¹ Eraibuntung-eraibuntung, kain kakan nyampe epo ikam nau umbang kasih karunia Allah yo dnie epo jmaat-jmaat mbo Makedonia. ² Ulak aso kono soba yo boyat lang bmasam kbnasa, kego dero mroa ogot ai betako dero kao, tapi dero tatau lang ksawai. ³ Aku se kito, se dero mie kati mbo pngkeo dero, langa lngkat ka ube se pngkeo dero. ⁴ Diang krela dero se dero tindu ai mtua belo kate belo epo kain, apa dero low kuli kasih karunia nte lumpat lang pelayanan epo ulun-ulun kudus. ⁵ Dero mie pawak mroa se yo kira kain. Dero mie kompu tonga dero, ngket tla epo Tuhan, sundok ene koe ptua Allah jadi epo kain low. ⁶ Koe ene kain tindu belo kate belo epo Titus, apa io nuntun ikam ai nyundok pelayanan kasih ene kati yo sundok tindu' io se. ⁷ Jadi tempo ndo sama kati ikam tataw ba, - lang iman, lang pnyurah, lang pntau, lang beta-beta bkomer nte ngawat kain, ai lang kosang kam epo kain - ktine low moko iyo ikam tataw lang pelayanan kasih endo. ⁸ Aku ngulek nau umbang endo mba di nte nymuyu, tapi, diang nutui nau komer ulun-ulun mak nte ngawat, aku kakan tau kbeta kosang kam. ⁹ Koe ikam sundok tau kasih karunia Tuhan taka Yesus Kristus, se Io, yo koe ikam jadi kao, betako Io tataw, apa ikam jadi tataw koe pngkao-Iyo. ¹⁰ Ndo doko pmnsaraku nte nau umbang ene, yo bahe keo jodo nte ngkam. Betako sundok ngket erai taun yo lalo ikam nindu' nggawi iyo ai mutus nte nyundok iyo low. ¹¹ Jadi tempo ndo, snundok low moko iyo gawi ene. Moko iyo gawigata ene gnawi sngkono diang krela kam, ai gnawi beta ka ene diang ise yo keo mbo ikam. ¹² Koe ena ikam rela nte mie, die sokoi kam ene jadi tinorima, ena die sokoi kam ene pngkeo yo keo mbo ikam, belo di pngkeo yo belo di keo mbo ikam. ¹³ Koe ikam tinongkoyat belo di nte ngmean nte ulun-ulun mak, tapi apa sama koyat. ¹⁴ Jadi moko iyo tempo ndo endo klngkat kam nmpuli ktuno dero, apa klngkat dero sori-sori nmpuli ktuno kam, apa sama koyat. ¹⁵ Kati keo tnulis: "Ulun yo kuli deo, belo di lngkat ai ulun yo kuli idi, belo di tuno." ¹⁶ Sukur epo Allah, yo koe ikam jadi mie pngnànam yo beta-beta ktine low lang kesong Titus nte ngawat ikam. ¹⁷ Betako io nrima ptua kain, tapi lang pngnanam beta-beta roa ene io diang ptua io se ngompoh ikam. ¹⁸ Sama-sama diang io kain nymuyu eraibuntung taka, yo paling pnuji mbo jemaat koe gawi io lang nyampe Injil. ¹⁹ Ai mba di ene tingen! Io low sundok tnunjuk koe jemaat-jemaat nte diang kain lang tugas nngkosang endo, yo gawi kain nte kmulia Tuhan ai apa tnoan se kain rela. ²⁰ Koe kain kakan ngidar nau umbang endo: se keo ulun yo kuli mdat kain lang nau umbang tugas nngkosang yo gawi kain ai yo asil yo kolai endo. ²¹ Koe kain ngnanam yo buen, mba di mbo onon Tuhan tingen, tapi mbo onon ulun low. ²² Sama-sama diang dero kain nymuyu erai kongo yo mak nua, yo ene eraibuntung taka, yo sundok tenu-tenu derang uji kain ai tnoan se dor bkomer nte ngawat. Ai tempo ndo io tambah bkomer koe io beta-beta prsaya se ikam. ²³ Titus ene tmanku yo bgawi sama-sama diang aku nte ngkam; eraibuntung-eraibuntung kain yo mak ene suyu jemaat-jemaat ai ene doko kmulia nte Kristus. ²⁴ Koe ene pinokelak beta epo dero onon jemaat-jemaat kbeta kosang kam ai kbeta tondekku se ikam.