¹ Koe kain tau, se ena kemah awa taka nongos mbo denia ene kenokas, Allah sundok nyedia awa nongos mbo sorga nte taka, awa nongos yo kden, yo belo tampa ulun. ² Kola taka mbo lang kemah ene, taka ngeluh, koe taka ngeno beta nongos mbo awa lang sorga ombon awa taka tmpondo endo, ³ koe diang ktine taka sepakai ai belo di denapet belai belanyang. ⁴ Koe kola aso nongos mbo lang kemah endo, taka ngeluh koe keboyatiyo beban bolum, koe taka kakan makai diris laung bayu tapi belo ngosu yo usang, apa yo tau mate ene betokom koe yo bolum. ⁵ Tapi Allah doko ube yo ngeraduh taka nte nau umbang ene ai yo miye Roh, epo taka nte ngenjami eka ise masam yo sundok senedia nte taka. ⁶ Jadi koe ene dor meturon kesong kain, walau kain kingat, se kola kain nongos lang kompu endo, kain aso oroh ngket Tuhan, ⁷ -koe bolum kain endo ene bolum koe leka persaya belo di leka koe kito- ⁸ tapi kesong kain turon, ai da kegawal kain wensut ngket kompu endo nte ngawa mbo Tuhan. ⁹ Koe ene lou kain bkomer, mbo kain ngawa lang kompu endo, ktine lou kain ngawa balong se kompu endo, apa kain sengkono epo-Iyo. ¹⁰ Koe kain eka arus ngadap takhta meja ijaw Kristus, apa tongku ulun kuli ise yo senaron trimaiyo, sengkono diang gawi gataiyo lang bolumiyo endo, buen be triaw be. ¹¹ Kain tau ise rtiiyo takut se Tuhan, koe ene kain bkomer nampa ulun jadi persaya. Mbo Allah kesong kain melak beta-beta ai aku arap kesong kain melak lou ktine nte ngkam timbang knanam. ¹² Diang endo kain belo bkomer muji-muji kain se nua epo ikam, tapi kain kakan miye boyan epo ikam nte nondek kain, apa ikam kuli ngadap ulun-ulun yo nondek koe nau umbang-umbang yo melak ai makse umbang ngket lang kesong. ¹³ Ena ulun-ulun ngontus kain kuto, belo di moko mbe! koe kain ngelayan Allah. Tapi ena ikam ngontus kain belo di kuto, buen ube, koe kain dor bkomer nte ngawat ikam. ¹⁴ Koe pengkosang Kristus yo ngemudi kain, koe kain sundok tau, se ena erai kongo ulun sundok mate nte eka ulun, jadi eka dero sundok mate diang-Iyo. ¹⁵ Ai Kristus sundok mate nte eka ulun, apa dero yo bolum, belo di bolum oli nte io se tapi nte Io, yo sundok mate ai sundok pinosuli nte dero. ¹⁶ Koe ene kain belo oli di nyukat ndok erai kongo ulun oli kati makai penyukat ulun. Ai ena kain pini nyukat Kristus kati makai penyukat ulun, tmpondo kain belo nyukat-Iyo oli ktine. ¹⁷ Jadi ise yo keo mbo lang Kristus, io ene doko tenampa bayu: yo usang sundok kinolalo, sebeta-betaiyo yo bayu sundok ulet. ¹⁸ Ai ekaiyo endo ngket Allah, koe Kristus sundok mdamai taka diang Io ai sundok nape pelayanan nte ngendamai ene epo kain. ¹⁹ Koe Allah ngendamai denia diang Io koe Kristus diang belo ngitung pensala dero. Io sundok nape kabar damai ene epo kain. ²⁰ Jadi kain endo doko wakel-wakel Kristus, kati ungka Allah ngenasehat ikam tete kain; lang karan Kristus kain tindu epo ikam: diye ka kompu tonga kam pinodamai diang Allah. ²¹ Io yo belo di dosa sundok tampa-Iyo jadi dosa koe taka, apa lang Io taka jadi kono mbo Allah.