¹ Des Petrus diang Yohanes aso besara epo ulun deo ene, kolan-kolan pngulet imam-imam diang pengutok Bait Allah diang low ulun-ulun Saduki. ² Ulun deo ene mara beta koe dero duo matuk ulun deo ene diang ngesah se lang Yesus keo kuasa nte nyuli ngket mate. ³ Dero duo ene tenangop diang nuong lang tahanan sampe ma manin koe aso malom. ⁴ Tapi deo dero yo nempaning batuk tutui dero duo ene jadi percaya, sampe kedeo dero jadi limo ribu kongo yo song. ⁵ Des ma ene begumpul mbo Yerusalem pengutok-pengutok Yahudi diang pengentuo-pengentuo diang ahli-ahli Taurat dero, ⁶ diang Imam Olai Hanas diang Kayafas, Yohanes diang Aleksander diang eka-eka keturunan Imam Besar. ⁷ Trus Petrus diang Yohanes oit dero ngadap sidang diang pinoresa pakai pengunti "Pakai kuasa ise atau karan ise gawi kam ene?" ⁸ Jadi Petrus diang ponu Roh Kudus nuing "O pengutok-pengutok umat diang pengentuo-pengentuo, ⁹ ena kain endo pinoresa koe gawi buen epo ulun kroton diang perlu nutui pakai kuasa ise mekale ulun ene, ¹⁰ ene doko apa tau ikam pes-pes diang pupus umat Israel, se lang karan Yesus Kristus, ulun Nazaret, yo salib kam ene, tapi yo pesuli Allah ngket ekang ulun mate se koe Yesus ene ulun endo akat diang slomai onon ikam. ¹¹ Yesus ene doko batu yo oding tukang-tukang bangunan yo doko ikam se, namun Io ene sundok jadi batu penjuru. ¹² Koe ene selamat mba di keo lang ulun-ulun makse se lang Io bute, koe iwat langit belo keo karan yo denie yo langne taka kuli selamat. ¹³ Des ulun begumpul ene meti pengeronu Petrus dia Yohanes ene diang tau se dero duo ene ulun biasa makse ulun ombo penyekola, dero eran; ai dero kenal se dero duo ene lumpat ajaran Yesus. ¹⁴ Tapi koe dero kito ulun yo ale roton ene akat diang dero duo, dero belo keo kuli ngembantah oli. ¹⁵ Des sundok dero nyuyu rasul-rasul ene baling ngket lang awa berundeng, dero brondeng, ¹⁶ Ai ngulek: " ktimbe gawi taka se ulun dero endo? Koe sundok melak aut epo eka-eka ulun Yerusalem, se dero sundok nampa mujizat yo belo di melim, diang taka belo kuli nyangkal yo. ¹⁷ Tapi apa nang sampe tambah deo ulun tau, alo taka mtako diang ngusan dero apa dero nang bunyal nua diang ise-ise lang karan Yesus." ¹⁸ Diang sundok dero duo senuyu sumba, dero nusan, apa nang beta bunyal diang matuk nua lang karan Yesus. ¹⁹ Tapi Petrus diang Yohanes nuing nte dero ene: "Mbo ikam se ka mutus mone yo sngkono mbo Allah: taat epo ikam be taat epo Allah. ²⁰ Sbab belo anta kain belo ngesah ise yo sundok itan kain diang dingo kain. ²¹ Epo tambah boek dero ngusan rasul-rasul ene, tapi penyundok yo oli dero nutis ka, koe sidang ene belo kito boyan nte ngukum dero koe takut se ulun deo yo memuliakan karan Allah brubung yo sundok terjadi. ²² Koe ulun yo pkale mujizat ene sundok sisa se opat pulu taun umur yo. ²³ Sundok nutis, malan Petrus diang Yohanes epo ruku teman-teman dero, bayu dero bkesah eka-eka kati pngesah imam-imam pngutok diang pngentuo epo dero. ²⁴ des tman dero kringo ene, nyoyar dero sama-sama epo Allah, ulek dero :" O Tuhan, Iko yo nampa langit diang tana, tasik diang atok yo. ²⁵ Diang Roh Kudus yo tete amba Ko daud, Bapa kain, Iko sundok berfirman : Ise moko bangsa-bangsa rusuh, ise moko suku-suku bangsa ngrensana plikara yo belo keo otang? ²⁶ Raja-raja dnia siap-siap diang pngutok-pngutok ulun bkumpul nte nglawan Tuhan diang ulun yo sundok diurapi Iyo. ²⁷ Koe lang kota endo sbeta yo sundok bkumpul Herodes diang Pontius Pilatus ai bangsa-bangsa diang suku ulun Israel nglawan Yesus Hamba Ko yo kudus, yo sundok tota Ko diang lnga urapan, ²⁸ Nte nyundok eka-eka yo sundok atur Ko ngket tla koe kuasa ai pngkakan Ko. ²⁹ Tempo ndo, O Tuhan, eti nau dero mtako kain, die hamba-hamba Ko pngeronu nte ngesah firman Ko. ³⁰ Tente tangan Ko nte mngkale ulun, diang tanda-tanda musisat ke karan Yesus, Hamba Ko yo kudus ene." ³¹ Pas dero smbayang, skukui awa dero bkumpul ene ai dero eka ponu diang Roh Kudus, bayu dero ngesah firman Allah diang ronu. ³² Jadi jut ulun yo sundok persaya ene, dero kerai kesong, diang belo keo dero yo ngulek pngkeo dero ene pun dero se, tapi ise pngkeo ene mpun sama-sama nte sama-sama. ³³ Ke kuasa yo olai rasul-rasul bsaksi soal pengenyuli Tuhan Yesus ai dero eka bolum lang kasih krunia yo mroa. ³⁴ Ndok belo erai kongo dero ene yo benasa, dero keo lati tana lou belai nte dero jual nte dero oit ³⁵ ai dero mayak mbo onon botis rasul-rasul, nte bagi epo tongku kongo ulun yo persaya, sukup nte yo penerlu. ³⁶ Ketine lou diang Yusuf iyo tempapa rasul-rasul ene Barnabas arti iyo pea penghiburan, ulun Lewi ngeket Siprus ³⁷ yo ngenjual umo mpun yo se laju noit sen ene, yo mayak mbo onon botis rasul-rasul.