¹ Koe taka kerai gawi, kain tindu epo ikam, apa ikam nang nampa jadi belo keo jodo kasih karunia Allah, yo sundok trima kam. ² Koe Allah bfirman: "Montuk Aku sengkono kesong, Aku nempaning ikam, ai des olo Aku nylamat, Aku ngawat ikam." Sebeta-betaiyo, des endo doko des yo sengkono ene; sebeta-beta iyo, olo endo doko olo nte nylamat ene. ³ Lang eka ise masam nau kain mba di nampa nte ulun tutur, apa playanan kain nang sampe pinosala. ⁴ Mokin ube, lang eka ise masam kain mkelak, se kain doko playan Allah, yo ene: ulak nantai diang bol kdoloh lang bolum bnasa ba, ⁵ lang nantai pupuk palu, lang sper ai ruok rame, lang poruk pgel, belo ron pngenanam ai belo keo okan kinan; ⁶ diang kberese kesong, pentau pentoan, kdoloh, ksawai kesong; lang Roh Kudus ai pengkosang yo belo di eta-eta; ⁷ mbo msampe yo kono ai kekuasa Allah; diang makai adil nte dapo des nglawan ai low des nangkis ⁸ des kinonuon ai des nuja; des kono sumpah pator ai des kono pinokolai; des tunruh ulun tukang nipu ngakal, tapi pnakai low ka, ⁹ kati ulun yo belo tnoan topan, tapi ulun tau ba; kati ulun yo duni mate, tapi bolum apo; kati ulun yo kono kurow, tapi belo mate; ¹⁰ kati ulun luwai dikah mate, tapi dor ego; kati ulu kao, tapi mtataw deo ulun; kati ungka ulun belo nan ise-ise, beta ko kain keo nan ba. ¹¹ O ulun Korintus! Kain sundok bsara trus trang epo ikam, kesong kain wingkang sae nte ngkam. ¹² Ai nte ngkam keo awa sae lang kesong kain, tapi nte kain keo awa yo sidet lang kesong kam. ¹³ Moko ene tempo ndo, apa sama koyat sama kmean - aku bsurah kati epo pea-peaku -: Ingkang kesong kam sae-sae! ¹⁴ Nang ka ikam bkerai diang ulun-ulun yo belo percaya. Koe ise yo sama mbo yo kono diang mbo yo dat?Ai ktimbe nau pa kuli kerai diang seom? ¹⁵ Ise ksama yo keo mbo Kristus ai Belial? Ise ksama ulun-ulun percaya diang ulun-ulun belo percaya? ¹⁶ Keo bkait be bait Allah ene diang berhala? Koe taka ene bait ngket Allah yo bolum kati firman Allah endo: "Aku anta nongos sama-sama diang dero ai mbo ekang dero, ai Aku anta jadi Allah dero, ai dero anta jadi umat-Ku. ¹⁷ Koe ene: Baling ta ikam ngket ekang dero, ai pseing kam se ikam se ngket dero, firman Tuhan, ai nang beta mulem ise yo lonsa, jadi Aku nrima ikam. ¹⁸ Ai Aku jadi Bapa kam, ai ikam jadi pea-pea-Ku song ai pea-pea-Ku bawe ktine ka doko firman Tuhan, Yo Paling kuasa."