¹ Ktine lou ikam, o bang bawe, ngaya ka epo song panan kam, apa ena keo ngket dero yo belo patoh epo Firman, dero lou bdi koyoh diang pmensara jadi persaya epo Yesus koe gawi gata bawe iyo, ² ena dero kito, ktimbe kberse ai bolum bawe dero yo takut se Allah. ³ Raji ragam kam nang yo melak ela baling tingen, yo ene diang mindir-mindir balo, makai amas ena belo diang nyua pnyepakai yo buen-buen, ⁴ tapi raji ragam kam ene doko lang kesong yo melim diang raji ragam yo belo anta mapos yo ulet ngket roh yo lami lamai ai tenang, yo keo uman beta mbo mato Allah. ⁵ Koe ktineka doko umbang iyo bang bawe kudus bai bareh braji, yo ene bang bawe yo mayak pngundong iyo epo Allah; dero ngaya epo song iyo, ⁶ sama kati Sara patoh epo Abraham ai nmpapa se io tuan. Ai ikam ene doko pea-pea iyo, ena ikam nampa gawi buen ai belo takut nte ptako. ⁸ Ai pnyundok iyo, moko yo ikam eka-eka kerai surah kesah, kerai pngenanam, kosang se erai-erai buntung, sayang ai nang ngkeh-ngkeh, ⁹ ai nang ka ngbales gawi dat diang gawi dat ktine lou pator sumpah diang pator sumpah, tapi mokin ube, moko yo ikam mie berkat, koe nte ene doko ikam bnomba, yo ene nte kuli berkat. Koe : ¹⁰ " Ise yo kakan kakan gawal se bolum ai kakan kito olo-olo buen, io arus ngnjaga dola iyo epo yo dat ai teber iyo epo pmesara-pmesara yo ngakal. ¹¹ Io arus oroh ngket yo dat ai nggawi yo buen, io arus meto bolum damai ai bkomer naket iyo. ¹² Koe mato Tuhan btadah epo ulun-ulun kono, ai tlingo-Iyo epo pnindu dero yo tindu awat, tapi wae Tuhan nglawan ulun-ulun yo keo gawi gata dat. " ¹³ Ai ise ka yo anta keo gawi dat epo ikam, ena ikam moyoh keo gawi buen? ¹⁴ Tapi betako ikam arus ssah lou koe yo kono, ikam anta ego beta. Koe ene nangka ikam takut ise yo takut dero ai nangka tkojet. ¹⁵ Tapi pinokudus ka Kristus mbo lang kesong kam nte Tuhan ! Ai siap-siap ka des jman ise ka nte nuing epo tongku-tongku ulun yo tindu nket ikam nau yo knundong io keo mbo ikam, tapi arus be diang lami lamai ai ngnuon ulun, ¹⁶ ai diang pngenanam kesong yo brese, apa dero, yo mtenah ikam koe bolum kam yo buen lang Kristus, jadi mai koe ptenah dero ene. ¹⁷ Koe pawak buen ssesa ngke gawi buen, ena nau umbang ene mbo ptua Allah, se ssesa ngke gawi dat. ¹⁸ Koe Kristus lou sundok mate sindai bute nte eka-eka dosa taka, Io yo kono nte ulun-ulun yo belo kono, apa Io moit taka epo Allah; Io, yo sundok pnate lang umbai-Iyo kati ulun, tapi yo sundok pinosuli ngaya Roh, ¹⁹ ai mbo lang Roh ene lou Io nyampe Injil epo roh-roh yo mbo lang sper, ²⁰ yo ene epo roh-roh dero yo ono des jman Nuh belo patoh epo Allah, des Allah nokon minte diang doloh des Nuh desung ngraduh praw olai iyo, la mone pulun idik, yo ene walu kongo ulun, yo sinolamat ngke owa olai. ²¹ Ikam lou tmpondo sinolamat ngke pmerawet iyo, yo ene baptis - jodo iyo makse nte ngmberse kremis kompu tonga yo melak, tapi nte tindu keno kesong epo Allah - koe pngenyuli Yesus Kristus, ²² yo tunge mbo tadah sanan Allah, sundok Io dombo epo sorga des sundok eka-eka mlekat, kuasa ai kegalak patoh epo-Iyo.