¹ Taka arus tau se olo-olo pnyundok anta ulet bolum sulit. ² Ulun-ulun nengkosang kompu tonga io se ai jadi batak pitisen. Dero tuju kesah opaw ai nondek io se, dero tuju mtenah, deri tuju nglawan ulun tuo ai belo tau trima kasih, belo nyanda agama, ³ belo tau baku kosang, belo ganggu bdamai, tuju mdat ulun, belo tau ngentep pngenanam, rusi, belo ganggu yo buen, ⁴ tuju kianat, mba dimikir anjang, baso ungka-ungka tau, tuju ngaya pngenanam se ngaya Allah. ⁵ Nte eti dero nglaku sembayang, tapi sbeta yo dero nangkal kuasa sembayang ene. Oro-oro ngket dero ene! ⁶ Koe ela ekang dero ene keo ulun io ngako sumba epo lou ulun yo mak ai moit bawe-bawe bungang yo ponu diang dosa ai atur pngenanam io se, ⁷ beta ko trus kakan nte tutui batuk, tapi belo pini tau yo kono. ⁸ Sama kati Yanes ai Yambres nglawan Musa, ene low dero nglawan yo kono. Akal dero rusak diang iman dero belo klian nuji. ⁹ Tapi sundok pasti dero belo anta tambah maju, sama kati naw Yanes ai Yambres, kbungang dero anta melak epo eka ulun. ¹⁰ Tapi iko sundok lumpat tutui batuk ku, nau pnyembolumku, pendirianku, imanku, ksabarku, kosangku diang pnyelentuoku. ¹¹ Iko sundok lumpat kono knurow knasa ai sesa kati yo kono aku mbo Antiokia ai ela Ikonium ai diang ela Listra. Eka kurow ksa yo kono aku ai Tuhan sundok ngllpos aku ngket nne. ¹² Memang tongku ulun io kakan bolum sembayang lang Kristus Yesus anta kono kurow ksa, ¹³ tapi ulun gramas ai tukang ngakal anta tambah dat, dero memeketang ai kono pinotang. ¹⁴ Tapi koe ka iko ttap sgop epo yo kono yo sundok trima ko yo iko sundok persaya, diang knop se ulun io sundok nutui matuk epo iko. ¹⁵ Arus knop low se ngket pea iko sundok tau se Kitab Suci yo kuli mie kpintar epo iko ai ngayak iko epo slamat koe iman epo Kristus Yesus. ¹⁶ Eka tulisan iyo die Allah beta-beta keo jodo nte nutui matuk, nte memekelak io salah, nte nengkuen sipat ai nutui matuk ulun lang yo kono. ¹⁷ Diang ktine tongku ulun mpun Allah nlengkap nte tongku gawi gata buen.