¹ Apa taka beta-beta bebas, Kristus sundok ngembebas taka. Koe ene akatka turon ai nang kakan oli pnayak aturan iyo nengkoyat nte jadi batak. ² Se beta-beta iyo, aku, Paulus, ngulek epo ikam: ena ikam bkatep, Kristus belo beta keo jodo oli nte ngkam. ³ Sindai nua aku ngulek epo tongku ulun yo ngatep iyo se, se iyo arus nglaku eka aturan Taurat. ⁴ Ikam lopos ngket Kristus, ena ikam ngarap io kono mkoe aturan Taurat; ikam bolum la baling se kasih karunia. ⁵ Koe Roh bute, ai koe iman, taka minte yo kono yo arap taka. ⁶ Koe nte ulun-ulun yo keo mbo lang Kristus Yesus nau umbang bkatep ktine low belo bkatep belo keo artiiyo, pulun iman yo bgawi koe kasih. ⁷ Bune ikam bkomer beta-beta diang buen. Ise yo mombong-mombong ikam, sampe ikam belo ngaya yo kono oli? ⁸ Ptua nte belo ngayaiyo oli makse ulet ngket Io, yo momba ikam. ⁹ Idi-idi ka ragi kate mkombong tlepong lang awa pnggaru. ¹⁰ Lang Tuhan aku persaya nau umbang kam, se ikam belo keo pikiran yo mak se pikiran endo. Tapi ise-ise yo ngewewong ikam, io anta nanggung ukuman, ise ka io. ¹¹ Ai aso aku endo, erai buntung-erai buntung, ena aku nokon ngabar katep, ise moko aku nokon knurow lou? Koe ena ktine, salib mba di nte batu tutur oli. ¹² Alo ka dero yo ngasut ikam ene nylatak io se! ¹³ Erai buntung-erai buntung, betako ikam bnomba nte bebas. Tapi nang ka ikam kbebas ene jadi boyan nte bolum lang dosa, tapi kinon jeni erai-erai diang kasih. ¹⁴ Koe eka aturan Taurat sumba ba lang erai firman endo, yo ene: Tengkosang ka sama-sama ulun kati kompu tonga kam se!" ¹⁵ Tapi ena ikam salo kikit ai salo tolon, bjaga ta, apa nang ikam salo pate. ¹⁶ Ptuaku io doko: bolum ka koe Roh, jadi ikam belo anta ngaya pngkakan kompu tonga endo. ¹⁷ Koe pngkakan kompu tonga mangko bali diang pngkakan Roh ai pngkakan Roh mangkobali diang kompu tonga endo_koe duo-duo iyo belo nyung_sampe ikam tongku derang belo nglaku ise yo pngkakan kam. ¹⁸ Tapi ena ikam mie kompu kam pnimpin koe Roh, jadi ikam belo di bolum iwat aturan Taurat. ¹⁹ Gawi gata kompu tonga endo sundok melak, yo ene: tuju gawi pokeng, tuji gawi remis, pengkakan ngempu ba, ²⁰ nyembah uwok owuk,lemu amal, ruok rame, bako tulan, kesong sirik, tuju mara, nte io bute, tuju ngati, roh metenggang, ²¹ dat diang erai-erai, tuju mauk, ungan kuman nyingkap nyisa-nyisa ai iyo mak io. Nte eka ene aku mmkenop ikam_kati yo sundok gawi ku bune_se ise-ise ulun nglaku nau umbang yo ktine, io belo anta kuli awa lang Kerajaan Allah. ²² Tapi bua Roh io ene: kosang, ego, bolum damai, doloh, sawai, buen kesong, setia, ²³ lami lamai, ngentep pngenanam. Belo keo aturan yo belo sengkono diang nau umbang ene. ²⁴ Ise-ise ulun yo jadi mpun Kristus Yesus, io sundok nyalib kompu tonga io diang eka-eka pengkakan niras ai pengkakan io. ²⁵ Ena taka bolum koe Roh, alo bolum taka pimpin Roh lou, ²⁶ ai nangka taka tiras kakan kinonuon, nangka taka baku tantak ai datsan diang erai-erai.