¹ Mbo Ikonium duo rasul ene sumba lang lou smbayang ulun Yahudi, trus beta-beta nutui matuk , koe' ene' deo ulun Yahudi diang ulun Yunani jadi percaya. ² Tapi ulun-ulun Yahudi, yo nolak pyurah dero, m'layong kesong ulun-ulun yo belo tau se Alla diang nampa dero dat pngnanam epo dero duo ene. ³ Paulus diang Barnabas nongos tenu-tenu olo mo mne' Dero nutui matuk diang ronu, ke dero percaya epo Tuhan. Diang Tuhan mturon kabar soal kasih karunia-Io diang mie epo dero kuasa nte nampa tanda-tanda diang mujizat-mujizat. ⁴ Tapi ulun deo mo kota ene tbagi jadi duo: keo yo ngngket tadah ulun Yahudi, keo lou yo ngngket tadah duo rasul ene. ⁵ Mulai ka ulun-ulun yo belo tau se Alla diang ulun-ulun Yahudi sama-sama diang pengutok dero nampa lpukat nte ngurow ai nurak duo rasul ene diang batu. ⁶ Sundok rasul-rasul ene tau,se ktine dero bsimpeh epo kota-kota mo Likaonia, yo ene mbo listra diang mbo Derbe ai lekum dnia mne. ⁷ Mo m'ne dero Nginjil. ⁸ Mbo Listra keo erai kongo ulun yo tunge-tunge tingen, koe loma botis io diang lumpuh ngket io kinomekus ai belo pini kuli malan. ⁹ Io tunge nempaning, des Paulus bekesah. Diang Paulus meti epo tadah io ai kito se io ene keo Iman diang dapet pkale. ¹⁰ Trus Paulus b'sara diang oyon ries akat tengkorong diang botis ko se! "ulun ene akat m'nsou laju malan po lanah landuh. ¹¹ Des ulun deo kito ise yo sundok gawi Paulus ene,bsara diang ries oyon makai basa Likaonia: "Dewa-dewa sundok diwa po ekang taka kati nau ulun. " ¹² Barnabas ulek dero Zeus, Paulus ulek dero Hermes ke Io, yo b'kesah. ¹³ Laju ulet imam dewa Zeus, yo kuil yo awa yo la baling se kota, moit lembu-lembu song diang karangan-karangan bungo po jawong gerbang kota, nte mempersembahkan korban diang ulun deo epo rasul-rasul ene. ¹⁴ Kringo ene Barnabas diang Paulus mrenset diris laung dero, trus sntuyun epo ekang ulun deo ene ai momba ulak oyon ries; ¹⁵ "O ikam eka-eka, koe mbe moko ikam gawi ktine? kain endo suma ulun biasa sama kati ikam. Kain keo la mendo nte ngabar Injil epo ikam, ampa ikam ngendikah gawi gata yo belo keo jodo' ai mulik epo Alla yo bolum, yo sundok nampa langit ai dnia, tasik ai eka-eka atok yo. ¹⁶ Des jman bai Alla ngmbebas eka-eka bangsa nyarak boyan dero se, ¹⁷ tapi Io belo di belo mmkelak diri-Iyo diang ise-ise yo buen, diang mediwa uran ngket langit ai diang mie musim pnduan pnyekulo buen nte ngkam. Io msnang kesong kam diang okan singkap ai pngngnanam ego." ¹⁸ Tontan di rasul-rasul ene bunyal ktine, tapi alang-alang dero belo kuli ngusan ulun deo ene mie persmbahan epo dero. ¹⁹ Tapi ulet ulun-ulun Yahudi ngket Antiokhia ai Ikonium trus dero moit ulun deo ene apa ngngket dero. Trus dero nurak Paulus diang batu ai matak io epo baling kota, koe omoi dero, se io sundok mate. ²⁰ Tapi des murid-murid ene akat nglekum io, io uat trus sumba epo lang kota. Olo manin io brangkat sama-sama diang Barnabas epo Derbe. ²¹ Paulus diang Barnabas ngabar Injil ela kota ene ai deo kuli murid. Trus dero mulik epo Listra, Ikonium ai Antiokhia. ²² Ela mne dero mmturon kesong murid-murid ene ai nasehat dero apa dero tetap lang iman, ai ngulek, se nte sumba epo lang Krajaan Alla taka arus kiso deo sngsara. ²³ La tongku jmaat ene rasul-rasul mayak pngentuo-pngentuo nte jmaat ene diang sundok bedoa diang puasa, trus rasul-rasul ene nyerah pngentuo-pngentuo ene epo Tuhan, yo ene tondal kpersayaan dero. ²⁴ Dero nganja pupus Pisidia ai ulet ela Pamfilia. ²⁵ La mne dero ngabar firman mbo Perga, trus brangkat epo Atalia, mbo pantai. ²⁶ Ngket mne dero blayar epo Antiokhia; mbo mne dko dero prne snerah epo kasih karunia Alla nte ngmulai gawi, yo sundok psundok dero. ²⁷ Sampe mne' dero momba jmaat nte bkumpul, trus dero nyrita ise-ise yo gawi Alla lalo tete dero, ai se Io sundok ngingkang jawong nte bangsa-bangsa yo mak epo iman. ²⁸ Ela mne ola dero nongos sama-sama diang murid-murid ene.