¹ Koe' kain belo tahan aut ngno' ikam, koe' ene' kain mutus nte' nongos sderai mbo' Atena. ² Trus kain ngirim Timotius, erai buntung yo' bgawi diang kain nte' Allah lang ngabar Injil Kristus, nte' mturon kesong kam diang ngnasehat ikam soal iman kam, ³ apa' nang keo ulun yo' skukui iman yo' koe' kanam bnasa' endo'. Ikam se tau', se taka jnodo' nte' ktine'. ⁴ Koe' ene', low des kain sama-sama diang ikam, sundok ulek kain epo' ikam, se taka anta' kiso' bolum bnasa'. Ai hal ene', kati' ikam tau', sundok trjadi. ⁵ Koe' ene' doko, jadi aku', koe' belo tahan aut, sundok ngirim io', apa' aku' tau' nau' iman kam, koe' aku' ragu'-ragu', bahe' ikam sundok soba' yo' tukang nggoda' ai bahe' usaha' kain jadi belo keo jodo'. ⁶ Tapi' tempo ndo', lipas Timotius ulet nua' ngket ikam ai moit kabar yo' buen nau' iman kam diang kasih kam, ai se ikam trus keo pngnanam buen soal kain ai kakan mangkoruku diang kain, kati kain low kakan nte' mangkoruku diang ikam, ⁷ jadi kain low, erai buntung-erai buntung, lang serba poyo' diang kbnasa kain jadi bsmpae koe' ikam diang koe' iman kam ⁸ Tempo ndo' kain bolum nua', asal ka' ikam akat turon mbo' lang Tuhan. ⁹ Koe' sukur ise' nte' kain die' epo' Allah diang ego, yo' kuli' kain koe' ikam, mbo' onon Allah taka'? ¹⁰ Molo malom kain bdoa beta-beta, apa' taka' mangkoruku sangko wae ai nambah ise' yo' aso kurang mbo' iman kam. ¹¹ Apa' Io', Allah ai Bapa' taka', diang Yesus, Tuhan taka, ngingkang boyan nte' kain epo' ikam. ¹² Ai apa' Tuhan nampa' ikam deo' sedeo' ai ruak ruaw lang kasih epo' erai-erai ai epo eka' ulun, sama kati' kain low nngkosang ikam. ¹³ Apa' Io' mturon kesong kam, apa' nang keo yo' dat ai kudus, mbo' onon Allah ai Bapa' taka' mbo' des pngulet Yesus, Tuhan taka', diang eka' ulun kudus Iyo'.