¹ Nang dnikah bako kosang diang erai buntung ene! ² Nang ka ikam kewot mie awa singgah smole epo ulun, koe diang gawi ktine keo ulun yo kolan-kolan se sundok nrima mlekat. ³ Knonop ka se ulun-ulun yo nukum, koe ikam se low doko ulun-ulun nukum. Ai knop ka epo ulun-ulun yo kono gnonsa koe ulun-ulun yo keo kuasa, koe ikam se low aso bolum mbo dnia endo. ⁴ Moko iyo ikam bol ngnuon epo pngempanan ai nang ka ikam ngremis awa pnurui, koe ulun-ulun lonte ai pokeng anta ukum Allah ⁵ Nang ka ikam jadi batak pitis sen ai puli ka diang yo keo mbo ikam. Koe Allah sundok keo firman: "Aku belo anta di belo nyanda se ikam ai Aku belo anta ngendikah ikam." ⁶ Koe ene diang percaya taka kuli ngulek: "Tuhan ene doko Pngawatku. Aku belo anta takut. Ise yo dapet gawi ulun epo Aku?" ⁷ Knop ka diang pngutok-pngutok kam, yo sundok nyampe firman Allah epo ikam. Eti ka nau pnyundok bolum dero ai snarak ka nau iman dero. ⁸ Yesus Kristus nokon sama, ngket pre ndok olo ndo sampe turai-turai. ⁹ Nang ka ikam pinoketang koe tutui batuk ngket baling. Koe yo buen yo doko, se kesong kam pinoturon diang kasih karunia ai mba di diang bmasam okan kinan yo mba di keo jodo nte dero yo ngaya aturan-aturan okan kinan masam ene. ¹⁰ Taka keo awa korban ai ulun-ulun yo ngurus kemah belo kate lumpat kuman yo ngket lang ne. ¹¹ Koe kompu korik-korik yo daya iyo noit sumba epo awa kudus koe Imam Olay nte korban ngloli dosa, tnuna baling se kemah. ¹² Ene low ka doko moko Yesus sundok snesa ela baling se jawong pagar nte mkudus umat-Iyo diang daya-Iyo se. ¹³ Koe ene alo taka malan ngompoh-Iyo ela baling se kemah ai nantai uja yo mitek-Iyo ene. ¹⁴ Koe mbo mendo taka belo keo awa nongos yo kden; taka meto kota yo anta ulet. ¹⁵ Koe ene alo taka, koe Io, dor mie korban sukur epo Allah, yo ene pnyurah yo ngmulia karan-Iyo. ¹⁶ Ai nang ka ikam kewot gawi buen ai mie bantuan, koe korban-korban yo ktine ka doko yo sengkono epo Allah. ¹⁷ Patoh ka epo pngutok-pngutok kam ai ngaya ka nte dero, koe dero ngenjaga diri nyawa kam, kati ulun-ulun yo arus nanggung ene. Diang ktine dero anta nggawi yo diang ego, mba di diang ngemamai, koe nau umbang ene belo di keo asil iyo nte ngkam. ¹⁸ Bdoa ka dor nte kain; koe kain percaya, se pngenanam kesong kain buen, koe lang ise masam nau umbang kain kakan nau bolum yo buen. ¹⁹ Ai diang sara pinotoko aku matuk ikam, apa ikam nglakuiyo, apa aku resi tinompuli epo ikam. ²⁰ Jadi Allah damai sjahtra, yo koe daya janji yo kden sundok noit nua ngket ekang ulun mate Pngamu Yo Paling Ombo eka-eka domba, yo ene Yesus, Tuhan taka, ²¹ mokoiyo nglengkap ikam diang eka-eka yo buen nte nglaku pengkakan-Iyo, ai nggawi mbo lang taka ise yo sengkono epo-Iyo, koe Yesus Kristus. Nte Io doko kmulia sampe turai-turai! Amin. ²² Ai aku matuk ikam, erai buntung-erai buntung, apa otang batuk endo trima kam diang kesong rela, beta ko idok tingen surat ku endo epo ikam. ²³ Apa tau, se Timotius , erai buntung taka, sundok malan. Peles des io sundok ulet, aku anta nuntun ikam sama-sama diang io. ²⁴ Snampe salam epo eka pngutok kam ai eka-eka ulun kudus. Tinorima salam ngket erai buntung-erai buntung mbo Italia. ²⁵ Kasih karunia sama-sama diang ikam eka-eka.