io Krajaan yo belo tau skukui. Moko yo taka bsukur ai nglaku ibadat epo Allah diang hormat ai takut, kati umbang yo ptua-Iyo se. ²⁹ Keo Allah taka kati api yo tau msia.