¹ Koe ksawai Allah kain sundok nrima tugas endo. Koe ene kain belo di tawai ruang. ² Tapi kain ngidar eka gawi lang melim yo ngmai; kain mba di bgawi diang dat kno ai belo nampa-nampa firman Allah. Mokin ube kain mkelak yo kono ai diang ktine kain nyrah kompu tonga kain nte timbang knanam koe eka ulun ela onon Allah. ³ Ena Injil yo sampe kain ene aso btokom low, ene io btokom nte dero, yo anta mate, ⁴ yo doko ulun-ulun yo belo persaya, yo akal-iyo sundok tinomposa koe ilah jaman endo, sampe dero belo kito pa Injil nau umbang kmulia Kristus, yo ene doko gambar Allah. ⁵ Koe makse kompu tonga kain yo sampe kain, tapi Yesus Kristus ene Tuhan, ai kain endo jadi batak kam koe ptua Yesus. ⁶ Koe Allah yo sundok ngulek : "Ngket lang seom anta nyoret pa!", Io low yo nampa pa-Iyo keo wala mbo lang kesong taka, apa taka kuli pa ngket pntau nau umbang kmulia Allah yo melak mbo wae Kristus. ⁷ Tapi pngkeo endo mpun kain lang tpayan tana pulut, apa melak, se kuasa yo ruakruaw ene ulet ngket Allah, belo di ngket kain se. ⁸ Lang eka ise masam kain pinotunjol, tapi belo di sengkatel; kain eka akal, tapi aso keo arapan; ⁹ kain kono kurow ksa, tapi belo di dnikah ba-ba, kain tnimpa, tapi dor uat nua. ¹⁰ Kain majak moit pngemate Kristus lang kompu tonga kain, apa pnyembolum Yesus low jadi melak lang kompu tonga kain. ¹¹ Koe kain, yo aso bolum endo, trus snrah epo maot koe Yesus, apa bolum Yesus low jadi melak lang kompu kain yo tau mate endo. ¹² Koe ktine doko maot bgawi mbo lang kompu tonga kain ai bolum bgawi mbo lang ikam. ¹³ Tapi koe kain keo roh iman yo sama, kati keo tnulis: "Aku persaya, koe ene aku bsara", jadi kain low persaya, ai koe ene kain bsara low. ¹⁴ Koe kain tau, se Io, yo sundok msuli Tuhan Yesus, anta msuli kain low sama-sama diang Yesus. Ai Io anta moit kain sama-sama diang ikam epo Io. ¹⁵ Koe eka ene jadi koe ikam, apa kasih karunia, yo mokin olai se olai koe diang mokin deo se deo ulun yo jadi persaya, koe ene jadi mroa se mroa nulek sukur nte kmulia Allah. ¹⁶ Koe ene kain belo di wawai pngnanam, tapi beta ko ulun yo melak ngket baling kain susut se susut, tapi ulun lang kesong kain tinombayu dor tongku olo. ¹⁷ Koe kbnasa mean yo tempo ndo endo, nampa nte kain kmulia kden yo pawak lngkat se eka ise masam, pawak olai se kbnasa kain. ¹⁸ Koe kain belo di meti yo melak, tapi yo belo di melak, koe yo melak ene ile-ile bute, tapi yo belo di melak ene yo kden.