¹ Eka-eka ulun yo jadi anak bua moko yo dero nganggap tuan dero ene pantas kuli hormat ngket dero, apa karan Allah ai tutui batuk taka nang keko ulun. ² Ena tuan dero ulun persaya, nang sampe dero kurang bata epo iyo koe erai buntung lang Kristus, moko iyo dero nlayani diang tambah buen aso, koe tuan yo nrima berkat playanan dero yo doko erai buntung yo persaya ai yo snayang.(-2b) Bnatuk diang nsehat beta eka-eka endo. ³ Ena ulun nutui matuk yo mak ai belo di sengkono-diang pemesara buen yo doko pemesara Tuhan taka Yesus Kristus-ai belo di kati tutui batuk yo sengkono diang ibadah taka, ⁴ Io ene ulun yo ungka-ungka tau pdahal mba di keo pentau ise-ise. Roton io doko meto-meto soal ai mutar pemesara, nampa kekey diang erai-erai, pemesara ngoti ate, memetnah, sriga, ⁵ ruok bulo ela ekang ulun-ulun yo akal rusak ai yo mapos yo kono, yo san dero ibadah ene apa kate nte awa kuli untung. ⁶ Beta iyo ibadah ene ena diang san puli, mie untung olai. ⁷ Koe taka belo moit ise-ise epo lang dnia ktine low taka belo moit ise-ise epo baling. ⁸ Asal keo okan singkap ai diris laung, puli ka ene. ⁹ Tapi dero yo kakan tataw toyak epo lang masalah, epo lang akal triaw ai epo lang bmasam pngenanam remis yo osau diang nte nylaka, yo mlotong ulun epo lang awa pngeroros ai bol kbenasa. ¹⁰ Koe wakat eka-eka yo dat yo doko gawal pitis sen. Koe mtikas naket sen ene tenu-tenu kongo ulun sundok siat ngket iman ai nyesa kompu tonga yo se diang bmasam pengkono pengkena. ¹¹ Tapi iko o ulun Allah, nidar eka-eka ene, knomer yo adil, ibadah, stia, mangku kosang, sabar diang belo di kois koroi. ¹² Bkomer beta-beta lang mangko bali iman yo kono diang nyrabut bolum yo kden. Nte ene doko iko sundok bnomba ai iko sundok ngulek janji janji yo kono ela onon deo saksi. ¹³ Ela onon Allah yo mie bolum epo eka-eka ela onon Kristus Yesus yo sundok ngulek janji janji yo kono ene low mbo onon Pontius Pilatus, aku psan beta-beta epo iko: ¹⁴ Naya prenta endo, mba di bila molon ai mba di keo sala, ndok sampe des Tuhan taka Yesus Kristus mkelak kompu Iyo, ¹⁵ Yo doko des yo anta tnetap koe Pnguasa yo erai bute diang bol pngego, Raja ombon se eka-eka raja ai Tuan ombon se eka-eka tuan-tuan. ¹⁶ Iyo tingen yo belo ngaya epo maut, nongos lang trang yo belo dapet kompoh. ndok belo erai kongo ulun pini kito Iyo ai mmang ulun belo klian meti Iyo. Nte yo doko hormat ai Kuasa yo kden! Amin. ¹⁷ Pino knop epo ulun-ulun tataw lang dnia endo apa dero nang sombong ai nang ngarap ise-ise yo belo tinonoan kati pnyngkeo, tapi epo Allah yo lang pngkeo Iyo mie epo taka eka-eka nte taka pakai. ¹⁸ Pinoknop apa dero ene nggawi yo buen, jadi tatau lang yo buen, tuju mie diang mbagi kinan. ¹⁹ Ai diang ktine nimbun pengkeo nte tondal yo buen nte io se anta nte ngrapet bolum yo sebeta iyo. ²⁰ O Timotius, nasi nado ise yo sundok tnape epo iko. Kinoliki bunyal yo osaw ai belo brese ai mangko lawan yo ulet ngket yo nulek pentau, ²¹ Koe keo tenu-tenu kongo ulun yo nutui matuk ene ai diang ktine sundok siat ngket iman. Kasih Karunia diang iko!