¹ Nau umbang playanan epo ulun-ulun kudus aku belo di koyoh nulis ene epo ikam. ² Aku sundok tau nau umbang krela kesong kam yo tondek ku epo ulun-ulun Makedonia. Ulekku: "Akhaya sundok siap sdia ngket taun prene." Ai kmoyoh kam sundok jadi pngenjelu kesong deo ulun. ^{5 3} ku ngirim erai buntung-erai buntung ene, apa nau tondek kain lang nau umbang endo se ikam nang melak se jadi belo keo jodo, tapi apa ikam beta-beta siap sdia kati yo sundok ulek ku, ⁴ apa, ena ulun-ulun Makedonia ulet sama-sama diang aku, nang dero ruku se ikam belo pian siap, sampe kain - nte belo di ngulek ikam - kiso mai diang kpersaya kain ene. ⁵ Koe ene san ku perlu nyuyu erai buntung-erai buntung ene nte brangkat ono se aku, apa dero ngatur die sokoy yo sundok janji kam ono se ene, apa nindo sundok bsedia nte bukti ksawai kesong kam ai makse die sokoi yo pnaksa. ⁶ Kinonanam beta endo: Ulun yo mewet idi, anta ngutik idi low, ai ulun yo mewet mroa, anta ngutik mroa low. ⁷ Moko iyo masing-masing mie kati krela kesong iyo, nang diang kesong susah ai koe pnaksa, koe Allah kosang se ulun yo mie diang ego. ⁸ Ai Allah klian mie eka-eka kasih karunia epo ikam, apa ikam dor puli ba lang ise masam ai mokin ube ruak ruai lang ise masam yo buen. ⁹ Kati keo tnulis: "Io magi-magi, Io mie epo ulun kao, kbeta-Iyo nokon nte turai-turai." ¹⁰ Io nyedia bini nte pmewet, ai roti nte okan, Io low yo anta nyedia bini nte ngkam ai mdeo iyo ai mraya bua kbeta kam; ¹¹ ikam anta pinotataw lang eka ise masam ksawai kesong, yo nambah roa sukur epo Allah koe kain. ¹² Koe playanan kosang yo batok pendie endo mba di nte nempuli tingen kperluan-kperluan ulun-ulun kudus, tapi low nambah roa nulek sukur epo Allah. ¹³ Ai koe ikam sundok tahan soba lang playanan ene, dero ngemulia Allah koe kpatoh kam lang pngangkan kam se Injil Kristus ai koe ksawai kesong kam lang magi ise masam diang dero ai diang eka-eka ulun, ¹⁴ beta ko lang doa dero, dero low ngeno se ikam koe kasih karunia Allah yo mroa ogot epo ikam. ¹⁵ Sukur epo Allah koe karunia-Iyo yo belo dapet surah ene!