¹ Keo be kain nyemula nua nondek kain se? Perlu be kain kati ulun-ulun yo mak mkelak surat pujian epo ikam ai ngket ikam? ² Ikam ene doko surat pujian kain yo btulis lang kesong kain ai yo tnoan ai dapet baca eka ulun. ³ Koe sundok melak, se ikam ene doko surat Kristus, yo tnulis koe pelayanan kain, tnulis belo di diang tinta, tapi diang Roh ngket Allah yo bolum, mba di mbo kpeng batu, tapi mbo lang kesong ulun. ⁴ Ktine ka doko kekolai persaya kain epo Allah koe Kristus. ⁵ Diang bolum kain se kain belo di keo penjapa nte bsekaku ise-ise, ungka-ungka ene gawi kain se; belo, pngelian kain ene doko gawi gata Allah. ⁶ Io ka doko yo nampa kain low klian jadi playan-playan ngket perjanjian yo bayu, yo belo di ngket aturan yo btulis, tapi ngket Roh, koe aturan yo btulis ene moit mate, tapi Roh mie bolum. ⁷ Playanan yo moit nte mate tnulis sinoruring mbo kpeng-kpeng batu. Beta ko ktine kmulia Allah diangiyo des io dnie.Koe beta ko ludo oli, pa wae Musa trang beta, sampe mato ulun-ulun Israel belo klian meti iyo. Ena playanan ene ulet diang kmulia ktine ⁸ aso da-da oli kolai iyo kmulia yo diang playanan Roh! ⁹ Koe, ena playanan yo moit nte nukum ene mulia, da-da aso pawak mulia oli playanan yo moit yo sala jadi kono. ¹⁰ Sebeta iyo ise yo bai bareh san taka mulia, ena pinorawet diang kmulia yo ngombo se eka ise masam endo, ndok belo omur keo arti. ¹¹ Koe, ena yo tau ludo ene nlumpat diang kmulia, nyait da aso oli yo belo di tau ludo ene nlumpat diang kmulia. ¹² Koe kain keo arapan yo ktine, ene moko kain nggawi iyo diang bol pngeronu, ¹³ belo di kati Musa, yo nokom wae iyo, apa mato ulun-ulun Israel nang kito pngemapos pa yo erai desung tingen ene. ¹⁴ Tapi akal dero sundok jadi batal, koe sampe ndok olo ndo pnokom ene aso nokon nokom dero, ena dero ngembaca perjanjian ono ene belo di bebekelak, koe pulun Kristus bute yo kuli mkelak iyo. ¹⁵ Turai beta ndok olo ndo, tongku des dero ngembaca kitab Musa, keo pnokom yo nokom kesong dero. ¹⁶ Tapi ena kesong ulun ene mulik epo tadah Tuhan, pnokom ene nalek ngket iyo. ¹⁷ Koe Tuhan ene Roh; ai mbo mone keo Roh Allah, mbo mne keo kbebasan. ¹⁸ Ai eka taka jadi mkelak nau kmulia Tuhan diang wae belo di btokom. Ai koe kmulia ene pngulet iyo ngket Tuhan yo ene doko Roh, ene moko taka nensut jadi kerai nau diang gambar-Iyo, lang kmulia yo olai se olai.