¹ Iman ene doko tondal ngket eka ise masam yo kundong taka ai bukti ngket eka ise masam yo belo di itan taka. ² Koe iman doko sundok dnie ksaksian epo itak kakah taka. ³ Koe iman taka paham, se dnia sundok tnampa koe firman Allah, sampe ise yo itan taka sundok tnampa ngket ise yo belo di melak. ⁵ Koe iman Henokh rengkat, apa io belo kiso kanam mate, ai io belo di nruku, koe Allah sundok ngengkat-iyo. Koe onon io rengkat, io kuli ksaksian, se io sngkono mbo kesong Allah. ⁶ Tapi ena belo keo iman belo anta ulun sngkono mbo kesong Allah. Koe ise-ise ulun yo skuleng epo Allah, io arus prsaya se Allah keo, ai se Allah mie upa epo ulun yo beta-beta meto Io. ⁷ Koe iman, doko Nuh - diang tutui Allah nau umbang yo belo di pian melak - diang patoh ngraduh bahtra nte nylamat kluarga-iyo; ai koe iman ene io ngukum dnia, ai io pinotoko nte nrima yo kono, sngkono diang iman-iyo. ⁸ Koe iman Abraham patoh, des io bnomba nte jukat epo ja yo anta trima-iyo jadi tana psaka mpun-iyo, laju io jukat diang belo di tau epo awa pngitek io. ⁹ Koe iman io nongos mbo tana yo jnanji ene ungka-ungka makse mbo tana io se ai mbo mne io nongos mbo pondok diang Ishak ai Yakub, yo lumpat jadi prsisin jnanji yo erai ene. ¹⁰ Koe io minte-minte kota yo keo tondal, yo nrnsana ai tinongkuat koe Allah. ¹¹ Koe iman io low ai Sara kuli pngkate nte keo upus, beta ko umur dero lalo aut, koe io tau se Io, yo mie janji ene stia. ¹² Koe ene doko, jadi ngket erai kongo ulun, ulak ube ulun yo sundok pate pusuk, nyoret deo upus, kati bintong mbo langit ai kati krsik mbo isan tasik, yo belo di taro itung kdeo-iyo. ¹³ Lang iman eka dero endo sundok mate ulak jadi ulun-ulun yo belo di kuli ise yo jnanji ene, tapi yo kito tingen ngket oro ai nguai-nguai epo ene ai yo ngangkan, se dero ene ulun nyumba ai peri mbo dnia endo. ¹⁴ Koe dero yo ngulek ktine mkelak, se dero diang ngno beta meto danum tana. ¹⁵ Ai ena ka lang nau umbang ene dero knop se tana ngket pngulet dero bai, yo sundok dikah dero, dero keo pnympat nte uli epo lane. ¹⁶ Tapi tempo ndo dero ngno danum tana yo buen se ene, yo doko erai danum tana sorga. Koe ene Allah belo di mai nulek Allah dero, koe Io sundok nydia erai kota nte dero. ¹⁷ Koe iman doko Abraham, des io snoba, mie Ishak nte korban. Io, yo nrima janji ene, brela-rela mie nte korban pea-iyo yo tunggel ene, ¹⁸ betako epo io sundok nulek: "Upus yo ngket Ishak doko yo anta nulek upus ko". ¹⁹ Koe san io, se Allah keo kuasa nte nmbolum ulun-ulun tontan ngket ekang ulun mate. Ai ngket lane io ungka-ungka sundok nrima-iyo nua. ²⁰ Koe iman doko Ishak, ulak meti oro epo ono, mie berkat-iyo epo Yakub diang Esau. ²¹ Koe iman doko Yakub, montuk des nte io duni mate, mie berkat epo duo kongo pea Yusuf, laju nymbah ulak bsrmpo mbo utok goloi-iyo. ²² Koe iman doko Yusuf onon io ngabis kesong nyampe nau mbang pmbaling ulun-ulun Israel ai mie pesan nau umbang tulang-tulang-iyo. ²³ Koe iman doko Musa, sundok io kinomekus, nona kola tolu bulan koe ulun tuo-iyo, koe itan dero, se pea ene regok nau-iyo ai dero belo di takut se prenta raja. ²⁴ Koe iman doko Musa, des bujang mba di ganggu nulek pea putri Firaun, ²⁵ koe io gawal ube bolum bnasa diang umat Allah se nte ile-ile tingen kiso kanam bolum snang ngket dosa. ²⁶ San io ene triaw koe Kristus ene doko ktatau yo pawak olai se eka-eka pngkeo Mesir, koe pngeti-iyo tadah io epo upa. ²⁷ Koe iman doko io sundok ngndikah Mesir diang belo di takut epo pngmara raja. Io btahan sama kati io kito ise yo belo melak. ²⁸ Koe iman doko io nampa Paskah ai nmprik daya, apa pngmpate pea-pea tuo tingen ene nang nngkil dero. ²⁹ Koe iman doko dero sundok kentas Tasik Mea sama kati nglalo tana koreng, tapi ulun-ulun Mesir monsor, des dero nyoba low. ³⁰ Koe iman doko roros dinding kota Yerikho, des sundok kota ene kinoliling turu olo kola-iyo. ³¹ Koe iman doko Rahab, bawe lonte ene, belo di lumpat mate diang ulun-ulun triaw, koe io sundok nrima pngntori-pngntori ene diang buen. ³² Ai ise aso yo arus ulekku? Koe aku belo anta smpat, ena aku kakan nyrita nau umbang Gideon, Barak, Simson, Yefta, Daud diang Samuel ai deo nabi, ³³ yo koe iman sundok kuret nglawan krajaan-krajaan, nggawi yo kono, kuli ise yo jnanji, nokom bowa singa-singa, ³⁴ mlnsop api raya. Dero sundok lopos ngket daro mndau, sundok kuli pnggalak des kasa, sundok jadi galak des prang ai sundok mupuk malu sampe mundur buyo makat jut tntara musuh. ³⁵ Bawe-bawe sundok nrima ulun-ulun dero yo sundok mate, koe pinosuli. Tapi ulun-ulun yo mak belo di nyanda kompu tonga-iyo knurow ai belo kakan ena nutis, apa dero kuli pngnyuli yo tambah buen. ³⁶ Keo low yo knije ai knurow, sampe sniret ai pinosumba lang sper. ³⁷ Dero tnurak diang batu, knoyot diang grgaji, pnate diang mndaw; dero nyabu ulak makai upak domba ai upak bembe ulak ssa koe kurang kambit, kbnasa ai knurow knsa. ³⁸ Dnia endo belo di pantas nte dero. Dero nglsabu mbo padang gurun ai mbo tunden-tunden, lang liang-liang ai luang-luang ekang tunden. ³⁹ Ai eka dero belo di kuli yo jnanji ene, betako iman dero sundok mie epo dero ksaksian yo buen. ⁴⁰ Koe Allah sundok nydia yo aso buen ene nte taka, ena belo taka dero belo di kuli sampe epo smpurna.