¹ Des jeman ene,des kedeo murid ketambah,timbul ngeluh mbo ekang ulun-ulun Yahudi yo makai basa Yunani diang ulun-ulun Ibrani,koe pembagian epo balu-balu dero belodisenanda lang playanan tongku olo. ² Koe ene keduo belas Rasul momba eka-eka murid dero bgumpul ai ngulek; kain belo puas ena ngendikah Firman Allah ke pae ngelayan meja. ³ Ikam harus milih,turu kongo ngket ekang ikam se,yo terkenal buen,ai ponu diang Roh ai hikmat,apa kain ngekat dero ente tugas ene, ⁴ apa kain se kuli mtadah pikiran lang Doa ai pelayanan Firman. ⁵ Usul ene tinorima buen ke eka-eka jemaat,jadi dero mili Stefanus,ulun yo ponu iman ai Roh Kudus,ai Filipus,Prokhorus,Nikanor,Timon,Parmenas,ai Nikolaus,ulun yo penganut agama Yahudi ngket Antiokia. ⁶ Dero ene noit epo rasul-rasul,trus rasul-rasul ene berdoa ai mayak kayang ombon dero. ⁷ Diang ene Firman Allah makin tesebar,ai kedeo murid la Yerusalem makin tambah dea;deo bes lou imam iyo nyerah diri ai persaya. ⁸ Ai Stefanus, yo ponu karunia diang kuasa, nampa mujizat-mujizat diang tanda-tanda mbo ekang ulun deo. ⁹ Tapi nyoret nte erai duo ulun ngket jemaat Yahudi yo nontus se jemaat ulun Libertini anggota-anggota jemaat ene dero ene ulun-ulun ngket Kirene ai ngket Aleksandria sama-sama diang kedeo ulun Yahudi ngket Kilikia ai ngket Asia.Ulun-ulun ene soaljawab diang Stefanus. ¹⁰ tapi dero belo sanggup ngelawan hikmat io diang Roh Allah yo nampa io besara. ¹¹ Abis ene dero moit dat deo pes ulun nte ngulek: "Kain sundok kringo io ngoret pemensara pitnah epo Musa diang Allah" ¹² Diang sara ene dero nampa gerakan ekang ulun deo diang low pengentuo-pengentuo diang ahli-ahli Taurat; dero rame-rame ngompoh Stefanus, matak io ai moit io epo ngadap Majelis Pengadilan Agama. ¹³ Trus dero mkulet saksi-saksi eta nte ngulek: "Ulun endo terus-terusan ngoret pemensara yo ngina awa susi endo diang hukum Taurat, ¹⁴ ko kain sundok kringo yo ngulek se Yesus, ulun Nazaret ene, kan ngeroros awa endo ai ngobah adat istiadat penape Musa po taka." ¹⁵ Eka-eka ulun yo tunge lang sidang Mahkamah Agama ene meti Stefanus, trus itan dero wae Stefanus kati wae Malaekat.