¹ Saulus stuju lou ena Stepanus pnate. Des ene mulai kurou ksa iyo hebat mbo jemaat Yerusalem. dero eka, kecuali Rasul-Rasul, buyo mbo pupus daerah Yudea diang Samaria. ² Ulun-ulun saleh ngubur mayat Stefanus diang dero nungka nangis nungul. ³ Tapi Saulus tambah mrindas jemaat diang iyo sumba tiap lou ai matak song-song bawe epo baling ai nyerah dero ente psumba lang penjara. ⁴ Dero iyo buyo ene malan mupus dnia mne ulak ngesah Injil. ⁵ Filipus malan epo erai kota mbo Samaria diang iyo ngesah Mesias epo ulun mne. ⁶ Des dero kringo penyurah Filipus diang kito tanda-tanda yo gawi iyo, dero eka kerai kesong nrima penyurah iyo ene. ⁷ Koe engket deo ulun yo snumban, roh jahat ene baling diang oyon ries, deo ulun pokung diang dekal sundok pinokale. ⁸ Moko ene roa pngego dero lang kota ene. ⁹ Keo ulun karan se Simon ngket bune tukang lmu ela kota ene iyo nampa eran ulun Samaria. yo nampa nau ungka-ungka kati ulun penting. ¹⁰ Abis ulun idik olai, lumpat Iyo ai bkesah: '' Ulun endo kuasa Alla yo terkenal Kuasa Olai ene." ¹¹ Ai dero lumpat iyo, koe sudok ola aut iyo mekeran dero diang lmu yo ene. ¹² Ai dero tmpondo persaya epo Filipus yo ngesah Injil soal Kerajaan Allah, ai soal karan Yesus Kristus, ai mie kompu tonga dero nte babtis, baik song bawe-bawe. ¹³ Simon se lou jadi persaya ai sundok bnaptis, io trus sama-sama diang Filipus, ai eran des io kito tanda-tanda diang mujizat-mujizat olai yo terjadi. ¹⁴ Des rasul-rasul ela Yerusalem kringo, se tana Samaria sundok kuli nrima firman Allah, dero nyuyu Petrus ai Yohanes epo mne. ¹⁵ Des ulet ela mne duo kongo rasul ene smbayang, apa ulun-ulun Samaria ene kuli Roh Kudus. ¹⁶ Sbab ndok belo erai pian dero pndiwa Roh Kudus ombon dero,koe dero suma bnabtis lang karan Tuhan Yesus. ¹⁷ Trus kduo rasul-rasul ene mayak kayang ela ombon dero, laju dero kuli nrima Roh Kudus. ¹⁸ Des Simon kito, se sara mie Roh Kudus terjadi koe rasul-rasul ene nente kayang dero, trus io nawar sen epo dero. ¹⁹ ai bunyal: "biye ko lou epo aku kuasa ene, apa aku kuli lou nente kayangku ombon ulun, apa io kuli nrima Roh Kudus." ²⁰ Tapi Petrus ngulek epo yo: Bnasa sen ko ene sama-sama diang iko, koe otus ko iko kuli moli karunia Alla diang sen . ²¹ Belo keo bagian atau hak ko lang urusan ene,sbab kesong ko belo lonus onon Alla. ²² Jadi tobat ngket gawi gata teriau endo ai sembayang epo Tuhan,apa Io ampun niat kesong ko endo; ²³ sbab aku meti,bahwa kesong ko sundok kati nau poru yo pait diang bsukow lang gawi gata triau." ²⁴ Tuwing Simon:doa ko ta nte oki epo Tuhan,apa epo aku belo terjadi yo kati ulek ko ene. ²⁵ Sundok dero duo yo bkesah ai nyurah Firman Tuhan,mulik nua dero epo Yerusalem diang dero ngesah Injil lang kampong-kampong mbo Samaria. ²⁶ Sundok ene bunyal erai kongo malaikat Tuhan epo Filipus, ulek yo:"Uat iko ai brangkat aut epo tadah selatan, ngaya boyan yo diwa ngket Yerusalem epo Gasa". Boyan ene kalang ulun lalo mne. ²⁷ Laju Filipus brangkat. Keo erai ulun Etiopia, yo e ne sida-sida, pmrenta olai ai pengutok perbendaharaan Sri Kandake,ratu negri Etiopia, yo brangkat epo Yerusalem nte sembayang. ²⁸ Tempo ndo ulun ene sundok la boyan uli ai tunge' lang kreta yo ulak ngembaca kitab nabi Yesaya. ²⁹ Trus ulek Roh epo Filipus:" Malan iko epo daro, epo dempet kreta ene!" ³⁰ Filipus laju epo lane ai ngeringo sida-sida ene pas ngembaca kitab nabi Yesaya.Ulek Filipus: "Ngerti be tuan ise yo baca tuan ene?" ³¹ Tuwing yo: "Ktimbe aku kuli ngerti, ena belo keo yo matuk aku?" Peles io tindu Filipus dombo ai tunge la bika yo. ³² Tulisan yo baca io ene otang yo ketindo: Kati erai kukui domba yo noit epo awa pnymble, ai kati anak domba yo pe'pe mbo onon wae ulun nggunting bulu yo, ktine low Io belo ngingkang bowa Io. ³³ Lang bolum Io uja ulun ene malan terus ukuman Io, ise yo nte nyrita tindu tondal Io? Sbab nyawa Io nalek ngket dnia. ³⁴ moko ulek sida- sida ene epo Pelipus: " Aku ngunti epo iko, ise yo ulek nabi ketine ene? Soal io se be soal ulun yo mak ? " ³⁵ Trus mulai Filipus bkesah mulai ngket nas ene mulai ene yo ngesah Injil Yesus epo io. ³⁶ Dero terus malan nua, ampe mbo awa yo keo danum. Trus ulek sida-sida ene : Eti ko ta, nduh keo danum; ise sala yo ena aku baptis?" ³⁷ [Tuing Filipus: "Ena tuan persaya diang bol kesong, kate." Tuing io: "Aku persaya, se Yesus Kristus Anak Allah."] ³⁸ Trus ulun Etiopia ene nyuyu nyetop kreta ene, diang dero duo diwa epo lang danum, Felipus diang sida-sida ene, peles Filipus ngmbaptis io. ³⁹ Ai sundok dero baling ngket lang danum,Roh Tuhan kolan-kolan nembuyo Filipus ai sida-sida ene belo kito io oli. Io trus malan nua diang ego. ⁴⁰ ungka io Filipus keo mbo Asdod. Io malan lalo kampong ene ai ngesah Injil mbo pupus kota sampe io ulet mbo Kaisarea.