¹ Nang ikam kois koroi epo ulun yo tuo, tnegur io kati uma. Tnegur ulun-ulun yo burok kati erai buntung kam se, ² Bawe-bawe yo tuo kati ine, bawe-bawe yo burok kati okong diang pngnanam lio. ³ Hormat epo balu-balu yo beta-beta balu. ⁴ Tapi ena ene ulun balu keo pea, opo! dero ene ngket tla ngnau nggawi yo buen epo kluarga iyo se diang males buen ulun tuo diang itak dero, ene yo sngkono mo Allah. ⁵ Ena io ulun yo balu, diang beta-beta balu, yo dnikah ba'ba, mayak hapan io epo Allah ai btahan lang pnindu diang doa molo malom. ⁶ Tapi balu yo bolum keo diang ruak ruwau, io sundok mate ulak bolum. ⁷ Pino kingat nau umbang endo lou epo balu-balu ene apa dero bolum belo di bila molon. ⁸ Tapi ena keo ulun yo belo di ngasi ngado kluarga io se, apa lagi lang lou io se, ulun ene sundok ngndikah iman ai tambah dat se ulun yo belo keo iman. ⁹ Yo dnaftar se balu, suma dero yo belo di kurang se onom pulu taun, yo sindai bute keo song. ¹⁰ diang yo beta sundok keo bukti nglaku gawi yo buen, kati ngasi pea, mie awa, mui botis erai buntung erai buntung yo kerai iman, ngawat ulun yo bolum bnasa- idok kesah, dero sundok makai eka des nte gawi yo buen. ¹¹ Koyoh ka dnaftar balu-balu yo aso burok, ena keo sindai keo pngnanam koe pngkakan yo nytuar dero ngket Kristus, dero ene kakan kawen ¹² diang ngndikah janji stia dero yo tla epo IO, dero nampa ukuman nte dero se. ¹³ Diang baling dalom lang lou ulun, dero nyntepet bontul, belo di bontul tingen, tapi lou nampa kesah tuju lumpat urusan ulun yo mak, diang ngmokas pmsara yo belo buen . ¹⁴ Ptuaku apa balu-balu burok kawen nua, keo pea, mimpin kluarga iyo ai nang nampa alasan epo musuh nte mdat karan taka. ¹⁵ Koe keo tenu-tenu kongo balu yo tang koe nyarak iblis. ¹⁶ Ena song-song bawe-bawe yo persaya keo kluarga yo balu, arus yo ngawat dero nang sampe nte nengkoyat jmaat. Diang ktine jmaat kuli ngawat dero yo beta-beta balu. ¹⁷ Penatua-penatua yo buen mimpin yo sengkono nte die ormat epo dero duo kali lipat, apalagi nte dero yo bkomer beta-beta kotbah ai nutui batuk. ¹⁸ Belo be Kitab Suci ngulek: "Nang iko nyimpeh bowa lembu yo aso ngraung dikut," ai nua "ulun bgawi arus kuli upa." ¹⁹ Nang iko nrima pnundruh epo penatua kcuali ena keo duo ena belo tolu kongo saksi. ²⁰ Dero yo nampa dosa arus kae ko mbo onon eka-eka ulun apa yo mak ene takut low. ²¹ Mbo onon Allah diang Kritus Yesus ai mlekat-mlekat pilihan-Iyo aku msan diang beta-beta epo ikam: knanam kam beta-beta pnutui endo belo di diang sriga ai nglaku eka-eka belo keo yo nengket. ²² Nang iko bangat balo nlep kayang ombon ulun ai nang bkoit lang dosa ulun mak. Jnaga kebrese kompuko. ²³ Nang oli ngisop danum tingen, tapi tnambah diang anggur idik-idik, koe buntung ko keo masalah ai kompu tonga ko yo jono mole. ²⁴ Dosa tenu kongo ulun melak beta, kati nau jlempono dero epo pngadilan, tapi dosa tenu kongo ulun bayu melak anta yo. ²⁵ Ene lou diang gawi gata yo buen ene resi melak ai ena belo ktine, io belo anta kuli pkona trus.