¹ Pnyundok yo' erai buntung-erai buntung, kain tindu ai nutui matuk ikam lang karan Tuhan Yesus: ikam sundok kringo' ngket kain ketimbe' nau' bolum kam apa' sngkono mbo' Alla. Nau' ene' sundok aya' kam, buen yo' gnawi diang beta-beta aso. ² Ikam sundok tau' low ptutui-ptutui mone yo' sundok die kain epo' ikam lang karan Tuhan Yesus. ³ Koe' endo' doko ptua' Alla: nte' nyeing ikam, ⁴ apa' ikam oro' ngket pokeng apa' ikam masing-masing ngalek erai kongo' bawe nte' kam se ai apa' ikam bolum kudus ai trhormat, ⁵ nang lang pngkakan pokeng koreng, kati' gawi ulun -ulun yo' belo tau' Alla, ⁶ ai apa' lang hal ene' nang keo ulun nriaw erai buntung iyo' diang ngakal iyo'. Koe' Tuhan tukang ngmbales kati' yo' sundok ulek kain ngket jati' epo' ikam. ⁷ Alla momba' taka' mba' di nte' gawi ise' yo' dat, tapi' ise' yo' kudus. ⁸ Koe' ene' ise' yo' nolak endo' belo di nolak ulun, tapi' nolak Alla yo' sundok miye' low Roh Iyo' yo' Kudus epo' ikam. ⁹ Hal kosang erai buntung belo kotoh tnulis epo ikam, koe iko sundok blajar kosang nngkosang ngket Alla. ¹⁰ Hal ene sundok gawi ko epo erai buntung ko eka-eka ai mupus montuk wilayah Makedonia. Tapi kain nutui matuk iko, erai buntung, apa ikam tambah beta-beta aso nggwi yo. ¹¹ Ai anggap ka ene ksepantan buen nte bolum tnang, nte ngurus masalah-masalah yo se ai bgawi diang kayang, kati yo sundok pesan kain epo ikam. ¹² Apa ikam bolum kati ulun-ulun yo sopan mbo mato ulun baling ai belo sgeweng epo dero. ¹³ Strus yo kain belo di kakan, erai buntung-erai buntung, se ikam belo tau soal dero yo mate, apa ikam nang sedih balo kati nau ulun-ulun mak yo belo keo arapan. ¹⁴ Koe ena taka persaya, se Yesus sundok mate ai sundok nyuli, jadi taka persaya lou se dero yo sundok mate lang Yesus anta kumpul Allah kerai diang Io. ¹⁵ Ndo kain ngulek epo ikam diang firman Tuhan: tka yo balum, yo aso nongos sampe pngulet Tuhan, belo anta ono se dero yo sundok mate. ¹⁶ Koe des tanda ene dnie, yo ene des olo pngutok malaikat nngou ai sangkakala Allah keo oyon, jadi Tuhan anta diwa ngket sorga ai dero yo mate lang Kristus anta ono nyuli; ¹⁷ Sundok ene, taka yo bolum, yo aso nongos, anta nengkat sama-sama diang dero lang jaun nyruku Tuhan mbo ombon jaun. ktine dko taka kden sama-sama diang Tuhan. ¹⁸ Koe ene baku sempaye ikam diang pmnsara endo.