¹ Ikam se low ka tau, ulun-ulun persaya, koe pngulet kain mbo ekang ikam belo di persuma. ² Tapi tontan ise kain onon ene, kati ikam tau, sundok knurow ai nina ela Filipi, koe awat Allah taka, kain keo pngeronu nte ngesah Injil Allah nte ngkam diang usaha boyat. ³ Ngke tutui batuk kain belo di ngket yo sala ai belo ngket yo triaw diang belo di nte ngakal. ⁴ Sbeta yo, koe sengkono san Allah nte mayak Injil endo epo kain, koe ene kain bsurah, belo di nte nyenang ulun, tapi nte nyenang Allah yo nguji kesong taka. ⁵ Koe kain belo pini nembuen kesah tingen-ene ikam tau-ai ptua mranggah yo nelim-Allah se saksi- ⁶ kain belo pini meto pujian ket ulun, ketine ngket ikam, ktine low ket ulun-ulun yo mak, koe kain endo rasul-rasul Kristus low kain kuli low gawi ktine. ⁷ Tapi kain ramah ekang ikam, kati ine ngasi ngado pea iyo. ⁸ Ene lou kain, diang sayang beta epo ikam, belo di suma rela mie Injil Allah nte ngkam, tapi eka bolum diang kompu tonga kain nte ngkam, koe kain sayang diang ikam. ⁹ Koe ikam aso knop, ulun-ulun persaya, nau usaha diang poruk kain. Des kain bkomer molo malom, nang sampe nte nengkoyat ikam, kain ngesah Injil Allah nte ngkam. ¹⁰ Ikam ene saksi, ene lou Allah, beta-beta brese, adil ai belo keo pensala yo gawi gata kain ekang ikam yo persaya. ¹¹ Ikam tau, sebeta yo kain endo, kati nau uma epo pea-pea iyo, yo nsehat ikam diang pturon kesong kam tongku-tongku kongo, ¹² ai tindu beta-beta, apa bolum kam sengkono diang ptua Allah, yo momba ikam sumba lang krajaan ai kemuliaan Iyo. ¹³ Ai koe ene doko kain belo bekat-bekat yo besukur low epo Allah, koe ikam sundok nrima Firman Allah yo kesah kain ene, mba di kati pemerasa ulun, tapi-yo doko beta-beta ketine-kati Firman Allah, yo begawi low mbo lang ikam yo persaya. ¹⁴ Koe ikam, ulun persaya,sundok jadi ngaya nau jemaat-jemaat Allah mbo Yudea, jemaat-jemaat mbo lang Kristus Yesus, koe ikam low sundok bolum benasa koe teman-teman bangsa kam se, eka-eka yo mmnasa dero ngket ulun-ulun Yahudi. ¹⁵ lengkat se ene ulun-ulun Yahudi ene sundok ngempate Tuhan Yesus diang nabi-nabi ai yo sundok ngurou ngesa kain. Ise yo sengkono epo Allah belo dero nyanda ai eka ulun kemusuh dero, ¹⁶ koe dero kakan mombong kain ngesah Firman epo bangsa-bangsa yo mak nte keselamatan dero. Ketine doko dero trus trusan nambah dosa dero sampe sukup kedeo yo ai tempo ndo mara roa sundok bol-bol nyengkinan dero. ¹⁸ Koe kain sundok keo pengkakan nte ulet epo ikam- aku, Paulus, belo di sindai-, tapi iblis sundok mombong kain. ¹⁹ ise yo nte arap kain diang sukacita kain ai mahkota kemegahan kain mbo onon Yesus,Tuhan taka, des jman pengulet- Io, ena makse ikam? ²⁰ Beta-beta, ikam doko kemuliaan kain ai sukacita kain.