¹ Koe ene noding eka-eka gawi gata triaw, eka masam akal dat ai bemasam pengkro, belo gawal se erai-erai ai btetenah. ² Ai jadi ka sama kati taru yo bayu kinomekus, yo dor kakan se jatas tolen ai yo rohani, apa koe ene ikam menduan ai kuli slamat, ³ ena ikam beta-beta sundok kiso kanam kbuen Tuhan. ⁴ Ai kompoh ka epo-Iyo, batu yo bolum ene, beta ko noding koe ulun, tapi yo pnili ai kinonuon mbo dempet Allah. ⁵ Ai koe ka ikam low pnakai jadi batu bolum nte nengkuat lou rohani, nte imamat kudus, nte mie persembahan rohani yo koe Yesus Kristus sengkono mbo Allah. ⁶ Koe keo tnulis lang Kitab Suci: "Sebeta iyo, Aku mayak mbo Sion erai botu batu yo bpili, erai botu batu pmeturon yo rarang, ai ise yo percaya epo-Iyo, belo anta kono kmai." ⁷ Koe ene nte ngkam, yo percaya, io rarang, tapi nte dero yo belo percaya: "Batu yo sundok noding koe tukang-tukang, sundok jadi batu pmeturon, sundok low nte jadi batu nte btebow ai jadi batu nte sengkawit." ⁸ Dero sengkawit mbo mne, koe dero belo dipatoh epo firman Allah; ai nte ene memang jodo dero. ⁹ Tapi ikam doko bangsa yo sundok pnili, imamat nte raja, bangsa yo kudus, umat mpun Allah se, apa ikam nyampe gawi gata yo olay ngket Io, yo sundok momba ikam baling ngket lang seom epo pa-Iyo yo ajaib: ¹⁰ ikam, yo bai makse umat Allah, tapi yo tempo ndo sundok jadi umat-Iyo, yo bai belo di tinongkosang tapi yo tempo ndo sundok kuli tengkosang. ¹¹ Erai buntung- erai buntung ku yo knosang, aku nsehat ikam, apa kati ulun nyumba ai pendenge, ikam ngidar ngket pengkakan iwoy ruang yo bkomer nglawan diri nyawa. ¹² Alo makai nau bolum buen mbo ekang bangsa-bangsa makse Yahudi, apa ena dero mtenah ikam se ikam ulun triaw, dero kuli meti iyo ngket gawi gata kam yo buen ai ngmulia Allah des olo Io nuntun dero. ¹³ Patoh ka, koe Allah, epo eka-eka ulun yo keo kuasa, ktine epo raja yo keo kuasa paling ombo, ¹⁴ ktine low epo wakel-wakel yo suyu iyo nte ngukum ulun-ulun yo gawi triaw ai ngnuon ulun-ulun yo keo gawi buen. ¹⁵ Koe endo doko ptua Allah, yo ene apa diang gawi buen ikam nokom bowa akal idok ulun-ulun bungang. ¹⁶ Bolum ka kati ulun bebas ai mba di kati dero yo sala gnuna kbebas ene nte nokom gawi dat dero, tapi bolum ka kati batak Allah. ¹⁷ Kinonuon ka eka-eka ulun, tinongkosang ka erai buntung-erai buntung kam, takut ka epo Allah, kinonuon ka raja! ¹⁸ O ikam, batak-batak, patoh ka diang bol ktakut epo pngentuon kam, belo di epo yo buen tingen ai yo lami lamay, tapi low epo yo rusi. ¹⁹ Koe ene doko kasih karunia, ena ulun koe kingat se ptua Allah kiso kanam sesa yo mbi di arus kono io. ²⁰ Koe dapet be nulek pujian, ena ikam kiso kanam pupuk palu koe ikam nggawi dosa? Tapi ena ikam nggawi buen ai koe ene ikam arus sesa, jadi ene doko kasih karunia mbo Allah. ²¹ Koe nte ene doko ikam bnomba, koe Kristus low sundok sesa nte ngkam ai nape sontoh nte ngkam, apa ikam nyarak kati nau-Iyo. ²² Io mba di keo nggawi dosa, ai nipu ngakal mba di keo lang bowa-Iyo. ²³ Des Io pnator snumpah, Io mba di males diang pator sumpah; des Io sesa, Io mba di ngontam, tapi Io nyrah ene epo Io, yo ngukum diang adel. ²⁴ Io se sundok moson dosa taka lang kompu-Iyo mbo kayu salib, apa taka, yo sundok mate koe dosa, bolum nte yo kono. Koe paya-paya jail-Iyo ikam pinokale. ²⁵ Koe bune ikam tang kati domba, tapi tempo ndo ikam sundok mulik epo yo keo pnyekamu ai mliara diri nyawa kam.