¹ Des jeman ene' lang jemaat mbo' Antokia keo tenu' kongo' nabi ai guru, yo' ene' Barnabas ai Simeon yo' tinompapa' Niger, ai Lukius ulun Kirene, ai Menahem yo' tinompea sama'-sama' diang raja' wilayah Herodes ai Saulus. ² Des olo dero' smbayanh epo' Tuhan ai puasa, besara Roh Kudus: "Ptoko' kam Barnabas ai Saulus nte'-Oki' nte' tugas yo' sundok tetap-Ku nte' dero'." ³ Ke' ene' dero' doa puasa', ai sundok mayak kayang ombon dero' duo' ene', dero' belodi ngusan dero' duo' brangkat. ⁴ Koe' suyu' Roh Kudus, Barnabas ai Saulus brangkat epo' Seleukia, ai ngket mne' dero' belayar epo' Siprus. ⁵ Sampe mbo' Salamis dero' mngabarkan Firman Allah mbo' lang blai-blai awa' sembayang ulun Yahudi. Ai Yohanes diang dero' nte' ngembantu' dero'. ⁶ Dero' ngelekum eka'-eka' pulau ene' sampe epo' Pafos. Mbo' mne' dero' mangkoruku diang erai kongo' ulun Yahudi nan karan se Baryesus. Yo' ene' ulun tukang sihir ai nabi' palsu. ⁷ Yo' ene' tman gubernur pulau ene', Sergius Paulus, yo' ene' ulun pintar. Gubernur ene' momba' Barnabas ai Saulus, koe' io' kakan nmpaning Firman Allah. ⁸ Tapi' Elimas ktine' karan yo' lang basa' Yunani-, tukang sihir ene', mombong dero' ai berusaha ngembelok gubernur ene' ngket iman io'. ⁹ Tapi' Saulus, yo nan karan se Paulus, yo ponu' diang Roh Kudus, meti' yo', ¹⁰ ai besurah:"O pea' Iblis, iko ponu' diang masam-masam akal dat ai gawi teriaw, eka' yo' buen belo skngkono diang iko', belo brenti be iko' kakan ngmbelok Boyan Tuhan yo' lonus ene'? ¹¹ Tempo ndo' eti' ko', kayang Tuhan ulet ombon iko', ai iko' jadi posa', tenu'-tenu' olo kola' yo' iko' belo kuli' meti' mato olo." Ai des ene' lou ulun ene' kiso' kanam pngulet kabut ai seom, ai ulak ngraba-raba yo' arus meto ulun nte' ngayak yo'. ¹² Kito ise' yo' sundok terjadi ene', persaya doko gubernur ene', yo' eran koe' ajaran Tuhan. ¹³ Sundok ene Paulus diang teman-teman io bju ket Pafos belayar epo Perga mbo Pamfilia; tapi Yohanes ngendikah dero uli epo yerusalem. ¹⁴ Ngket Perga terus malan sampe mbo Anthiokia ela Pisidia. Des olo Sabat dero epo belai ibadat, laju tunge lang ne. ¹⁵ Des sundok ngembasa' hukum Taurat diang kitab nabi-nabi, ptugas-ptugas lou ibadat nyuyu rekunti epo dero: "mandi mokong, ena ikam keo pesan nte mnturon pngnanam ai ngibur umat endo, kesah se!" ¹⁶ Paulus akat, Io ngowe diang kayang io, laju ngulek : "ikam ulun-ulun Israel ai ikam yo takut se Alla, tempaning kan ta!" ¹⁷ Alla umat Israel endo sundok mili itak kakah taka ai nampa umat endo jadi olai, des dero nongos mbo mesir kati ulun asing. Diang kayang-Io, Io sundok ngayak dero baling ket dnia mne. ¹⁸ Opat pulu taun kola yo Io sabar diang nau gawigata dero mbo padang gurun. ¹⁹ Sundok ngempate turu bangsa mbo tana Kanaan, Io magi-magi tana ene nte warisan nte dero. ²⁰ kira-kira kola opat jatus limo pulu taun. Likas ene Io mie dero Hakim-hakim sampe po jaman nabi Samuel. ²¹ Ket ne dero tindu nte dero raja, Alla mie epo dero Saul bin Kish ngket suku Benyamin, opat pulu taun kola yo. ²² ngket Saul snimpeh, Alla ngengkat Daud nte dero raja. Soal Daud ene Alla ngulek : Aku sundok kuli Daud bin Isai, ulun yo senkono lang kesong-Ku, ulun yo aya oyot diang petua-Ku. ²³ Ngket upus yo ene, kati yo sundok jenanji koe-Io, Allah sundok memesuli juruselamat nte ulun Israel, yo ene Yesus. ²⁴ Onon Io ulet, Yohanes sundok memetau epo eka-eka ulun bangsa Israel apa dero btobat ai kakan benaptis. ²⁵ Des Yohanes duni nyundok tugas io, io ngulek: Aku ene makse Io yo otus kam ene, tapi Io mba di ola ntang ulet. ngosu sandal ket botis Io aku belo senaron. ²⁶ Oo... Erai buntung-erai buntung, yo ngket upus Abraham, ai lou ngket yo takut se Alla, kabar keselamatan ene sundok senampe epo taka. ²⁷ Koe ulun yo nongos mbo Yerusalem ai pengentuo-pengentuo yo belo ngakui Yesus. Diang mutus hukuman pate epo Io. Dero gnenap penyurah nabi-nabi yo benaca tongku olo Sabat. ²⁸ walau dero belo ruku yo dat jadi alasan nte hukum pate ene, tapi dero sundok tindu epo Pilatus apa Io penate. ²⁹ Ai sundok dero gnenap ndok eka yo keo tenulis soal Io, dero mediwa ngket kayu salib, laju ngelumbi Io lang kubur. ³⁰ Tapi Alla mmsuli Io ngket ekang ulun mate. ³¹ Ai sundok tenu-tenu olo oli Io mekelak kompu tonga Io epo dero yo diang Io ngket Galilea epo Yerusalem. Dero ene yo tempo ndo jadi saksi-Io nte umat ene. ³² Ai kain tempo ndo miye kabar buen epo ikam, yo doko janji yo beniye epo itak kakah taka, ³³ yo sundok gnenap koe Alla epo taka, upus dero, diang mensuli Yesus, kati keo tenulis lang kitab Mazmur keduo: Anak-Ku, Iko! Aku sundok nganak Iko olo ndo. ³⁴ Alla sundok mesuli Io ngket ekang ulun mate ai Io belo anta senerah nua nte benasa. Hal ene sundok ulek Tuhan lang firman ndo : Aku kakan nggenap epo iko janji-janji yo kudus yo dapet di persaya, yo sundok biye-Ku epo Daud ³⁵ Koe ene Io ngulek lang mazmur yo mak: Iko belo anta miye Ulun Kudus-Ko meti benasa ³⁶ Koe Daud nggawi pengkakan Alla des Zaman yo, trus io sundok mate ai pino lumbi isan itak kakah io ai io memang senerah nte benasa ³⁷ Tapi Yesus, yo pinosuli Alla, belo di ketine. ³⁸ Apa ikam tau, nte ngkam eka-eka, ke Iyo ene pino tau ikam soal pngampunan dosa nte ngkam. ³⁹ Ai toko lang Iyo ene tiap ulun persaya kuli kbebasan ket ise masam dosa, yo ikam belo kuli ngket ukum Musa. ⁴⁰ Koe ene, ikam jaga-jaga, nang sampe tkono mbo ikam kati yo sundok nulek lang kitab nabi-nabi: ⁴¹ Ikam knop, ikam yo tuju nguja, nrongo turai mate, ke aku nampa gawi lang jaman kam, yo ene gawi yo belo anta ikam persaya, ena sinorita epo ikam." ⁴² Des Paulus diang Barnabas baling, dero tnindu nte nyurah soal masalah ene pas olo Sabat sori yo. ⁴³ Des sundok sembayang, deo ulun Yahudi diang yo lumpat agama Yahudi yo takut se Allah, nyarak Paulus ai Barnabas; duo rasul ene nutui batuk dero ai mie nsehat apa dero ttap bolum lang krunia Allah. ⁴⁴ Des olo Sabat sori yo, ulet duni eka erai kota ene bkumpul epo nempaning firman Allah. ⁴⁵ Tapi, des ulun Yahudi kito ulun deo ene, ngrenunu kanam lang kompu dero diang iri ai ulak nyruna gawi dero, dero nglawan ise yo ulek Paulus. ⁴⁶ Tapi, diang ronu Paulus diang Barnabas ngulek epo dero: "memang mitek ikam firman Allah ene snampe ono se yo mak, tapi ikam nolak yo ai ngotus diri kam belo pantas kuli bolum kden. Ke ene kain btual epo bangsa yo mak. ⁴⁷ Koe endo doko yo senuyu epo kain: Aku sundok ntap iko nte jadi wala, nte bangsa-bangsa yo belo tau se Allah, apa iko moit kslamatan sampe tompak denia." ⁴⁸ Kringo ene ego eka-eka ulun yo belo knal diang Allah, ai dero mmuliakan firman Tuhan; eka ulun yo tnentu ke Allah nte bolum kden, jadi persaya. ⁴⁹ Bayu firman Tuhan knabar epo pupus denia mne. ⁵⁰ Ulun-ulun Yahudi ngasut bang bawe-bawe ulun penting yo takut se Allah, ai pjabat-pjabat ela kota ene, ai dero nampa lpukat nte ngurou Paulus diang Barnabas laju ngusa dero ngket denia mne. ⁵¹ Tapi Paulus diang Barnabas nompus bondul ela botis dero apa dero memeknop ulun-ulun ene mbo lai sori, laju brangkat epo Ikonium. ⁵² Ulun-ulun persaya mbo Antiokhia bol diang kanam ego ai bol diang Roh Kudus.