¹ Rasul-Rasul diang ulun yo persaya yo keo ela Yudea ngringo, se bangsa-bangsa yo mak nrima firman Allah lou. ² Des Petrus ulet ela Yerusalem, ulun-ulun ket golongan knatep slisi paham diang iyo. ³ Ulek dero : "Iko sumba lang lou ulun-ulun yo belo knatep ai kuman sama-sama diang dero." ⁴ Tapi Petrus ngenjelas eka-eka bsambung-sambung, ulek iyo: ⁵ "Aku desung smbayang ela kota Yope, kolan-kolan rohku diliputi diang kuasa Ilahi ai aku keo pngkito: kati nau diris sae, yo sgeweng mbo opat pdu diris ene, kati nuluy ket langit sampe onon waeku. ⁶ Aku meti diris ene, itanku atok yo ponu diang eka jnis korik-kotok botis opat,korik blei, korik yo slor, diang bmasam jnis mpulu. ⁷ bayu aku kringo oyon, yo bsurah epo aku: uat iko Petrus, semble laju okan ko!" ⁸ Tuingku: Belo, Tuhan, belo kate, ke belo pini yo dion ai pian brse ene sumba bowaku. ⁹ tapi keduo derang oyon ket sorga ene ngulek epo aku: Ise yo nontus kate nokan ke Allah, belo kate iko nganggap dion! ¹⁰ Kjadian ene sampe tolu derang, bayu eka-eka ene nerek nua epo langit. ¹¹ Des ene lou, tolu kongo ulun akat onon lou, ela awa kain nsan; dero snuyu ngadap aku ngket Kaisarea. ¹² Terus ulek Roh epo aku: Malan bdrak diang dero ai nang ragu! Peles onom kongo ene diang aku. kain sumba lang lou ulun ene, ¹³ iyo nyrita epo kain, se iyo ene kono kito erai mlekat, akat lang lou iyo, ai ngulek epo iyo: Suyu ulun epo Lope nte ngnjmput Simon yo nontus se Petrus ene. ¹⁴ Iyo anta nyampe kabar epo ikam, yo nte mmkulet kslamatan nte ngkam diang eka atok lou blai kam. ¹⁵ Des aku mulai bkesah, diwa Roh Kudus ombon dero, sama kati taka prne diwa ombon taka. ¹⁶ Jadi aku knop ulek Tuhan: Yohanes ngbaptis diang danum, tapi ikam anta bnaptis diang Roh Kudus. ¹⁷ jadi ena Alla miye karunia-Io epo dero sama kati epo taka des taka mulai persaya epo Yesus Kristus, ktimbe nau aku ngusan Io ? ¹⁸ Des dero kringo hal ene, dero jadi tenang, peles muji Alla, ulak ngulek: " jadi epo bangsa-bangsa yo mak Alla miye lou karunia pertobatan yo moit epo bolum." ¹⁹ Des ene deo ulun persaya bp'nsar engket Yerusalem koe kurow k'sa yo timbul des sundok Stefanus dihukum pate. Dero bp'nsar ampe epo Fenisia, Siprus ai Antiokhia; suma dero ngabar Injil epo ulun Yahudi tingen. ²⁰ Ekang dero ene keo ulun Siprus ai ulun Kirene yo ampe la Antiokhia ai ngulek lou epo ulun-ulun Yunani ai ngabar Injil, se Yesus ene Tuhan. ²¹ Ai kayang Tuhan sama-sama diang dero ai deo ulun jadi persaya diang sekuleng epo Tuhan. ²² Des sampe kabar dero ene ela jemaat la Yerusalem, jemaat ene oli nymuyu Barnabas epo Antiokhia. ²³ Des Barnabas ulet ai kito karunia Alla, io ego. Io nutui batuk dero, apa dero nokon stia epo Tuhan, ²⁴ koe Barnabas ene ulun buen, ponu diang Roh Kudus ai iman. Deo ulun-ulun yo noit epo Tuhan. ²⁵ Barnabas malan oli epo Tarsus nte meto Saulus; des sundok ruku diang io, io noit oli epo Antiokhia. ²⁶ Dero duo nongos kerai diang jemaat ene erai taon kolah yo, sambil matuk nutuy ulun deo. La Antiokhia ene doko murid-murid tla tingen nulek Kristen. ²⁷ Des ene ulet lou nabi-nabi ngket Yerusalem po Antiokhia. ²⁸ Keo erai kongo engket dero karan yo Agabus akat diang keo kuasa Roh io ngulek, se mupus denia anta terjadi bahaya lau ola. Hal ene terjadi low des zaman Klaudius. ²⁹ Koe ene oli murid-murid mutus nte ngumpul sumbangan, sesuai diang pengkeo, ai ngirim oli epo ulun persaya yo nongos la Yudea. ³⁰ Dero ngirim sumbangan lou epo pengentuo-pengentuo te'te Barnabas diang Saulus.