¹ Ngket Paulus, yo koe ptua Allah jadi Rasul Kristus Yesus, ai ngket Timotius erai buntung taka, epo jmaat Allah mbo Korintus diang eka-eka ulun kudus mbo mupus Akhaya. ² Kasih karunia ai damai sjahtra ngket Allah, Bapa taka, ai ngket Tuhan Yesus Kristus diang ikam. ³ Eka puji nte Allah, Bapa Tuhan taka Yesus Kristus, Bapa yo buen kesong ai Allah pngulet eka pnyempae, ⁴ yo nyempae kain lang eka-eka kbenasa kain, sampe kain klian nyempae dero, yo keo lang bemasam kbenasa diang pnyempae yo trima kain se ngket Allah. ⁵ Koe sama kati kain kuli bagian roa ogot lang kesesa Kristus, ktine lou koe Kristus kain nerima penyempae yo meroa ogot. ⁶ Ena kain benasa, nau umbang ene jadi penyempae ai selamat nte ngkam; ena kain sinompae jadi nau umbang ene doko nte penyempae nte ngkam, apa ikam kuli kegalak nte doloh nantai kanam kesesa yo sama kati yo kono kain low. ⁷ Ai arapan kain se ikam ene turon, koe kain tau, se sama kati ikam lumpat ngalek bagian lang kebenasa kain, ikam lou lumpat ngalek bagian lang penyempae kain. ⁸ Koe pengkakan kain, erai buntung-erai buntung, apa ikam tau ksesa yo kono kain mbo Asia Kecil. Pmenasa kanam bolum yo kono kain ene olay beta ai boyat beta, sampe kain sundok eka akal low diang bolum kain. Kain kiso, ungka-ungka kain sundok ukum pate. ⁹ Tapi nau umbang ene ktine, apa kain nang persaya epo kain se, tapi pulun epo Allah yo nembolum ulun-ulun mate. ¹⁰ Ngket pngenate yo ngeri beta Io sundok ai anta nylamat kain: Epo-Iyo kain mayak arapan kain, se Io anta nylamat kain nua, ¹¹ Koe ikam low lumpat ngawat ngendoa kain, apa deo ulun ngulek sukur nte karunia yo kuli kain koe deo doa dero nte kain. ¹² Endo doko yo tondek kain, yo ene se oyon lang kesong kain mie pmensara epo kain, se bolum kain mbo dnia endo, toko-iyo lang ubungan kain diang ikam, kono atur kesong buen ai brese ngket Allah makse koe kpintar ngket dnia, tapi diang pngelian kasih karunia Allah. ¹³ Koe kain pulun nulis epo ikam yo dapet baca ai paham kam. Ai aku arap, mudah-mudahan ikam anta paham beta, ¹⁴ kati yo sundok ikam paham tenga ngket kain, yo doko se montuk olo Tuhan Yesus ikam keo nte tondek koe kain tapi kain low keo nte tondek koe ikam. ¹⁵ Diang Kyakinan endo aku pini ngrencana nte nuntun ikam bune, apa ikam kate kuli kasih karunia nte kduo derang iyo. ¹⁶ Sundok ene aku kakan nrus ju lang ku epo Makedonia, laju ngket Makedonia mulik nua epo ikam, apa ikam ngawat aku lang ju lang ku epo Yudea. ¹⁷ Jadi, keo be aku nglaku yo asal dio lang ngrensana nau umbang endo? Ktine low keo be aku nampa rencana ku ene kati pengkakan ku se, sampe mbo aku rendu keo "Oo" ai "Belo"? ¹⁸ Koe Allah yo stia, janji kain epo ikam belo di rendu "Oo" ai "Belo". ¹⁹ Koe Yesus Kristus, Pea Allah, yo sundok sampe kain mbo ekang ikam, yo ene koe ku ai koe Silwanus ai Timotius, makse ka 'Oo" ai 'Belo", Tapi mokin ube mbo lang Io pulun keo"Oo". ²⁰ Koe Kristus ene "Oo' nte eka janji Allah. Koe ene ka doko koe Io taka ngulek "Amin" nte ngemulia Allah. ²¹ Koe Io yo sundok mturon kain sama-sama diang ikam mbo lang Kristus, ene doko Allah yo sundok mngurapi, ²² ngemetrai tanda mpun-Iyo nte taka ai yo mie Roh Kudus mbo lang kesong taka nte persekot ngket eka-eka yo sundok sinodia nte taka. ²³ Tapi aku momba Allah nte saksiku - Io tau se aku -, se koe ene aku belo di ulet epo Korintus yo doko nte nyayang ikam. ²⁴ Makse koe kain kakan mrenta ise yo arus percaya kam, koe ikam akat turon lang iman kam. Mokin ube, kain kakan lumpat bgawi nte pngego kam.