¹ Jadi, koe Kristus sundok kiso kanam ksesah kompu tonga, ikam low arus kendapo kompu tonga kam diang pengenanam yo ketine, koe ise yo sundok kiso kanam ksesah kompu tonga, io sundok sdang nampa dosa-, ² apa des yo aso toro nang pakai kam nte ngaya pengkakan ulun, tapi ngaya petua Allah. ³ Koe sundok deo jman pakai kam nte nglaku petua ulun-ulun yo belo tau se Allah. Ikam sundok bolum lang bebasam pengkakan ngempu, pengkakan, mauk, ungan ruak ruau, kumpulan ngisop ai nyembah berhala yo nusan. ⁴ Koe ene dero eran, se ikam belo ngaya nyoso kompu tonga sama-sama dero mbo lang tenjulong yo belo keo tadah yo sama, ai dero metenah ikam. ⁵ Tapi dero arus nanggung ene epo Io, yo sundok siap ba aut nte ngukum ulun yo bolum ai yo mate. ⁶ Koe ene doko moko Injil sundok snampe low epo ulun-ulun mate, apa dero, sama kati eka-eka ulun, nukum kati nlaku mbo ulun; tapi koe roh kuli bolum ngaya petua Allah. ⁷ Penyundok eka-eka yo ene sundok dmpet. Koe ene jnaga kompu tonga kam ai jadi ka tnang, apa ikam kuli bdoa. ⁸ Tapi yo paling ono: knosang beta-beta epo sama ikam se, koe kosang nokom deo beta dosa. ⁹ Die ka awa nte singgah smole epo erai-erai belo di diang mara-mara. ¹⁰ Bako layan diang erai-erai, sengkono diang karunia yo sundok knuli tongku ulun yo jadi tukang atur yo buen ngket kasih karunia Allah. ¹¹ Ena keo ulun yo bsara, koe ka io bsara kati ulun yo nyampe firman Allah; ena keo ulun yo nglayan, koe ka io nglaku yo diang pngelian yo die Allah, apa Allah kino mulia lang eka ise masam koe Yesus Kristus. Io doko yo keo kemulia ai kuasa sampe turai-turai yo! Amin. ¹² Erai buntung-erai buntung yo knosang, nang ka ikam bengong se dolan api kurow ksa yo ulet epo ikam nte ngikap, ungka-ungka keo-keo ka yo puga nte nengkono mitek ikam. ¹³ Mokin ube, ego ka, sengkono diang bagian yo kuli kam lang ksesa Kristus, apa ikam low kate buen kanam ai ego beta des jeman Io mekelak kemulia-Iyo. ¹⁴ Snang beta ka kanam bolum kam, ena ikam kono kesah triaw koe karan Kristus, koe Roh kemulia, yo ene Roh Allah keo ela ikam. ¹⁵ Nang ka keo lelu mbo ikam yo arus sesa koe ngempate, ngako,gawi triaw, nggramas. ¹⁶ Tapi, ena io sesa koe jadi ulun kristen, apa nang ka io mai, tapi koe ka io ngemulia Allah lang karan Kristus ene. ¹⁷ Koe tempondo sundok sampe des yo ukuman kakan tnindu, ai mbo blai Allah se yo arus yo tla snidang. Ai ena sidang ene tnindu mbo taka, ketimbe ka nau penyundok yo mbo dero yo belo persaya se Iljil Allah? ¹⁸ Ai ena ulun yo kono alang-alang belo sinolamat, ise yo anta tkono diang ulun triaw ai ulun bdosa? ¹⁹ Koe ene buen ka low dero yo arus sesa koe petua Allah,nyrah diri nyawa io,diang dor keo gawi buen, epo Penampa yo stia.