¹ Aku,Paulus,ulun yo belo ronu ena sangko wae diang ikam,tapi ronu epo ikam ena sangko oro,aku mkenop ikam koe Kristus yo lami lamai ai sawai. ² Aku tindu epo ikam;nang ikam maksa aku nte ngoret pengeronuku mbo dempet,koe aku keo kno nte btindak kois epo ulun-ulun yo ngomoy,se kain bolum kati sara ulun dnia endo . ³ Beta ko kain aso bolum mbo dnia,tapi kain belo prang kati nau sara ulun dnia endo, ⁴ koe dapo kain mbo prang makse dapo dnia endo,makse ko dapo yo tnambah diang kuasa Allah,yo klian nte meroros bombong batu. ⁵ Kain notok tongku otang akal ulun ai mroros tongku alasan yo tinongkuat koe kesombong ulun nte nglawan pentau se Allah.Kain nyikup eka pngenanam ai moitiyo nte tunduk epo Kristus, ⁶ ai kain siap low nte ngukum tongku yo dadal,ena kpatoh kam sundok bol umbang. ⁷ Eti tah yo melak onon wae kam!Ena keo ulun beta-beta persaya,se io ene mpun Kristus,mokoiyo io bekenanam mbo lang kesong iyo,se kain low ene mpun Kristus sama kati io. ⁸ Lengkat se ene,ena aku ungka nyisa lalo nondek kuasa, yo die Tuhan epo kain nte nengkuat, belo di nte nempukan ikam,jadi diang nau umbang ene aku belo anta kinomai. ⁹ Tapi aku belo kakan nitan ungka-ungka mtako ikam diang surat-surat ku. ¹⁰ Koe, ulek ulun surat-surat iyo bol-bol pkotang ai ries itekiyo nte knanam,tapi ena sangko wae nau iyo lome ai kesah surah iyo belo keo otang. ¹¹ Tapi mokoiyo ulun-ulun yo bunyal ketine sadar,se gawi kain,ena sangko wae,sama kati pmensara kain lang surat-surat kain,ena belo di sangko wae. ¹² Beta ko kain belo ronu memesu kain se epo ulun-ulun, ngembanding kain se diang ulun-ulun yo tuju nondek io se.Dero nyukat dero se diang pnyukat dero se ai ngembanding dero se diang sama dero. Bungang beta dero ene!. ¹³ Mokin ube kain mba di kakan nondek sisa se nau yo memang,makse ko nokon mbo jepan-jepan awa bgawi yo sundok jnepan koe Allah nte kain,yo wekar sampe se ikam low. ¹⁴ Koe lang nyampe Injil Kristus kain sundok sampe epo ikam, jadi kain belo nglalo jepan awa bgawi kain, ungka-ungka kain belo sampe se ikam. ¹⁵ Kain belo di nondek gawi gata ulun mak mbo awa bgawi yo belo di jnepan nte kain.Tapi kain kundong,se ena iman kam mokin menduan,kain anta tambah kinonuon ekang ikam, ena bnanding diang awa begawi yo jnepan nte kain. ¹⁶ Ktine ka jodo kain bolum,apa kain kuli nyampe Injil ela ja-ja yo longon se ja kam ai belo di nondek koe nau pengkuli ulun mak mbo awa begawi yo jnepan nte dero. ¹⁷ Tapi ise-ise yo keo nte tondek,mokoiyo nondek mbo lang Tuhan." ¹⁸ Koe makse ulun yo nondek io se yo klian kono ikap,makse ko ulun yo kono tondek Tuhan.