¹ Abis ene des sundok lalo opat blas taun, aku malan nua epo Yerusalem diang Barnabas ai ndok Titus oit ku low. ² Aku malan koe keo yo pinokelak. Jadi epo dero aku ngurai Injil yo sampeku mbo ekang bangsa-bangsa makse Yahudi - lang pmnsara pinoko epo dero yo deo pntau -, apa nang prsuma aku bkomer ktine low yo sundok komer ku. ³ Tapi betako Titus, yo sama-sama diang aku, ene ulun Yunani, tapi io belo di pnaksa nte bkatep. ⁴ Keo ka pnindu ngket dero yo ngaku-ngaku eraibuntung yo ngako-ngako sumba, yo doko dero yo ngako-ngako sumba epo dalom diang ptua nte mungka kbebas taka yo mpun taka lang Kristus Yesus, apa diang ktine dero kuli nampa taka jadi batak dero. ⁵ Tapi ndok belo ile-ile kain kakan mundur ai ngaya nte dero, apa kbeta Injil kate preket mbo ikam. ⁶ Ai nau umbang dero yo nte itan sundok deo pntau ene - ktimbe kombo pangkat dero bai, ene belo di jodo nte oki, koe Allah belo di meti wae - tontan ktimbe low, dero yo nte itan sundok deo pntau ene belo di maska ise-ise yo mak epo aku. ⁷ Tapi mokin ube, des sundok dero kito se epo aku sundok dnie tugas nte pnyampe Injil nte ulun-ulun belo bkatep, sama kati epo Petrus nte ulun-ulun bkatep ⁸ -koe Io yo sundok mie kuasa epo Petrus apa jadi rasul nte ulun-ulun bkatep, Io low yo sundok mie kuasa epo aku nte ulun-ulun yo belo bkatep. ⁹ Ai sundok kito kasih karunia yo sundok dnie epo aku, koe ene Yakobus, Kefas diang Yohanes, yo tnoan se guru pmturon jemaat, sujud epo aku ai diang Barnabas nte tanda se kain kerai kowon, apa kain malan epo ulun-ulun yo belo bkatep ai dero epo ulun-ulun yo bkatep; ¹⁰ tingen ka yo kain arus dor knop ulun-ulun kao ai ene doko yo beta-beta komerku nglaku iyo. ¹¹ Tapi des Kefas ulet epo Antiokhia, aku sangko wae slengan iyo, koe io sala. ¹² Koe onon tenu-tenu kongo ngket kowon Yakobus ulet, io kuman kerai diang eraibuntung-eraibuntung yo belo bkatep, tapi sundok dero ulet, io sdang kuman ai bsoro ngket dero koe takut se erainuntung-eraibuntung yo bkatep. ¹³ Ai ulun-ulun Yahudi yo mak jadi diang io lumpat low ungka-ungka belo di nggawi, sampe Barnabas se lumpat bkoit diang nau dero ene. ¹⁴ Tapi des itanku, se gawi dero ene belodi sngkono diang kbeta Injil, aku ngulek epo Kefas mbo onon eka-eka dero: "Ena iko, ulun Yahudi, bolum kati sara ulun kaper ai belo di kati sara Yahudi, ktimbe iko kuli mtua eraibuntung-eraibuntung yo belo bkatep nte bolum kati sara Yahudi?" ¹⁵ Ngket kinomekus kain endo ulun Yahudi ai makse ulun dosa ngket bangsa-bangsa yo mak. ¹⁶ Ikam tau, se ndok belo erai kongo ulun yo kuli jadi yo kono koe nglaku aturan Taurat, tapi koe iman lang Kristus Yesus bute. Koe ene kain doko sundok prsaya epo Kristus Yesus, apa kain jadi yo kono koe iman lang Kristus Yesus jadi belo di koe nglaku aturan Taurat. Koe: "Ndok belo erai kongo ulun jadi yo kono" koe leka nglaku aturan Taurat. ¹⁷ Tapi ena kain se, desung kain bkomer nte jadi yo kono lang Kristus nokon ka aso ulun-ulun dosa, belo be nau umbang ene rti yo se Kristus ene bgawi nte dosa? Makse di ktine! ¹⁸ Koe ena aku nngkuat nua ise yo sundok kokasku, aku mmkelak se aku se yo nglanggar aturan Taurat. ¹⁹ Koe aku sundok mate koe aturan Taurat nte aturan Taurat, apa aku bolum nte Allah. Aku sundok snalib diang Kristus; ²⁰ tapi aku bolum, tapi makse aku se oli yo bolum, tapi Kristus yo bolum lang aku. Ai bolumku yo aso keo tempo ndo lang isi upak endo, ene bolum koe iman lang Pea Allah yo sundok nngkosang aku ai nyrah kompu tonga-Iyo nte oki. ²¹ Aku belo di nolak kasih karunia Allah. Koe ena beta nte jadi yo kono koe aturan Taurat, jadi pngnate Kristus mba di keo jodo doko.