¹ Koe ene, o anakku, turon-turon ka koe kasih karunia lang Kristus Yesus. ² Ise yo dingo ko ngket aku mbo onon deo saksi, tape ko epo ulun yo dapet gop pmnsara io, diang yo snaron nte nutui matuk ulun yo mak. ³ Lumpat ka ssa koe jadi tntara Kristus Yesus yo buen. ⁴ Tntara yo desung lang prang belo repot diang kompu tonga io se diang soal-soal pnymbolum io, apa diang ktine ene io sngkono epo kmndan io. ⁵ Tukang main pulun kate kuli adiah koe kuret, suma ena io blaga kati aturan-aturan mbo blaga. ⁶ Ulun pngumo yo beta-beta bgawi moko yo paling ono kiso kanam asil gawi io. ⁷ Tmpaning ise yo ulek ku: Tuhan anta mie iko pntau eka-eka nau lang bolum. ⁸ Nang kewot endo: Yesus Kristus, yo sundok nyuli ngket ekang ulun mate, yo kinomekus ngket upus Daud, ene yo kesah surahku lang Injilku. ⁹ Koe kesah surah ene doko aku ssa, aso bnolit kati ulun gawi triaw, tapi firman Allah belo dapet bolit. ¹⁰ Koe ene aku sabar kiso kanam ssa ene nte ulun-ulun yo pili Allah, apa dero kuli low slamat lang Kristus Yesus diang kemuliaan yo kden. ¹¹ Beta doko pmnsara endo: Ena taka mate diang Io, taka anta bolum low diang Io; ¹² ena taka tahan ssa, taka low anta lumpat mmrenta diang Io; ena taka nangkal Io, tangkal Io low taka; ¹³ ena taka belo stia, Io ttap stia, koe Io belo kuli nangkal kompu tonga-Iyo se. ¹⁴ Pknop ai tape kam nte oki ene nang keo liu diang beta-beta epo dero ela onon Allah, apa dero nang bako tangki kesah, koe ene belo di keo jodo, nte nampa nmbengong ulun yo nempaning yo ka ube. ¹⁵ Iko bkomer apa iko sengkono ela onon Allah kati ulun yo bgawi belo koyoh mai-mai, yo bol-bol nyampe nau umbang pngesah yo kono ene. ¹⁶ Tapi nidar-nidar pnyurah yo belo otang ai belo susi yo malah tau te nambah dadal ka ube. ¹⁷ Penyurah dero ene makin sae kati roton ktikang. Mbo ekang sama dero, ktine low Himeneus ai Filetus, ¹⁸ yo sundok nylemang ngket yo kono, diang nutuy matuk ulun se kbangkitan taka desung aut, ene moko tau nte ngrusak iman ulun deo. ¹⁹ Tapi tondal yo sundok payak Allah ene turon, mtrai yo : "Tuhan tau llu ise yo mpun-Io" ai tongku ulun yo ngontus karan Tuhan ene arus ngendikah gawi gata yo triau". ²⁰ Lang lou yo olai belo di atok kakas ngket mas ai pirak tingen, tapi keo low yo ngket kayu ai tana ; yo ela nontus tla ene pnakai nte jodo yo nuon, yo nontus sori nte tujuan yo belo di nuon balo. ²¹ Ena ulun ene ngidar ngket gawi gata yo triau, yo ene yo nulek kati kakas lang lou yo pnakai nte jodo yo nuon, yo kinomakse diang yo mak, yo pnotoko koe ulun yo mpun lou jnodo nte gawi gata yo nuon tingen. ²² Koe ene nidar-nidar yo kati pngnanam bang burok, ale ngomer apa kate adil, setia, kasih diang damai epo eka-eka diang dero yo momba epo Tuhan diang kesong yo brse. ²³ Nidar soal yo neto-neto, yo oal ai belo snaron. Iko tau se soal ene tau nte nampa ruok, ²⁴ Yo karan yo hamba Tuhan ene belo kate ruok rame tapi arus nyasong diang sama ulun, yo harus tukang nte nutui matuk, ai sabar ²⁵ ai diang jumot kuli nguloh ulun yo tuju nglawan, koe bahe Tuhan mie boyan nte dero apa btobat ai ngayak dero apa dero tau soal yo kono, ²⁶ ai diang ktine dero kate jadi knop nua, koe kate losu ngket akal iblis yo sundok nyiret dero mbo pngkakan yo.