¹ Aku sundok mutus mbo lang kesongku, se aku belo anta ulet nua epo ikam diang susah. ² Koe, ena aku nyusah kesong kam, ise oli yo kuli nampa aku jadi ego ena makse io yo susah koe aku. ³ Ai koe ene doko jodo surat ku endo, yoene apa ena aku ulet, nang aku susah koe dero, yo arus nampa aku jadi ego. Koe aku persaya nau umbang ikam eka-eka, se pengego ku ene doko low pengego kam. ⁴ Aku nulis epo ikam diang pengenanam yo belo kturoh ai solot ai diang nyorak deo olu mato, belo di apa ikam kesong nyoru, tapi apa ikam tau bol olai yo kosang ku epo ikam eka-eka. ⁵ Tapi ena keo ulun yo nampa otang nte mesiet kesong, jadi makse kesong ku yo psietiyo, tapi kesong kam eka-eka, ena belo se belo-belo iyo - apa nang aku mekolai balo -, kesong tenu-tenu kongo ulun ngket ikam. ⁶ Nte ulun yo ketine sundok ka puli kae ko deo bes ngket ikam, ⁷ sampe ikam mokin ube yo arus ngampun ai nyempae io, apa io nang mate koe siet kesong balo. ⁸ Koe ene aku nasehat ikam, apa ikam beta-beta nengkosang io. ⁹ Koe ene ube doko jodo yo aku nulis surat epo ikam, yoene nte nguji ikam, patoh be ikam lang ise masam. ¹⁰ Koe ise-ise ulun yo ampun kam pensalaiyo, aku ngampuniyo low. Koe ena aku ngampun, -ena ka keo yo arus ampun ku -, jadi nau umbang ene gawi ku koe ikam la onon Kristus, ¹¹ apa Iblis nang kuli kuret ngket taka, koe taka tau ise petuaiyo. ¹² Des aku sampe mbo Troas nte nyampe Injil Kristus, aku ruku, se Tuhan sundok ngengau boyan nte gawi gata mbo lane. ¹³ Tapi kesongku belo keturoh, koe aku belo mangko ruku erai buntungku Titus. Koe ene aku sabi ai bju epo Makedonia. ¹⁴ Tapi syukur nte Allah, yo lang Kristus dor moit kain mbo boyan pengkuret-Iyo. Diang tete' kain Io mewet kewo buen pentau se Io mbo mone-mone. ¹⁵ Koe nte Allah kain ene kewo yo buen ngket Kristus mbo ekang dero yo snelamat ai ekang dero yo belo slamat. ¹⁶ Nte yo sori tingen kain ene kewo pengenate yo ngempate ai nte yo tla kewo penyembolum yo nembolum. Tapi ise yo kelian nggawi tugas yo ketine? ¹⁷ Koe kain belo sama diang deo ulun yo mak yo meto asil ngket Firman Allah. Mokin ube lang Kristus kain besara kati mbo nauiyo diang petua-petua lio ngket prenta Allah ai mbo onon-Iyo.