¹ Umbang yo ktindo: kola-kola ulun yo pngitek pnape ene belo pian sampe ktuo, kola ene io sama kati umbang nton ulun batak, beta ko sbeta iyo, io yo ngmpun eka pngkeo ene. ² Tapi io aso lang tentu ai asi ado ulun, sampe des ktuo yo montuk diang pnape uma iyo. ³ Ktine low taka: kola-kola taka belo pian sampe ktuo, taka tunduk low epo roh-roh dnia. ⁴ Tapi ena sundok sampe des iyo, Allah ngirim Pea-Iyo epo lang dnia, yo kinomekus ngket ulun bawe yo tunduk epo aturan torat. ⁵ Io knirim nte nous dero, yo tunduk epo aturan torat, apa taka tinorima jadi pea-pea Allah. ⁶ Koe ikam ene pea-pea Allah, Moko ene Allah sundok nymuyu Roh Pea-Iyo epo lang kesong taka, yo Roh yo ngulek, "o Abba, o Bapa!" ⁷ Jadi ikam makse ulun batak oli, makse ko Pea, moko ene ikam low jadi kuli ngmpun pnape ngket Allah. ⁸ Bai bareh, des ikam belo pian tau se Allah, diang ptua kam se ikam kakan nte jadi batak allah-allah yo sbeta iyo makse Allah. ⁹ Tapi tempo ndo ikam sundok tau se Allah, tapi montuk ube aso Allah yo tau se ikam. Ktimbe ikam kate kakan mulik nua epo roh-roh yo belo keo pnjapa ai kao? laju nymula nua diang ptua kam se kakan nte jadi batak roh-roh ene nua. ¹⁰ Ikam mtoko olo malom nte ngkam pkolai, mtoko bulan ai mtoko taun nte pkolai. ¹¹ Aku woring bahe-bahe poruk pgel ku nte ngkam ene, nte oki pae tingen belo keo jodo yo. ¹² Eraibuntung-eraibuntung, Aku tindu beta-beta apa ikam kati aku. Koe aku endo low sama kati ikam. Ikam belo keo nglaku ise ka yo sala epo aku. ¹³ Sndongun ena ikam kewot ise yo nampa aku tla-tla ngabar Injil ene epo ikam. Yo ene koe aku kroton. ¹⁴ Des jman ene ikam belo di panan kekoi epo aku, beta ko nau kompu tonga ku ene mroa nte ngkam knanam. Tapi ikam ube apo nrima aku kati nrima mlekat Allah, lngkat se ene sama kati nrima Kristus Yesus ene se. ¹⁵ Ikam ego beta jman ene, tapi mombe pngego kam ene tempondo? Aku tau se ikam jman ene ena mbo dapet gawi kam belo di soro nyungkit bigi mato kam se nte die epo aku. ¹⁶ Bahe ikam tempondo sundok ngotus se aku ene bali kam? Koe leka aku mkelak yo beta ai kono epo ikam? ¹⁷ Ulun-ulun yo mak ene diang buket meto ikam, tapi dero ene keo ptua belo buen. Dero ene pulun gawi ngomer nte mtenggang ikam ngket kain, apa ikam buket nyarak dero. ¹⁸ memang ka buen ena ulun ene buket ngayak nte lumpat ise len gawi yo buen, ena ka kate dor ktine nang pulun mbo montuk aku keo ekang ikam tingen. ¹⁹ Ikam ene kati pea ku, aku tempondo kanam sesa nua koe ikam. Aku kanam sesa kati kanam ksesa ulun bawe des ngmekus pea. Aku dor kanam sesa, ena nau diran Kristus ene belo melak mbo lang epo ikam. ²⁰ Aku ngno beta keo ekang ikam tempondo, koe aku kakan bsurah diang legot yo mak, koe aku belo keo akal aut ngadap ikam. ²¹ Ulek kam tah epo aku, ise ikam yo bolum iwat aturan Torat, belo be ikam nempaning aturan Torat. ²² Belo be mbo mne keo tnulis se Abraham keo duo kongo pea, erai ngket bawe yo jadi batak iyo ai erai yo ngket bawe yo se memang, yo bebas? ²³ Pea yo kinomekus ngket batak iyo ene kinomekus koe pngkakan ulun tingen. Tapi pea yo kinomekus ngket bawe iyo memang ene, kinomekus koe jnanji koe Allah. ²⁴ Ene doko nau umbang pmrawet, Koe duo ulun bawe ene duo umbang yo sundok ptoko Allah. yo erai ngket tunden Sinai ngmekus pea-pea nte batak, yo ene Hagar. ²⁵ Hagar ene tunden Sinai mbo tana Arab, ai io sama diang Yerusalem yo tempondo, koe io bolum lang nte batak diang pea-pea iyo. ²⁶ Tapi Yerusalem yo mbo sorga yo ene bawe yo bebas, ai io ene ine taka. ²⁷ Koe keo tnulis :"Ego beta iko o bawe yo aloi, yo belo pini ngmekus! Ego ai ngrndea yo belo pini kiso kanam siet ngmekus! Koe yo dikah song iyo anta keo deo tingen pea se yo keo song." ²⁸ Ai ikam eraibuntung-eraibuntung, ikam sama kati Ishak pea-pea yo jnanji. ²⁹ Tapi kati bune, io yo tinompea koe pngkakan ulun, ngurow pea yo kinomekus koe pngkakan Roh Allah. Ktine low tempondo endo. ³⁰ Tapi ktimbe ulek lang Alkitab? Mbo mne tnulis ktindo: "Usa ko bawe batak ene diang pea iyo, koe pea batak bawe ene belo anta di jadi ngmpun pnape sama-sama diang pea bawe bebas ene." ³¹ Koe ene eraibuntung-eraibuntung, taka makse pea bawe batak, makse ko pea-pea bawe yo bebas.