¹ Erai buntung-erai buntung, ena ka keo ulun tinonoan nggawi yo sala, moko ikam yo rohani, arus mimpin ulun ene epo boyan yo kono lang roh lami lamai, ulak ngnjaga ikam se, apa ikam low nang kono snoba. ² Bako awat ka diang erai-erai! Ktine ka doko ikam megnap aturan Kristus. ³ Koe ena san ulun se io keo jodo, padahal io sama skali belo keo jodo, io nipu io se. ⁴ Alo ka tongku-tongku kongo ulun nguji gawi gataiyo se; jadi io kate nondek kito nauiyo se ai mba di meti nau ulun yo mak. ⁵ Koe tongku-tongku ulun anta moson penyekoitiyo se. ⁶ Ai buen ka io, yo nrima tutuy batuk lang Firman, magi eka ise masam yo keo mboiyo epo ulun yo nutuy matuk ene. ⁷ Nang tang! Allah belo di miye Io se binokeko. Koe ise yo bewet ulun, ene lou yo anta utikiyo. ⁸ Koe ise-ise ulun mewet lang kompu tongaiyo, io anta ngutik pengenate ngket kompu tongaiyo, tapi ise-ise ulun mewet lang Roh, io anta ngutik bolum yo kden ngket Roh ene. ⁹ Nang ka taka delan-delan nggawi yo buen, koe ena sundok ulet desiyo, taka anta ngutik, ena taka belo jadi lome. ¹⁰ Koe ene, kola aso keo des nte taka, alo taka nggawi yo buen epo eka-eka ulun, tapi yo ono tingen epo kowon-kowon taka kerai iman. ¹¹ Eti tah, ketimbe kolaiiyo huruf-huruf yo tulis ku epo ikam diang kayangku se. ¹² Dero yo diang sara yo melak gawal nondek dero se, dero doko yo bkomer maksa ikam nte bkatep, pulun diang petua, apa dero belo kono kurow kesa koe salib Kristus. ¹³ Koe dero yo ngatep dero se low, belo di nggawi aturan Taurat tapi dero nengkakan, apa ikam bkatep, apa dero kuli nondek ombon nau umbang kam yo melak. ¹⁴ Tapi aku sama skali belo kakan nondek, ena makse ko lang salib Tuhan taka Yesus Kristus, koe io bute dnia sundok snalip nte oki ai aku nte dnia. ¹⁵ Koe bkatep ktine low belo bkatep belo keo jodoiyo, tapi jadi tnampa bayu, ene doko yo keo jodoiyo. ¹⁶ Ai eka ulun, yo miye kompuiyo nte pimpin makai patokan endo, diwa ka moko yo damai sejahtera ai rahmat ombon dero ai ombon Israel mpun Allah. ¹⁷ Longon se ene nang ka keo ulin yo nyusah aku, koe mbo kompuku keo tanda-tanda mpun Kristus. ¹⁸ Kasih karunia Tuhan taka Yesus Kristus diang roh kam, erai buntung-erai buntung! Amin.