¹ O ulun-ulun Galatia yo bungang, ise yo sundok memeteri ikam? Belo be Yesus yo snalib ene sundok pinojelas epo ikam? ² Endo bute yo aku kakan tau ngket ikam: Keo be ikam sundok nrima Roh koe nglaku aturan Taurat ena belo koe percaya epo Injil yo snampe epo ikam? ³ Sendongun ikam kbungang ene? Ikam sundok nindu diang Roh, kakan be ikam tempo ndo msundok yo diang sara dnia? ⁴ Belo keo jodo be eka yo sundok deo ikam kiso buen kanam kola ndo? Sendongun belo keo jodo! ⁵ Jadi ktimbe tempo ndo, Keo be Io mie Roh epo ikam diang ruak ruaw ai yo nampa musisat ela ekang ikam, Io nggawi ktine koe ikam nglaku aturan Taurat ena belo koe ikam percaya epo Injil yo sundok snampe epo ikam? ^{7 6} Ktine ka doko low Abraham percaya epo Allah, moko ene Allah ngreken umbang ene epo io se ene nau umbang yo beta. ⁷ Jadi ikam kito se dero yo bolum ngket iman, dero ene doko pea-pea Abraham. ⁸ Ai Alkitab, yo onon se ene sundok tau, se Allah nyengkono ulun-ulun makse Yahudi koe leka iman, sundok ono se ene nyampe Injil epo Abraham: "Koe iko eka bangsa anta kuli berkat." ⁹ Jadi dero yo bolum ngket iman, dero ene doko yo dnie berkat sama-sama diang Abraham yo keo iman ene. ^{11 10} Koe eka ulun, yo bolum ngket nglaku aturan Taurat, dero bolum lang sumpah pator. Koe keo tnulis: "Kono sumpah pator ulun yo belo stia nglaku eka yo tnulis lang kitab aturan Taurat." ¹¹ Ai se ndok belo keo ulun yo sinombeta onon Allah koe nglaku aturan Taurat ene jlas, koe: "Ulun yo bolum yo kono anta bolum koe iman." ¹² Tapi tondal aturan Taurat ene makse iman, makse ko ise yo nggawiiyo, anta bolum koeiyo. ¹³ Kristus sundok nous taka ngket lang sumpah pator aturan Taurat diang sara jadi kono sumpah pator koe taka, koe keo tnulis: "Kono sumpah pator ulun yo gneweng mbo kayu salib!" ¹⁴ Yesus Kristus sundok nglaku ene, apa mbo lang Io berkat Abraham sampe epo bangsa-bangsa yo mak, apa koe iman taka nrima Roh yo sundok jnanji ene. ¹⁵ Erai buntung-erai buntung, buen ka ena aku makai nte sontoh ngket nau pnyembolum olo-olo. Pnape yo sundok pnekat, beta ko io ngket ulun, belo taro pkore ktine low tnambah koe ulun ise ka-iyo. ¹⁶ Ktine ka epo Abraham nontus eka janji ene diang epo upus-iyo. Belo dinulek "epo upus-upus-iyo" kati ungka nte ulun deo, tapi nte erai kongo bute: "ai epo upus ko", yo ene Kristus. ^{18 17} Otang oki ene ktindo: Janji yo onon se ene sundok putus Allah, belo di taro pkore koe aturan Taurat, yo bayu nyoret opat jatus tolu pulu taun sundok ene, sampe janji ene mapos kturon-iyo. ¹⁸ Koe, ena ka ise yo putus Allah ulet ngket aturan Taurat, io mba di ulet ngket janji; tapi ube koe janji doko Allah sundok mie kasih karunia-Iyo epo Abraham. ¹⁹ Ena ktine, ise jodo aturan Taurat? Io tnambah koe gawi gata io nglanggar - sampe ulet upus yo jnanji ene - ai io snampe tete mlekat-mlekat epo lang kayang erai kongo ptete. ²⁰ Erai kongo ptete mba di pulun nte ngwakel erai kongo bute, pdahal Allah ene erai. ^{22 21} Ena ktine, belo bako sengkono be aturan Taurat diang janji Allah? Sama skali belo. Koe ena ka aturan Taurat dnie nte ise masam yo tau nembolum, jadi memang nau umbang yo beta ulet ngket aturan Taurat. ²² Tapi Alkitab sundok nguong eka ise masam ela iwat kuasa dosa, apa koe iman lang Yesus Kristus janji ene dnie epo dero yo percaya. ^{26 23} Onon iman ene ulet taka keo lang jaga aturan Taurat, ai nuong sampe iman ene pinokelak. ²⁴ Jadi aturan Taurat ene nte ngayak taka sampe Kristus ulet, apa taka jadi umbang yo kono koe iman. ²⁵ Tempo ndo iman ene sundok ulet, koe ene taka belo di keo oli lang jaga yo ngayak ene. ²⁶ Koe ikam eka-eka ene pea-pea Allah koe iman mbo lang Yesus Kristus. ²⁷ Koe ikam eka, yo bnaptis lang Kristus, sundok makai Kristus. ²⁸ Lang nau umbang endo belo keo ulun Yahudi ktine low ulun Yunani, belo keo ulun batak ktine low ulun bebas, belo keo bang song ktine low bang bawe, koe ikam eka-eka ene erai lang Kristus Yesus. ²⁹ Ai ena ikam ene mpun Kristus, jadi ikam low ene upus Abraham ai keo hak nte nrima janji Allah.